પોલીસ સાથે આપના કાર્યકરો નેતાઓની ઝડપ, ચંદીગઢમાં ટીયર ગૅસનો ઊપયોગ, ધરણા અને ઈડી સામે સૂત્રોચ્ચાર
દિલ્હીમાં કથિત લીકર પોલિસી કૌભાંડ મામલે રાજકારણ ગરમાયુ છે. ગઈ કાલે આમ આદમી પાર્ટીના રાજ્યસભા સાંસદ સંજય સિંહની ધરપકડ કરવામાં આવી હતી. હવે આજે આમ આદમી પાર્ટીના કાર્યકર્તાઓ અને નેતાઓએ તેમની ધરપકડના વિરોધમાં વિરોધ પ્રદર્શન કર્યું હતું . કેટલાક સ્થળો પર પોલીસ અને દેખાવકારો વચ્ચે ઝડપ પણ થઈ હતી. ચંદીગઢમાં પોલીસ સાથે વધુ ટકરાવ થયો હતો અને પોલીસે ટિયર ગૅસનો ઊપયોગ કર્યો હતો. લાઠીચાર્જ પણ કરવામાં આવ્યો હતો.
દિલ્હી, મુંબઈ,ચંડીગઢ અને પૂણે સહિતના શહેરોમાં અનેક સ્થળોએ ધરણા અને પ્રદર્શન થયા હતા. આમ આદમી પાર્ટીના કાર્યકર્તાઓએ અને નેતાઓએ ઈડી વિરુદ્ધ સૂત્રોચ્ચાર કર્યા હતા. બીજી તરફ બીજેપીએ પણ દિલ્હીની કેજરીવાલ સરકાર વિરુદ્ધ મોર્ચો ખોલી દીધો હતો અને આજે રાજઘાટ પર શાંતિપૂર્વક ધરણા કર્યા હતા. આ અગાઉ બીજેપીએ ગઈ કાલે આપ કાર્યાલયની બહાર પ્રદર્શન કર્યું હતું.
મુંબઈમાં અનેક કાર્યકર્તાઓને કસ્ટડીમાં લેવામાં આવ્યા છે. દિલ્હીમાં આપ કાર્યકર્તાઓએ રસ્તા પર ઉતરીને વિરોધ કર્યો હતો. ત્યાં સૂત્રોચ્ચાર કરવામાં આવ્યા હતા. સવારથી જ આપ મુખ્યાલયમાં મોટી સંખ્યામાં કાર્યકર્તાઓ અને નેતાઓના પહોંચવાનો સિલસિલો શરૂ થઈ ગયો હતો . અહીં આપ નેતાઓએ સંજય સિંહની ધરપકડ વિરુદ્ધ સૂત્રોચ્ચાર કર્યા હતા.
નેતાઓના સંબોધન બાદ પ્રદર્શનકારીઓએ ભાજપ મુખ્યાલય તરફ માર્ચ કરી હતી.જો કે પોલીસ એમને અટકાવ્યા હતા. પ્રદર્શનકારીઓના હાથમાં ‘સંજય સિંહ નહીં ઝૂકેગા’ અને ‘I.N.D.I.A’ના પોસ્ટર હતા. સંજય સિંહના પિતા પણ આમ આદમી પાર્ટીના કાર્યાલયમાં વિરોધ પ્રદર્શનમાં સામેલ થયા હતા.
મુંબઈમાં ધરણા માટે મંજૂરી ન મળી
મુંબઈના બલાર્ડ એસ્ટેટ વિસ્તારમાં ED કાર્યાલય પાસે મોટી સંખ્યામાં પોલીસ તૈનાત કરવામાં આવી છે. આમ આદમી પાર્ટીના કાર્યકર્તાઓને કસ્ટડીમાં લેવામાં આવ્યા છે. ત્યાં વિરોધ કરવાની મંજૂરી આપવામાં નથી આવી. આપ કાર્યકર્તાઓનું કહેવું છે કે, સંજય સિંહને જલ્દી મુક્ત કરવામાં આવે. પાર્ટીએ આરોપ લગાવ્યો કે, EDએ સંજય સિંહની ધરપકડ એટલા માટે કરી કારણ કે, તેમણે સંસદમાં અડાણી ગ્રુપ સાથે સબંધિત મુદ્દે ઉઠાવ્યો હતો.
