આજથી બે દિવસ રાજકોટમાં ગુનેગારો ઉપર પોલીસની ધોંસ : ડીસીપી (ક્રાઈમ) દ્વારા સ્પેશ્યલ ડ્રાઈવ કરવા આદેશ
રાજકોટમાં દિવાળી દરમિયાન કાયદો-વ્યવસ્થાનું કોઈ જ અસ્તિત્વ ન હોય કે ગુનેગારોને પોલીસનો કોઈ ખૌફ જ ન હોય તે પ્રકારે એક બાદ એક બનાવ બની ગયા હતા. ગુનેગારોમાં ખાખીનો ડર ખતમ ન જાય તે માટે પોલીસ દ્વારા એક બાદ એક ડ્રાઈવ કરી `તાકાત’નું પ્રદર્શન કર્યું હતું જેમાં 11 વાગ્યા બાદ ખુલ્લી રહેતી ચા-પાનની કેબિનો બંધ કરાવવા તેમજ કારણ વગર `ઉજાગરા’ કરનારા તત્ત્વોને દોડાવવા સહિતની કાર્યવાહી સામેલ હતી. આ ઉપરાંત ગેંગવોરને અંજામ આપનારા ટપોરીઓને પણ આગવી ઢબે પાઠ ભણાવ્યો હતો ત્યારે આ જ પ્રમાણે પોલીસની `ધાક’ યથાવત રહે તે માટે દરેક પોલીસ મથક તેમજ બ્રાન્ચને `એક્ટિવ મોડ’માં મુકી દઈ બે દિવસ સુધી સ્પેશ્યલ ડ્રાઈવ કરવા આદેશ છૂટ્યો હોવાનું જાણવા મળ્યું હતું.
ડીસીપી (ક્રાઈમ) જગદીશ બાંગરવા દ્વારા દરેક પોલીસ મથક ઉપરાંત ડીસીબી, એસઓજી, એલસીબીની બન્ને ઝોનની ટીમને સંબોધીને આદેશ અપાયો છે કે તા.15 અને 16 એમ બે દિવસ સુધી ડ્રાઈવનું આયોજન કરવામાં આવ્યું હોય આ ડ્રાઈવ અલગ-અલગ ટીમ બનાવી કરવી પડશે. ડ્રાઈવ દરમિયાન છરી સહિતના હથિયાર સાથે રાખનારા લોકો તેમજ મોટર વ્હીકલ એક્ટ મતલબ કે નંબર પ્લેટ ન હોય, કારમાં કાળા કાચ હોય તેમની સામે ગુનો દાખલ કરવા ઉપરાંત દારૂ સહિતના નશીલા પદાર્થનું સેવન કરી બહાર નીકળનારા લોકો સામે પ્રોહિબિશન એક્ટ હેઠળ કેસ કરવાના રહેશે. આ કામગીરી અસરકારક રહે તે જોવા પણ ભારપૂર્વક જણાવાયું હતું.
વળી, કયા પોલીસ મથક, બ્રાન્ચે કેટલા કેસ કર્યા તેની યાદી તૈયાર કરી સોમવારે 11 વાગ્યા સુધીમાં ડીસીબી પોલીસ મથકને મોકલી આપવાની અને ડીસીબી પોલીસ મથક દ્વારા માહિતી સંકલિત કરી ડીસીપીને રવાના કરવાની રહેશે. આ દરમિયાન અન્ય કોઈ ડ્રાઈવનું આયોજન કરવાનું થશય તો પોલીસ કમિશનરની પૂર્વ મંજૂરી મેળવવાનું પણ જણાવાયું હતું.
