ગલવાન અથડામણ બાદ પહેલીવાર ચીન જશે PM મોદી : SCO સમિટમાં લેશે ભાગ, ટ્રેમ્પની ટેરિફની ધમકીઓ વચ્ચે વડાપ્રધાનનો મોટો નિર્ણય

પ્રધાનમંત્રી નરેન્દ્ર મોદી આ મહિને યોજાનારી SCO સમિટમાં ભાગ લેવા માટે ચીન જશે. 2020 માં પૂર્વી લદ્દાખના ગલવાનમાં બંને દેશોની સેનાઓ વચ્ચે થયેલી અથડામણ પછી પીએમ મોદીની ચીનની આ પહેલી મુલાકાત હશે. આ મુલાકાત ભારત અને ચીન દ્વારા દ્વિપક્ષીય સંબંધો સુધારવાના પ્રયાસોના પગલે હશે.

જાપાન અને ચીનની મુલાકાત લેશે

પ્રધાનમંત્રી નરેન્દ્ર મોદી આ મહિનાના અંતમાં જાપાન અને ચીનની મુલાકાત લેશે. જાપાનની આ મુલાકાતનો હેતુ દ્વિપક્ષીય સંબંધોને મજબૂત બનાવવાનો છે, જ્યારે પીએમ મોદી ચીનમાં Shanghai Cooperation Organization (SCO) ની બેઠકમાં હાજરી આપશે. પ્રધાનમંત્રી મોદી 30 ઓગસ્ટે જાપાન જવા રવાના થશે, જ્યાં તેઓ જાપાનના પ્રધાનમંત્રી ફુમિયો કિશિદા સાથે ભારત-જાપાન વાર્ષિક શિખર સંમેલનમાં ભાગ લેશે. આ બેઠકમાં બંને દેશો વચ્ચે વ્યૂહાત્મક, આર્થિક અને તકનીકી સહયોગને આગળ વધારવા પર ચર્ચા થવાની શક્યતા છે.

2019 પછી PM મોદીની આ પહેલી ચીન મુલાકાત

આ બેઠક પછી, PM મોદી 31 ઓગસ્ટથી 1 સપ્ટેમ્બર દરમિયાન ચીનના તિયાનજિન શહેરમાં યોજાનારી SCO સમિટમાં ભાગ લેશે. 2019 પછી પીએમ મોદીની આ પહેલી ચીન મુલાકાત હશે. SCO બેઠકમાં પ્રાદેશિક સુરક્ષા, આતંકવાદ, વેપાર સહયોગ અને બહુપક્ષીય સહયોગ જેવા મહત્વપૂર્ણ મુદ્દાઓ પર ચર્ચા કરવામાં આવશે.

PM મોદીની આ મુલાકાત એવા સમયે થઈ રહી છે જ્યારે યુએસ રાષ્ટ્રપતિ ડોનાલ્ડ ટ્રમ્પે રશિયા પાસેથી તેલ ખરીદવા માટે BRICS દેશોને નિશાન બનાવ્યા છે અને યુએસ રાષ્ટ્રપતિ દાવો કરે છે કે BRICS દેશો ડોલરના વર્ચસ્વને પડકાર આપી રહ્યા છે. આવી સ્થિતિમાં, પીએમ મોદીની આ મુલાકાત વ્યૂહાત્મક રીતે ખૂબ જ મહત્વપૂર્ણ માનવામાં આવી રહી છે.

આ પણ વાંચો : સિરાજને ઇંગ્લેન્ડમાં શાનદાર પ્રદર્શનનો થયો ફાયદો : ક્રિકેટર કારકિર્દીના શ્રેષ્ઠ રેન્કિંગ પર પહોંચ્યો, જયસ્વાલને થયો ફાયદો તો ગિલને નુકસાન

જૂન મહિનાની શરૂઆતમાં, સંરક્ષણ પ્રધાન રાજનાથ સિંહે ચીનના કિંગદાઓ શહેરમાં Shanghai Cooperation Organization (SCO) ના સંરક્ષણ પ્રધાનોની બેઠકમાં હાજરી આપી હતી, જ્યાં તેમણે એક દસ્તાવેજ પર હસ્તાક્ષર કરવાનો ઇનકાર કર્યો હતો જે આતંકવાદ સામે ભારતની કડક નીતિને નબળી બનાવી શકે છે. આતંકવાદના મુદ્દા પર મતભેદોને કારણે, શાંઘાઈ સહયોગ સંગઠન (SCO) એ સંયુક્ત નિવેદન બહાર પાડવાનો નિર્ણય લીધો ન હતો.

SCOમાં ચીન-પાકિસ્તાનની હરકતો

સૂત્રોના જણાવ્યા અનુસાર, SCOનું અધ્યક્ષપદ ધરાવતું ચીન અને તેનું ‘સદાબહાર મિત્ર’ પાકિસ્તાન આતંકવાદ પરથી ધ્યાન હટાવવાનો પ્રયાસ કરી રહ્યા હતા. SCO દ્વારા તૈયાર કરાયેલા દસ્તાવેજમાં પહેલગામ આતંકવાદી હુમલાનો ઉલ્લેખ પણ નહોતો. તેનાથી વિપરીત, દસ્તાવેજમાં બલુચિસ્તાનનો ઉલ્લેખ કરવામાં આવ્યો હતો, જે પાકિસ્તાની પ્રાંતમાં અશાંતિ ફેલાવવાનો ભારત પર પરોક્ષ રીતે આરોપ લગાવવાનો પ્રયાસ હતો.