ઓરી મુશ્કેલીમાં મુકાયો : વૈષ્ણો દેવી નજીક હોટલમાં દારૂ પીવા મામલે FIR નોંધાઈ, વાંચો સમગ્ર માહિતી
બોલિવૂડના સોશ્યલાઇટ અને સોશિયલ મીડિયા ઇન્ફ્લુએન્સર ઓરી ઉર્ફે ઓરહાન અવત્રામણિ મુશ્કેલીમાં મુકાયા છે. વૈષ્ણો દેવીના બેઝ કેમ્પ કટરા સ્થિત એક હોટલમાં દારૂ પીવા બદલ ઓરી અને અન્ય 7 લોકો સામે કેસ નોંધવામાં આવ્યો છે. એ જાણવું જોઈએ કે કાયદા અનુસાર, કટરામાં દારૂ વેચવા, રાખવા અને પીવા પર સખત પ્રતિબંધ છે. પોલીસે સોમવારે આ માહિતી આપી.
ઓરીનો પાર્ટી કરતો વીડિયો વાયરલ થયો
આ સમગ્ર મામલે ઓરી તરફથી હજુ સુધી કોઈ પ્રતિક્રિયા આવી નથી. 15 માર્ચે, ઓરીનો એક વીડિયો સોશિયલ મીડિયા પર વાયરલ થયો હતો. જેમાં તે એક ખાનગી હોટલમાં તેના મિત્રો સાથે પાર્ટી કરતો જોવા મળ્યો હતો. આ વીડિયોમાં દારૂની બોટલ પણ જોવા મળી હતી. ઓરીનો આ વીડિયો જોયા પછી, તેને સોશિયલ મીડિયા પર પણ ટ્રોલ કરવામાં આવી રહ્યો છે.
પોલીસે શું કહ્યું ?
જમ્મુ અને કાશ્મીર પોલીસે પોતાના નિવેદનમાં જણાવ્યું હતું કે આ તમામ 8 લોકો સામે ‘દેશના કાયદાનું ઉલ્લંઘન’ કરવા બદલ FIR નોંધવામાં આવી છે. ઉપરાંત, એક ટીમ બનાવવામાં આવી છે જે ‘લોકોની ભાવનાઓને ઠેસ પહોંચાડવા’ બદલ તેમની ધરપકડ કરશે. કટરા પોલીસને 15 માર્ચે ફરિયાદ મળી હતી કે એક હોટલમાં રોકાયેલા કેટલાક મહેમાનો હોટલ પરિસરમાં નિયમોનું ઉલ્લંઘન કરીને દારૂ પીતા જોવા મળ્યા હતા. આ પછી, આ 8 લોકો વિરુદ્ધ FIR નોંધવામાં આવી હતી.
“ઓરહાન અવત્રામણિ, દર્શન સિંહ, પાર્થ રૈના, ઋતિક સિંહ, રાશિ દત્તા, રક્ષિતા ભોગલ, શગુન કોહલી અને અનાસ્તાસિલા અરઝામસ્કીનાએ હોટલ પરિસરમાં દારૂ પીધો હતો, જ્યારે તેમને અગાઉથી જાણ કરવામાં આવી હતી કે માતા વૈષ્ણો દેવી મંદિરની નજીક હોવાથી હોટલ પરિસરમાં દારૂ અને માંસાહારી ખોરાક લેવાની મંજૂરી નથી,” એક પોલીસ અધિકારીએ ફરિયાદનો ઉલ્લેખ કરતા જણાવ્યું હતું.
તેમણે કહ્યું, “આ મામલાની ગંભીરતાને જોતા, રિયાસીના વરિષ્ઠ પોલીસ અધિક્ષક પરમવીર સિંહે ગુનેગારોની ધરપકડ કરવાનો આદેશ આપ્યો છે. જેથી લોકોને ખબર પડે કે લોકોની ભાવનાઓને ઠેસ પહોંચાડતી કોઈપણ પ્રવૃત્તિ ધાર્મિક સ્થળ પર સહન કરવામાં આવશે નહીં.
ઓરી કોણ છે ?
ઓરી એક સોશિયલ મીડિયા સ્ટાર છે. તે પોતાના ફેશન સ્ટેટમેન્ટ અને બી-ટાઉન સેલેબ્સ સાથેની મિત્રતાને કારણે ચર્ચામાં રહે છે. સ્ટાર કિડ્સ સાથેની તેમની પાર્ટીઓ વિશે હંમેશા ચર્ચા થાય છે. જ્હાન્વી કપૂર, અનન્યા પાંડે, ખુશી કપૂર ઉપરાંત, તેના અંબાણી પરિવાર સાથે પણ સારા સંબંધો છે.
