હવે ચાલુ બાઈકે ફોન ઉપર વાત નહી કરી શકાય, સ્ટંટ પણ નહી થઇ શકે : સરકાર શોધી રહી છે અકસ્માતો રોકવાના ઉપાય
શહેરોમાં યુવાનો બાઈક ઉપર સ્ટંટ કરીને ઉત્પાત મચાવે છે એ સામાન્ય થતું જાય છે. આવા સ્ટંટ વખતે અથવા ચાલુ બાઈકે મોબાઈલ ઉપર વાત કરતી વખતે દુર્ઘટના થાય છે તેવા સમાચારો પણ આવતા રહે છે. પરંતુ હવે આ પ્રકારની ઘટનાઓ રોકવા માટે કેન્દ્ર સરકારે કેટલાક ટેકનીકલ ઉપાયો વિચાર્યા છે. સુત્રો અનુસાર, બાઈકમાં હેન્ડલબાર ઉપર ટચ અથવા પ્રેશર સેન્સર લગાવવામાં આવશે.તાજેતરમાં જ કેન્દ્રીય પરિવહન મંત્રાલયે વાહન ઉત્પાદકો સાથે કરેલી બેઠકમાં આ પ્રકારના ઉપાયો લાગુ કરવા જણાવ્યું હતુ.
આ સુત્રોના જણાવ્યા અનુસાર, આ સેન્સર એવા પ્રકારના હશે કે જેનાથી વાહનની સ્પીડ આપોઆપ ચારથી પાંચ સેકન્ડમાં જ ઓછી થઇ જશે. બાઈકનાં હેન્ડલબાર ઉપર આ સેન્સર એવી રીતે લગાવવામાં આવશે કે જેના ઉપરથી હાથ હટાવવામાં આવે તો ચાર થી પાંચ સેકંડમાં જ સ્પીડ આપોઆપ ઓછી થઇ જાય. આગળ જઈને આવી બાઈક ઉભી પણ રહી જાય.
વધુમાં વાહન ઉત્પાદકો સાથે ટુ વ્હીલરમાં લેગગાર્ડ ફરજીયાત કરવા અંગે પણ ચર્ચા થઇ છે. અકસ્માતના કીસ્સામાં વાહન ચાલકના શરીરના નીચેના ભાગમાં પણ ઈજા થાય છે. આવી ઈજા ઓછી કરવા માટે લેગ ગાર્ડ લગાવવું ફરજીયાત બનશે.
અત્રે ઉલ્લેખનીય છે કે, દેશમાં દુર્ઘટનાઓમાં ટુવ્હીલર ચાલક જ સૌથી વધુ (45% ) શિકાર બને છે. અકસ્માતનું કારણ પણ તેઓ જ બને છે. એકલા 2023ના વર્ષમાં જ ટુવ્હીલરને લીધે થયેલા અકસ્માતમાં 48181 લોકોના મોત થયા હતા.
