ડોમેસ્ટિક અને ઈન્ટરનેશનલ રૂટ પર ફ્યૂઅલ ચાર્જ વસુલવાનું શરુ
500 કિલોમીટર સુધીનું અંતર હશે તો ફ્યૂઅલ ચાર્જ 300 રૂપિયા રહેશે.
દેશની સૌથી મોટી ડોમેસ્ટિક એરલાઈન ઈન્ડિગોમાં મુસાફરી કરવી હવે મોંઘી થઈ ગઈ છે. ઈન્ડિગો એરલાઈન્સે બધી જ ફ્લાઈટ પર ફ્યૂઅલ ચાર્જ લગાડવાની જાહેરાત કરી છે. ફ્લાઈટના ડિસ્ટન્સ પ્રમાણે, 300થી 1000 રૂપિયા સુધીનો ફ્યૂઅલ ચાર્જ લગાવવામાં આવશે. ડોમેસ્ટિક અને ઈન્ટરનેશનલ એર રૂટ પર ATF એટલે કે, એવિએશન ટર્બાઈન ફ્યૂઅલની કિંમત વધતાં ભરપાઈ માટે ટિકિટ ઉપર ફ્યૂઅલ ચાર્જ લેવામાં આવશે. જેની અમલવારી આજથી એટલે કે 6 ઓક્ટોબરથી થઈ ગઈ છે.
ઈન્ડિગો એરલાઈનના પગલે અન્ય એરલાઈન્સે પણ ફ્યૂઅલ ચાર્જ વસૂલવાની તૈયારી કરી છે કે કેમ તે જાણવાનો અમારા સાથી અખબાર ટાઈમ્સ ઓફ ઈન્ડિયાએ પ્રયાસ કર્યો હતો. સ્પાઈસજેટનું કહેવું છે કે, તેઓ ફ્યૂઅલ ચાર્જ લેશે પરંતુ કેટલો તેની વિગતો નહીં આપે. અન્ય એરલાઈન્સ પણ આ પગલે ચાલે તો નવાઈ નહીં. જેટ ફ્યૂઅલની કિંમતમાં થયેલો વધારો તેમજ એરલાઈનની ઓપરેટિંગ કોસ્ટ આ ભાવવધારા પાછળ જવાબદાર છે. ડૉલરની સામે રૂપિયો નબળો પડતાં વધુ ફટકો પડ્યો છે.
ઈન્ડિગો એરલાઈન્સ તરફથી આપવામાં આવેલા નિવેદનમાં કહેવામાં આવ્યું છે કે, “6 ઓક્ટોબર 2023થી ઈન્ડિગો ડોમેસ્ટિક અને ઈન્ટરનેશનલ રૂટ પર ફ્યૂઅલ ચાર્જ લગાડશે. છેલ્લા ત્રણ મહિનાથી એવિએશન ટર્બ્યૂનલ ફ્યૂઅલની કિંમતમાં દર મહિને સતત વધારો થયો છે અને તેના કારણે જ અમારે આ નિર્ણય લેવો પડ્યો છે. એરલાઈનના ઓપરેટિંગ ખર્ચમાં ATFનો હિસ્સો નોંધપાત્ર છે. એવામાં ATFમાં થયેલા વધારાને પહોંચી વળવા માટે ફ્યૂઅલ ચાર્જ લાગુ કરવામાં આવ્યો છે. કિંમતના નવા સ્ટ્રક્ચર મુજબ જે પેસેન્જરો ટિકિટ બુક કરાવશે તેમને જુદા-જુદા ડિસ્ટન્સ પ્રમાણે અને સેક્ટર મુજબ ફ્યૂઅલ ચાર્જ ચૂકવવાનો રહેશે.”
જેમ અંતર વધુ તેમ ફ્યૂઅલ ચાર્જ પણ વધતો જશે. 500 કિલોમીટર સુધીનું અંતર હશે તો ફ્યૂઅલ ચાર્જ 300 રૂપિયા રહેશે અને તેના પર ટેક્સ પણ ચૂકવવાનો રહેશે. 1000 કિલોમીટરનું અંતર હશે 400 રૂપિયા ફ્યૂઅલ ચાર્જ, 1001થી 1500 કિલોમીટર માટે 550 રૂપિયા ફ્યૂઅલ ચાર્જ, 1501થી 2500કિલોમીટર માટે ફ્યૂઅલ ચાર્જ 650 રૂપિયા રહેશે, 2501થી 3500 કિલોમીટર માટે ફ્યૂઅલ ચાર્જ 800 રૂપિયા રહેશે અને 3501થી વધુ કિલોમીટર હશે તો ફ્યૂઅલ ચાર્જ 1000 રૂપિયા થશે.
એવિએશન એનાલિસ્ટ અમેયા જોષીનું કહેવું છે કે, “ગત મહિને ATFની કિંમતમાં 5.1 ટકાનો વધારો થયો હતો. ડોલર સામે રૂપિયો નબળો પડ્યો છે અને ફ્લાઈટ ઓપરેશનલ ખર્ચ મોટાભાગે ડોલરમાં ચૂકવાય છે, જેના કારણે એરલાઈન્સ પર દબાણ વધ્યું છે. ફ્યૂઅલ ચાર્જ લેવાથી એરલાઈનને ખર્ચમાં થોડી રાહત થઈ શકે છે, પરંતુ ATFની જેટલી કિંમત વધી છે તે બધાની ભરપાઈ તો નહીં જ થઈ શકે.”
ભારતીય એરલાઈન્સ લાંબા સમયથી સરકારને ATF પર લાગતી એક્સાઈઝ ડ્યૂટી ઘટાડવાની રજૂઆત કરી રહી છે પરંતુ માગણી સ્વીકારાઈ નથી. અમુક રાજ્યોએ ATF પર લેવાતા વેટ પર કાપ મૂક્યો છે છતાં દિલ્હી સહિતના મુઠ્ઠીભર રાજ્યો ઊંચો વેટ વસૂલે છે. ATFની કિંમતમાં થતા વધારાના કારણે ભારતીય એરલાઈન્સનો ઓપરેશનલ ખર્ચ હંમેશાથી વધારે રહ્યો છે. ATFની બેઝ પ્રાઈસ વધુ હોવા ઉપરાંત રાજ્ય અને કેંદ્ર સરકાર દ્વારા લગાવવામાં આવતી ડ્યૂટી અને ટેક્સ પણ તેના ભાવમાં વધારો કરે છે. ઉલ્લેખનીય છે કે, છેલ્લે 2018માં એરલાઈન્સ દ્વારા ફ્યૂઅલ સરચાર્જ લગાવવામાં આવ્યો હતો પરંતુ ધીમે-ધીમે ફ્યૂઅલની પ્રાઈસ ઘટતાં તેને હટાવી દેવાયો હતો.
