હવે ભારતીયોને 55 દેશમાં મળશે વિઝા ફ્રી એન્ટ્રી! વિશ્વમાં ઇન્ડિયન પાસપોર્ટની તાકાતમાં વધારો, આ દેશનો પાસપોર્ટ સૌથી નબળો

હેનલી પાસપોર્ટ ઇન્ડેક્સે 2026માં વિશ્વના સૌથી શક્તિશાળી પાસપોર્ટનું રેન્કિંગ બહાર પાડ્યું છે. હેનલી પાસપોર્ટ ઇન્ડેક્સ 2026નો લેટેસ્ટ રિપોર્ટ વૈશ્વિક ગતિશીલતા અને રાજદ્વારી સંબંધોના બદલાતા સ્વરૂપને પ્રદર્શિત કરે છે. હવે ભારતીય પાસપોર્ટની તાકાત વધી ગઈ છે. ભારતનો ક્રમ 85 થી ઊછળી 80 પર આવી ગયો છે. આ ઉપરાંત ભારતીયો 55 દેશોમાં વિઝા ફ્રી અથવા વિઝા ઓન એરાઇવલ પર યાત્રા કરી શકે છે.

આ ઇન્ડેક્સ ફક્ત પ્રવાસનના દ્રષ્ટિકોણથી જ મહત્ત્વપૂર્ણ નથી, દેશની આંતરરાષ્ટ્રીય પ્રતિષ્ઠા અને તેના નાગરિકોને મળતી સ્વતંત્રતાઓને પણ માપે છે. હેનલી પાસપોર્ટ ઇન્ડેક્સ લંડન સ્થિત વૈશ્વિક નાગરિકતા અને રહેઠાણ સલાહકાર ફર્મ હેનલી એન્ડ પાર્ટનર્સ દ્વારા પ્રકાશિત કરવામાં આવે છે. આ ઇન્ડેક્સમાં 227 દેશો અને પ્રદેશોને સામેલ કરવામાં આવ્યા છે.

આ ઇન્ડેક્સમાં જે દેશોના નાગરિકોને સૌથી વધુ દેશોમાં વિઝા-ફ્રી એન્ટ્રી મળે છે, તે દેશો રેન્કિંગમાં ટૉપ પર છે, જ્યારે જે દેશોના નાગરિકોને સીમા પર સૌથી વધુ તપાસ પ્રક્રિયામાંથી પસાર થવું પડે છે, તેવા દેશો સૌથી નીચે છે. આ વર્ષના રેન્કિંગમાં એશિયન દેશોનો દબદબો છે, જ્યારે પશ્ચિમી શક્તિઓ, ખાસ કરીને અમેરિકા અને બ્રિટનના રેન્કિંગમાં ચિંતાજનક ઘટાડો જોવા મળ્યો છે. 2026ના હેનલી પાસપોર્ટ ઇન્ડેક્સ રેન્કિંગમાં સમાન સ્કોર ધરાવતા ઘણા દેશોને એક જ સ્થાને રાખવામાં આવ્યા છે.

આ પણ વાંચો :અમદાવાદ એર ઈન્ડિયા વિમાન દુર્ઘટના: મૃતક પાયલોટ સુમીત સભરવાલનાના ભત્રીજાને તપાસ માટે તેડું, જાણો શું છે સમગ્ર મામલો

વિવિધ દેશોના પાસપોર્ટની રેન્કિંગ

પાસપોર્ટ ઇન્ડેક્સ 2026માં ટોપના ત્રણ પાસપોર્ટ એશિયન દેશોના છે. આ ઇન્ડેક્સમાં સિંગાપોરનો પાસપોર્ટ ફરી એક વાર સૌથી શક્તિશાળી પાસપોર્ટ બની ગયો છે. સિંગાપોરના પાસપોર્ટધારકને 192 દેશોમાં વિઝા-ફ્રી એન્ટ્રીની સુવિધા મળે છે. જ્યારે ઇન્ડેક્સમાં બીજા નંબરે જાપાન અને સાઉથ કોરિયા બંને દેશોના પાસપોર્ટ છે. જાપાન અને સાઉથ કોરિયન પાસપોર્ટ ધારકોને 188 દેશોમાં વિઝા-ફ્રી એન્ટ્રીની સુવિધા મળે છે. ટોચના ત્રણ સ્થાનો પર એશિયન દેશોની હાજરી સાબિત કરે છે કે વૈશ્વિક શક્તિનું કેન્દ્ર ધીમે ધીમે પૂર્વ તરફ સરકી રહ્યું છે.