ફ્લાવર નહીં ફાયર હૈ… મેલબોર્ન ટેસ્ટમાં નીતિશ રેડ્ડીએ ‘પુષ્પા’ સ્ટાઈલમાં સદી ફટકારી, બનાવ્યો ખાસ રેકોર્ડ

મેલબર્નમાં ભારત-ઑસ્ટે્રલિયા વચ્ચે રમાઈ રહેલી બૉક્સિંગ-ડે ટેસ્ટના ત્રીજા દિવસે ટીમ ઈન્ડિયાએ જોરદાર વાપસી કરીને નવ વિકેટના ભોગે ૩૫૮ રન બનાવી લીધા હતા. ઑસ્ટે્રલિયાએ પહેલી ઈનિંગમાં ૪૭૪ રન બનાવ્યા હતા જેની સામે ભારત હજુ પણ ૧૧૬ રન પાછળ છે. પહેલી ઈનિંગમાં નીતિશ રેડ્ડીએ `પુષ્પા સ્ટાઈલ’માં સદી ફટકારી હતી અને તે હજુ પણ અણનમ છે. તેણે ૧૭૬ બોલની ઈનિંગમાં ૧૦ ચોગ્ગા અને એક છગ્ગો લગાવ્યો હતો
.
ભારતે ત્રીજા દિવસે પાંચ વિકેટે ૧૬૪ રનથી આગળ રમવાનું શરૂ કર્યું હતું જેમાં ૧૯૪ રન ઉમેર્યા હતા. આ દરમિયાન ભારતે વધુ ચાર વિકેટ ગુમાવી હતી જેમાં ઋષભ પંત, રવિન્દ્ર જાડેજા, જસપ્રીત બુમરાહ અને વોશિંગ્ટન સુંદર સામેલ છે. નીતિશે નવમા ક્રમે બેટિંગ કરવા ઉતરેલા વોશિંગ્ટન સુંદર સાથે આઠમી વિકેટ માટે ૧૨૭ રનની ભાગીદારી કરી હતી. આ બન્નેએ ૧૫૦-૧૫૦ બોલ રમ્યા હતા.
વોશિંગ્ટન સુંદર ૧૬૨ બોલમાં એક ચોગ્ગાની મદદથી ૫૦ રન બનાવીને આઉટ થયો હતો. આ પહેલાં યશસ્વી જયસ્વાલ ૮૨ રન, રોહિત શર્મા ત્રણ, કે.એલ.રાહુલ ૨૪, વિરાટ કોહલી ૩૬ અને ઋષભ પંત ૨૮ તેમજ રવિન્દ્ર જાડેજા ૧૭ રન બનાવીને આઉટ થયા હતા. બુમરાહ અને આકાશ દીપ ખાતું ખોલાવી શક્યા ન્હોતા.

અત્રે ઉલ્લેખનીય છે કે નીતિશ રેડ્ડીએ આંતરરાષ્ટ્રીય કારકીર્દિમાં પહેલી સદી બનાવી હતી. તેણે ટેસ્ટમાં પહેલી વખત ૫૦થી વધુ રન બનાવ્યા અને એ ઈનિંગને સદીમાં તબદીલ કરી હતી. આ સાથે જ તે ઑસ્ટે્રલિયામાં ટેસ્ટ સદી બનાવનારો ત્રીજો સૌથી યુવા ભારતીય બન્યો હતો. તેના પહેલાં સચિન તેંડુલકર અને ઋષભ પંતે સદી બનાવી હતી.