રિલાયન્સના બોર્ડમાં ઈશા, આકાશ અને અનંત અંબાણીની નોન-એક્ઝિ. ડિરેક્ટર તરીકે નિમણૂક

શેરહોલ્ડરોએ આપી મંજુરી

આકાશ અને ઈશા રિલાયન્સ જિયો અને રિલાયન્સ રિટેલ તથા અનંત ન્યૂ એનર્જી બિઝનેસમાં વ્યસ્ત

રિલાયન્સ ઈન્ડસ્ટ્રીઝના શેરહોલ્ડરોએ આ ગ્રૂપના નોન-એક્ઝિક્યુટિવ ડિરેક્ટર તરીકે ઈશા, આકાશ અને અનંત અંબાણીની નિમણૂકને મંજૂરી આપી દીધી છે. રિલાયન્સ જૂથના ચેરમેન મુકેશ અંબાણીએ 46મી વાર્ષિક સાધારણ સભામાં જણાવ્યું કે તેમના ત્રણ સંતાનો – આકાશ, અનંત અને ઈશા – હવે બિઝનેસની બાગડોર સંભાળવા માટે સજ્જ છે. રિલાયન્સ ઈન્ડસ્ટ્રીઝ એ ભારતના પ્રાઈવેટ સેક્ટરની સૌથી મૂલ્યવાન કંપની છે. તેમાં વારસાની યોજના હવે અમલમાં આવી રહી છે. નવી પેઢીના અનુભવને લઈને કેટલાક એક્સપર્ટે સવાલ કર્યા હતા, પરંતુ આખરે બધું યોજના મુજબ જ આગળ વધી રહ્યું છે.

ઓઈલથી લઈને ટેલિકોમ અને રિટેલ સુધીના બિઝનેસમાં રિલાયન્સ ઈન્ડસ્ટ્રીઝ હાજરી ધરાવે છે. મુકેશ અંબાણીએ રિલાયન્સની AGMમાં જે જાહેરાત કરી હતી તે મુજબ કંપનીમાં નવી પેઢીની નિમણૂક માટે શેરધારકોની મંજૂરી માગવામાં આવી હતી. તેમાં અનંત અંબાણીની ડિરેક્ટર તરીકે નિયુક્ત સામે કેટલીક પ્રોક્સી એડવાઈઝરી કંપનીઓએ વિરોધ કર્યો હતો. પરંતુ આખરે શેરધારકોની મંજૂરી મળી ગઈ છે.

મુકેશ અંબાણીએ કહ્યું હતું કે આકાશ અને ઈશાએ રિલાયન્સ જિયો અને રિલાયન્સ રિટેલમાં લીડરશિપની પોઝિશન મેળવી છે. તેઓ શરૂઆતથી જ ઉત્સાહપૂર્વક આ બિઝનેસને આગળ વધારી રહ્યા છે. અનંત પણ ઉત્સાહપૂર્વક ન્યૂ એનર્જી બિઝનેસમાં જોડાયા છે. તેઓ તેમનો મોટા ભાગનો સમય જામનગરમાં વીતાવે છે.

મુકેશ અંબાણીએ કહ્યું છે કે યુવા ટીમ લીડર્સ અને પ્રોફેશનલો હવે આ ગ્રૂપને આગળ લઈ જશે. પરંતુ ડોમેસ્ટિક પ્રોક્સિ એડવાઈઝરી કંપની ઈન્સ્ટિટ્યુશનલ ઈન્વેસ્ટર એડવાઈઝરી સર્વિસિસ (IiAS)એ રિલાયન્સના શેરહોલ્ડરોને બોર્ડમાં અનંત અંબાણીની નિયુક્તિ સામે વોટ કરવાની સલાહ આપી હતી. અમેરિકા સ્થિત ઈન્સ્ટિટ્યૂશનલ શેરહોલ્ડર સર્વિસિસે (ISS) પણ રોકાણકારોને આવી જ ભલામણ કરી હતી.

IiASનું કહેવું છે કે અનંત અંબાણીની ઉંમર હજુ 26 વર્ષ છે અને તે વોટિંગ ગાઈડલાઈન્સની સાથે સુસંગત નથી. ISS કહે છે કે અનંત અંબાણી પાસે લીડરશિપનો તથા બોર્ડમાં રહેવાનો બહુ મર્યાદિત અનુભવ છે જેના કારણે તેમણે અનંત માટે વોટિંગ ન કરવાની સલાહ આપી હતી.

રિલાયન્સ જૂથના સ્થાપક ધીરુભાઈ અંબાણી 2002માં વિલ બનાવ્યા વગર અવસાન પામ્યા ત્યારે તેમની પાછળ તેમના સંતાનો મુકેશ અંબાણી અને અનિલ અંબાણી વચ્ચે બિઝનેસ માટે ભારે ખેંચતાણ થઈ હતી. આવી સ્થિતિનું પૂનરાવર્તન ન થાય તે માટે મુકેશ અંબાણીએ અત્યારથી વારસાની યોજના બનાવી દીધી છે અને તેનો અમલ પણ શરૂ કરી દીધો છે.