વિધાનસભાના ચોમાસુ સત્રનો રાષ્ટ્રપતિના સંબોધન સાથે પ્રારંભ

ચોમાસુ સત્રનાં પ્રથમ દિવસે રાષ્ટ્રપતિ દ્રૌપદી મુર્મુએ ઈ-વિધાનસભાનું કર્યું ઉદઘાટન

• રાષ્ટ્રપતિની હાજરીમાં કોંગ્રેસ નેતાઓનો વિરોધ: સ્વાગત માટે બોલાવાયા તો હાથ જોડીને બેસી રહ્યા

ગુજરાત વિધાનસભાના ચોમાસુ સત્રનો આજથી પ્રારંભ થયો છે. આજે ગુજરાત વિધાનસભા સભા ખાતે રાષ્ટ્રપતિ દ્રૌપદી મુર્મુ પણ હાજર રહ્યા હતા. રાષ્ટ્રપતિ દ્રૌપદી મુર્મુના હસ્તે ગુજરાત ઈ-વિધાનસભાનું ઉદ્ઘાટન કરવામાં આવ્યું હતું. સાથે જ રાષ્ટ્રપતિ દ્રૌપદી મુર્મુના હસ્તે NeVA (નેશનલ ઈ-વિધાન એપ્લિકેશન)નું લૉન્ચિંગ પણ કરવામાં આવ્યું હતું.

સત્રના પહેલા જ દિવસે કોંગ્રેસના નેતાએ રાષ્ટ્રપતિની હાજરીમાં વિરોધ નોંધાવ્યો હતો. વિધાનસભા સત્રના પહેલા જ દિવસે અમિત ચાવડા, ચૈતર વસાવાએ મુખ્યમંત્રી અને મંત્રીઓના સન્માન કરવાની ચોખ્ખી ના પાડી દીધી હતી.

ગુજરાત વિધાનસભામાં સંબોધન દરમિયાન રાષ્ટ્રપતિ દ્રૌપદી મુર્મૂએ કહ્યું હતું કે ગુજરાતની પાવન ભૂમિ પર આવવું મારા માટે ગર્વની વાત છે. ભૂપેન્દ્રભાઈની સરકારના બે વર્ષ પૂર્ણ થવા પર હાર્દિક શુભકામના પાઠવું છું. 1960 બાદ આ વિધાનસભાએ ઘણા ઉતાર-ચઢાવ જોયા છે. આ વિધાનસભા ડિજીટલ હાઉસ બની ગઈ છે. PM મોદીના નેતૃત્વમાં દેશ મજબૂતીથી આગળ વધી રહ્યો છે. ગુજરાત દેશની સૌથી વધુ દૂધ ઉત્પાદન કરતું રાજ્ય છે. વીજળીના ઉત્પાદનમાં પણ ગુજરાત આગળ છે. ગુજરાતની જનતાને ઘરે જ પીવાનું પાણી મળી રહ્યું છે.

ભૂપેન્દ્ર પટેલે કહ્યુ- PMની પ્રેરણાથી સરકાર પર જનતાનો વિશ્વાસ વધ્યો છે
મુખ્યમંત્રી ભૂપેન્દ્ર પટેલે કહ્યું હતું કે આજનો દિવસ આપણા બધા માટે ખાસ છે. ગુજરાત વિધાનસભા હવે સંપૂર્ણપણે પેપર લેસ છે. રાષ્ટ્રપતિ આપણી વચ્ચે હાજર તે આપણા માટે ગર્વની વાત છે. PM મોદીના નેતૃત્વમાં દેશ વિશ્વ ગુરૂ તરફ આગળ વધી રહ્યો છે. ગુજરાત વિધાનસભામાં આજથી ઈ-નેવાનો પ્રારંભ થયો છે. 9 હજારથી વધુ ગ્રામ પંચાયતમાં ઓબ્ટિક ફાયબર નેટવર્ક છે. PMની પ્રેરણાથી સરકાર પર જનતાનો વિશ્વાસ વધ્યો છે. ભારતે G-20 સંમેલનનો ભવ્ય કાર્યક્રમ યોજ્યો.

લોકશાહીનું અપમાન થયું છેઃ અમિત ચાવડા
આ મામલે વિપક્ષ નેતા અમિત ચાવડાએ કહ્યું કે, ‘લોકશાહીનું અપમાન થયું એટલે અમે વિરોધ કરીએ છીએ. કલોલમાં અમારા સભ્યનું અપહરણ કરવામાં આવ્યું છે. મહામહિમની હાજરીમાં જ લોકશાહીની હત્યા થઈ છે.’

રાષ્ટ્રપતિ દ્રૌપદી મુર્મુની હાજરીમાં વિધાનસભા ગૃહમાં જ્યારે મહાનુભાવોનું સન્માન ચાલી રહ્યું હતું, ત્યારે કોંગ્રેસ પક્ષના નેતા અમિત ચાવડાને મુખ્યમંત્રીનું સન્માન કરવા માટે આમંત્રિત કરવામાં આવ્યા હતા. જોકે, અમિત ચાવડા સન્માન કરવાની ના કહી દીધી હતી. અમિત ચાવડાએ બેઠાં બેઠાં જ હાથ જોડ્યા હતા, તેઓ સ્વાગતમાં જોડાયા નહતા.

ચૈતર વસાવાએ પણ કર્યો ઈનકાર
આ ઉપરાંત ધારાસભ્ય ચૈતર વસાવાએ પણ સન્માન કરવાનો ઈનકાર કર્યો હતો. ચૈતર વસાવાને પણ વિધાનસભા ઉપાધ્યક્ષનું સન્માન કરવા માટે આમંત્રિત કરવામાં આવ્યા હતા. જોકે, ચૈતર વસાવાએ સન્માન કરવાની ના કહી દીધી હતી.