મધ્ય પૂર્વમાં અમેરિકી નૌકા જહાજો અને લડાકુ વિમાનોનો જંગી ખડકલો : ગમે તે ઘડીએ યુદ્ધમાં ઝંપલાવવાની પૂર્વ તૈયારી

ઈરાન અને ઇઝરાયેલ વચ્ચે યુદ્ધ વધુ ને વધુ ઉગ્ર બની રહ્યું છે ત્યારે અમેરિકાએ મધ્ય પૂર્વમાં સૈન્ય તાકાતમાં
અસાધારણ કક્ષાનો વધારો કર્યો છે. અમેરિકા દ્વારા વધારાના ફાઈટર જેટ, ટેન્કર્સ અને યુદ્ધનૌકાઓ રક્ષણ માટે તૈનાત કરવામાં આવ્યા છે.અમેરિકાએ ઈરાનના હુમલાઓથી ઇઝરાયેલનું રક્ષણ કરવા માટે આશસ્ત્ર જમાવડો કર્યો હોવાનું કારણ આપ્યું હતું પણ વિશ્લેષકો તેને યુદ્ધમાં અમેરિકાની સંભવિત સીધી સંડોવણીની પૂર્વ તૈયારી માની રહ્યા છે.

મધ્ય પૂર્વમાં અમેરિકી વિમાનોની હિલચાલમાં મોટો વધારો થયો છે. બાર F-16 વિમાનોને સાઉદી અરેબિયામાં ખસેડવામાં આવ્યા છે, અને અમેરિકી ફાઈટર જેટ હવે ઇરાક અને સીરિયાની સરહદ નજીક સતત હવાઈ પેટ્રોલિંગ કરી રહ્યા છે. ડિએગો ગાર્સિયામાં B-52 બોમ્બર્સ તૈયાર છે. અમેરિકી યુદ્ધનૌકાઓ ઈરાની મિસાઈલોને રોકી રહી છે, જેમાં યુએસએસ ધ સુલિવન્સ અને યુએસએસ આર્લે બર્ક જેવા ડિસ્ટ્રોયર્સ ઈઝરાયેલના રક્ષણમાં સીધી ભૂમિકા ભજવી રહ્યા છે. યુએસએસ કાર્લ વિન્સન અને તેનું સ્ટ્રાઈક ગ્રૂપ અરબી સમુદ્રમાં તૈનાત કરી દેવાયું છે. યુએસએસ નિમિટ્ઝ રિઇનફોર્સમેન્ટ અથવા રોટેશન માટે રવાના થઈ રહ્યું છે. અમેરિકી સંરક્ષણ સચિવ પીટ હેગસેથે આ તૈનાતીની પુષ્ટિ કરી, આ નિર્ણય “અમારા લોકોની સલામતી માટે” લેવાયો હોવાનું જણાવ્યું હતું.

આ પણ વાંચો : શું અમદાવાદમા ક્રેશ વિમાનનું બ્લેક બોક્સ અમેરિકા મોકલાશે? સરકારે આ મામલે કરી સ્પષ્ટતા, જાણો શું છે સમગ્ર મામલો

ઈરાનના ફોર્ડો પરમાણુ મથકનો ઘડો લાડવો કરવાની તૈયારી?

ઈરાનના પર્વતોમાં ઊંડે બનાવવામાં આવેલા ફોર્ડો પરમાણુ મથકનો નાશ કરવાની ક્ષમતા એક માત્ર અમેરિકા પાસે છે.30 હજાર પાઉન્ડનો “બંકર બસ્ટર” બોમ્બ અને તેના પરિવહન માટે જરૂરી સામગ્રી તથા વિમાનો એક માત્ર અમેરિકા જ ધરાવે છે.હાલમાં તે માટેનો સરંજામ તૈનાત નથી કરવામાં આવ્યો, પણ તે વિકલ્પ પણ ખુલ્લો હોવાના પેન્ટાગોને નિર્દેશ આપ્યા હતા.ટ્રમ્પે પણ કહ્યું હતું કે એ પરમાણુ મથકનો નાશ માત્ર અમેરિકા જ કરી શકે છે.અત્રે એ ઉલ્લેખ પણ જરૂરી છે કે અભેદ ગણાતું એ પરમાણુ મથક નષ્ટ કરવા માટે ઇઝરાયેલ અગાઉ અમેરિકાની મદદ માંગી ચૂક્યું છે.

આ પણ વાંચો : આરોપીની અંધશ્રદ્ધાએ નિર્દોષ લોકોના જીવ લીધા : SMCના PIના માતા-પિતાની હત્યાના કેસમાં થયો ચોંકાવનારો ખુલાસો   

અમેરિકાએ વધુ સૈન્ય દળો મધ્ય પૂર્વમાં ખસેડ્યા

અમેરિકાએ તાજેતરના દિવસોમાં અન્ય સ્થળોએથી મધ્ય પૂર્વમાં વધુ સૈન્ય દળો ખસેડ્યા છે. ત્રીજું નેવી ડિસ્ટ્રોયર પૂર્વીય ભૂમધ્ય સમુદ્રમાં પ્રવેશ્યું છે, અને બીજું એરક્રાફ્ટ કેરિયર ગ્રૂપ અરબી સમુદ્ર તરફ જઈ રહ્યું છે.
મધ્ય પૂર્વમાં અમેરિકી સૈનિકોની સંખ્યા લગભગ 40,000 સુધી પહોંચી છે, જે સામાન્ય કરતાં દસ હજાર વધારે છે. ટ્રમ્પ દ્વારા અમુક બેઝ પરના પરિવારોને સ્વૈચ્છિક રીતે સ્થળાંતર કરવાની મંજૂરી આપવામાં આવી હતી. મધ્ય પૂર્વમાં અમેરિકાના તમામ બેઝ હાઈ એલર્ટ પર મૂકવામાં આવ્યા છે.