મહારાષ્ટ્ર ભાજપ પ્રમુખના પુત્રની કારે અનેક વાહનોને ટક્કર મારી
રાત્રે એક વાગ્યે બીયર બાર માંથી પરત આવતા હતા
નાગપુરમાં સોમવારે રાત્રે મહારાષ્ટ્ર ભાજપના પ્રદેશ પ્રમુખ ચંદ્રશેખર બાવનકુલેના પુત્ર સંકેતની ઓડી કારે બે ગાડીઓ અને અન્ય વાહનોને ટક્કર મારતા બે લોકોને ઈજા થઈ હતી. લોકોએ પીછો કરીને ગાડીને રોકતા સંકેત સહિત ત્રણ શખ્સો ભાગી ગયા હતા. આ બધા ધર્મપેઠના બીયર બારમાંથી પરત ફરી રહ્યા હતા ત્યારે અકસ્માતોની આ હારમાળા સર્જાઇ હતી. પકડાયેલા બંને શખ્સો નશાની હાલતમાં હોવાનું જાણવા મળ્યું છે.
બનાવવાની પ્રાપ્ત વિગત મુજબ રાત્રે એક વાગ્યે સંકેત સહિત પાંચ શખ્સો બીયર બાર માંથી પરત ફરી રહ્યા હતા ત્યારે માનકપુર વિસ્તારમાં તેમની ઓડી કારે જીતેન્દ્ર સોનકામ્બ્લે નામના શખ્સની ગાડીને ટક્કર મારી હતી. ત્યાંથી આગળ જઈ બે મોપેડ સહિત અન્ય વાહનોને ઉડાવ્યા હતા. બાદમાં માનકપુર બ્રિજ પાસે પોલો કારને ટક્કર મારી હતી. એ કારના માલિક તથા અન્ય લોકોએ બાદમાં પીછો કરી અને અકસ્માત સર્જનાર ઓડી કારને આંતરી હતી. એ સમયે સંકેત અને અન્ય બે શખ્સો ભાગી ગયા હતા. લોકોએ ગાડીમાંથી ડ્રાઇવર અર્જુન અને રોનક નામના બે યુવાનોને ઝડપી પોલીસ હવાલે કર્યા હતા.
આ ઘટના બાદ ભાજપના પ્રદેશ પ્રમુખ ચંદ્રશેખર બાવનકુલેએએ ઓડી કાર તેમના પુત્ર સંકેતના નામે રજીસ્ટર્ડ હોવાનું કબૂલ્યું હતું. તેમણે પોલીસને તટસ્થ રીતે તપાસ કરવા અને ગુનેગારોને સજા કરવા માટે અનુરોધ કર્યો હતો.
