રાજકોટમાં ગેરકાયદે બાંધકામમાં ‘સાથ’ આપનાર એક આર્કિટેક્ટનું લાયસન્સ સસ્પેન્ડ : 19 રડારમાં,નોટિસ ફટકારી જવાબ મંગાયો

રાજકોટનો એક પણ એવો વિસ્તાર નહીં હોય કે જ્યાં ગેરકાયદેસર બાંધકામ ખડકાયેલું ન હોય. વળી, તંત્ર દ્વારા આવા બાંધકામને માત્ર નોટિસ આપી સંતોષ માની લેવામાં આવતો હોય દબાણકર્તાઓની હિંમત ઉલટાની વધી રહી છે. બીજી બાજુ ગેરકાયદે બાંધકામ કરવામાં આર્કિટેક્ટનો `સાથ’ મળી રહ્યાનું ધ્યાન પર આવતાં હવે આર્કિટેક્ટસ સામે કાર્યવાહી કરવા માટે શસ્ત્ર સજાવી લેવામાં આવ્યા છે. મહાપાલિકાએ એક આર્કિટેક્ટનું લાયસન્સ રદ્દ કર્યું છે જ્યારે 19 હજુ `રડાર’માં હોવાનું અને તેમને નોટિસ ફટકારી જવાબ માંગવામાં આવ્યો હોવાનું જાણવા મળી રહ્યું છે.

તાજેતરમાં જ જનરલ બોર્ડમાં ટાઉન પ્લાનિંગ શાખાએ લેખિતમાં જવાબ આપ્યો હતો કે શહેરમાં 1430 ગેરકાયદે બાંધકામ એવા છે જેમને 260(2) મતલબ કે દબાણ ગેરકાયદેસર હોવાનું ઠરાવી તોડી પાડવાની નોટિસ અપાઈ છે પરંતુ આ 1430માંથી માત્ર 38 દબાણ જ તોડવામાં આવ્યાનું જણાવતાં વિભાગમાં કેવા પ્રકારની લાલિયાવાડી ચાલે છે તે પણ સામે આવી ગયું હતું.

આ પણ વાંચો :પતિ જ નીકળ્યો હત્યારો! રાજકોટના ભગવતીપરામાં થયેલી હત્યાનો ભેદ ઉકેલાયો,ઘરકાંકાસથી કંટાળેલા પતિએ પત્નીને પતાવી દીધી

તંત્ર દ્વારા એવો એકરાર પણ કરવામાં આવ્યો કે ગેરકાયદેસર બાંધકામ કરવામાં આર્કિટેક્ટનો સાથ મળી રહ્યાનું ધ્યાન પર આવતા વિપુલ કાસમપરા નામના આર્કિટેક્ટનું લાયસન્સ રદ્દ કરાયું છે જ્યારે 19 આર્કિટેક્ટને નોટિસ આપી જવાબ માંગવામાં આવ્યો છે. જો જવાબ સંતોષકારક નહીં જણાય તો લાયસન્સ રદ્દ કરવા સહિતની કાર્યવાહી કરવામાં આવશે. એકંદરે હવે ગેરકાયદેસર બાંધકામમાં મદદ કરનાર આર્કિટેક્ટનું લાયસન્સ રદ્દ કરવા સહિતનું હથિયાર તંત્રએ સજાવી લીધું છે.