મકાન માલિક મન ફાવે ત્યારે ભાડૂઆતને કાઢી નહીં શકે : સરકારે ન્યૂ રેન્ટ એગ્રિમેન્ટ-2025 હેઠળ નવા નિયમ કર્યા લાગુ
દેશમાં મકાન માલિક અને ભાડૂઆત વચ્ચેના વિવાદની સંખ્યા વધી રહી છે ત્યારે કેન્દ્ર સરકારે ન્યૂ રેન્ટ એગ્રિમેન્ટ-૨૦૨૫ હેઠળ નવા નિયમ લાગુ કર્યા છે જે મોડલ ટીનેન્સી એક્ટ અને વર્તમાન બજેટની જોગવાઈઓ પર આધારિત છે. આ નવા નિયમ હેઠળ મકાન માલિકો તેમજ ભાડૂઆતોને કેટલીક રાહતો પણ અપાઈ છે અને કેટલાક સખ્ત નિયમો પણ લાગુ કરવામાં આવ્યા છે.
નવા નિયમ મુજબ હવે પ્રોપર્ટી માટે મકાન માલિક વધુમાં વધુ બે મહિનાના ભાડા જેટલી જ સિક્યુરિટી ડિપોઝીટ લઈ શકશે અને તેનાથી વધુ માગ શકશે નહીં. આ રહેણાંક પ્રોપર્ટી માટેનો નિયમ છે. જ્યારે કોમર્શિયલ પ્રોપર્ટી માટેની સીમા છ મહિનાની રાખવામાં આવી છે.
એ જ રીતે હવે કોઈપણ મકાન માલિક ઉચિત નોટિસ દીધા વગર અથવા કાનૂની પ્રક્રિયાનું પાલન કર્યા વગર કોઈપણ ભાડૂઆતને ઘરમાંથી કાઢી મુકવાના પગલાં લઈ શકશે નહીં કે ઘર ખાલી કરવાનું કહી શકશે નહીં. એ જ રીતે મકાન માલિકો પોતાની મરજી પ્રમાણે ભાડામાં વધારો કરી શકશે નહીં. ભાડામાં વધારો કરવા માટે પહેલાંથી નોટિસ આપવી અનિવાર્ય કરી દેવાઈ છે. વધારો પણ બેફામ નહીં કરી શકે. એગ્રિમેન્ટની શરતો મુજબ જ થશે.
મકાન માલિકોને પણ ફાયદો
મકાન માલિકોને પણ રાહત આપવામાં આવી છે. એમના માટે ટીડીએસ કાપની સીમા જે પહેલાં ૨.૪ લાખ રૂપિયા વાર્ષિક હતી તેને વધારીને રૂા.૬ લાખ કરવામાં આવી છે. આનો અર્થ એ છે કે વધુ કમાણી કરશે તો પણ ટીડીએસ નહીં કપાય એટલે મકાન માલિકોને ફાયદો રહેશે.
અદાલતોમાં કેસનો ભરાવો નહીં
મકાન માલિક અને ભાડૂઆત વચ્ચેના વિવાદના કેસ દેશમાં ખુબ જ વધી રહ્યા છે અને વર્ષો સુધી ચાલે છે માટે હવે તેના સમાધાન માટે સ્પેશિયલ રેન્ટ કોર્ટ અને ટ્રિબ્યુનલ બનાવવામાં આવ્યા છે. અહીં કોઈપણ વિવાદનું સમાધાન ૬૦ દિવસની અંદર કરવાનું રહેશે. જો કોઈ ભાડૂઆત સતત ત્રણ મહિના સુધી મકાન માલિકને ભાડૂ ન આપે તો રેન્ટ ટ્રિબ્યુનલ દ્વારા મકાન માલિકને તુરંત ન્યાય મળશે અને ભાડૂઆતને કાઢવા માટેની પ્રક્રિયા સરળ બનશે.
