ઈસરો અત્યાર સુધીનો સૌથી ભારે ઉપગ્રહ આજે કરશે લોન્ચ : જાણો શા માટે કોમ્યુનિકેશન સેટેલાઇટ CMS-03 છે ખાસ?
ભારતીય અવકાશ એજન્સી ઈસરો રવિવારે વજનમાં અત્યાર સુધીનો સૌથી ભારે એટલે કે 4,410 કિલોગ્રામનો ઉપગ્રહ, CMS-03 લોન્ચ કરશે. આ ઉપગ્રહને ઈસરોના શક્તિશાળી LVM3-M5 રોકેટનો ઉપયોગ કરીને પૃથ્વીના જીઓસિંક્રોનસ ટ્રાન્સફર ઓર્બિટમાં મૂકવામાં આવશે. આ કોમ્યુનિકેશન સેટેલાઇટ ભારતના ઉચ્ચ-ક્ષમતાવાળા અવકાશ સંદેશાવ્યવહારને નવી દિશા પ્રદાન કરશે અને દરિયાઇ વિસ્તારોમાં ડિજિટલ કવરેજ અને સંચાર સેવાઓને મજબૂત બનાવશે.
આ ઉપગ્રહ આંધ્રપ્રદેશના શ્રીહરિકોટાથી લોન્ચ કરવામાં આવશે. ઈસરોએ જણાવ્યું હતું કે ઉપગ્રહને લોન્ચ રોકેટ સાથે ગોઠવી દેવામાં આવ્યો છે અને લોન્ચ પેડ પર મૂકવામાં આવ્યો છે, અને લોન્ચ માટે કાઉન્ટડાઉન શરૂ થઈ ગયું છે. લોન્ચ 2 નવેમ્બરના રોજ સાંજે 5:26 વાગ્યે થવાનું છે. LMV3 રોકેટ, જે ઉપગ્રહને લોન્ચ કરશે, તે ઈસરોનું સૌથી શક્તિશાળી રોકેટ છે.
આ પણ વાંચો : ઓક્ટોબરમાં ભર ચોમાસાનો અનુભવ: 44% વધુ વરસાદ, 20 વર્ષ જુનો રેકોર્ડ તુટ્યો, 20 રાજ્યોમાં અનરાધાર
આ રોકેટ 4,000 કિલોગ્રામ વજનના પેલોડ્સને અવકાશમાં લોન્ચ કરી શકે છે. ઈસરોએ અગાઉ 5 ડિસેમ્બર, 2018 ના રોજ પોતાનો સૌથી ભારે ઉપગ્રહ, જીસેટ-11 લોન્ચ કર્યો હતો, પરંતુ તે લોન્ચ ભારતમાંથી નહીં પરંતુ ફ્રેન્ચ ગુયાનાના કૌરો લોન્ચ બેઝથી થયું હતું. જીસેટ -11 નું વજન 5854 કિલોગ્રામ હતું. હવે, ઈસરો ભારતીય ભૂમિ પરથી પોતાનો સૌથી ભારે ઉપગ્રહ લોન્ચ કરવા માટે તૈયાર છે.
