શાકભાજી ખરીદવા જવું જોખમી? રાજકોટમાં સહકારનગર મેઈન રોડ પર મહિલાના પર્સમાંથી મોબાઈલ ચોરાઈ ગયો

રાજકોટમાં હવે શાકભાજી ખરીદવા જવું પણ જોખમી બની ગયું હોય તેવી રીતે ચોરીઓ થવા લાગી છે. સહકારનગર મેઈન રોડ પર શેરી નં.2માં રહેતા મહિલા પુત્રી સાથે બકાલું ખરીદવા ગયા ત્યારે હુડકો શાક માર્કેટમાંથી ખરીદી કરી રહ્યા હતા ત્યારે પર્સમાં રાખેલો મોબાઈલ ચોરી થઈ જતાં દોડધામ થઈ પડી હતી.

આ અંગે પુજાબેન કેતનભાઈ ટાંકે ફરિયાદમાં જણાવ્યું કે તેઓ 10.15 વાગ્યા આસપાસ પુત્રી સાથે સ્કૂટર લઈને શાકભાજીની ખરીદી કરવા માટે હુડકો શાક માર્કેટમાં શાકભાજી ખરીદવા માટે ગયા હતા. શાક માર્કેટવાળી શેરીમાં ખરીદી કરી રહ્યા હતા ત્યારે પર્સમાં જોતા મોબાઈલ જોવા મળ્યો ન્હોતો. એકંદરે કોઈએ પર્સની ચેઈન ખોલી તેમાંથી પંદર હજારની કિંમતનો મોબાઈલ કાઢી લેતા પોલીસ ફરિયાદ નોંધાવી હતી.

આ પણ વાંચો :પ્રેમીએ વીડિયો વાયરલ કરવાનું કહી બ્લેકમેલ કરતાં યુવતીએ કર્યો આપઘાત : માતાના જીવનનો સહારો ચાલ્યો જતા પરિવારમાં ગમગીની છવાઈ

રુ.10 હજારની ઉઘરાણીમાં યુવકનું અપહરણ કરી ઢોરમાર માર્યો

રાજકોટના મોરબી રોડ પર આશાપુરા પાર્કમાં રહેતા યુવકનું માત્ર દસ હજારની ઉઘરાણીમાં અપહરણ કરી ઢોર માર મારવામાં આવ્યાની ફરિયાદ છેક 25 દિવસે પોલીસ દ્વારા નોંધવામાં આવતા ચકચાર મચી જવા પામી હતી.

આ અંગે વિજય નાગદાનભાઈ કુંભરવાડિયાએ ફરિયાદમાં જણાવ્યું કે ગત 30 ઓગસ્ટે તે રાત્રે 12 વાગ્યા આસપાસ પિતરાઈ ભાઈ સાથે મોરબી રોડ ગીરીરાજ પાર્ટી પ્લોટ પાસેથી જકાતનાકા તરફ જઈ રહ્યો હતો ત્યારે એક્ટિવા લઈને રાજન હસુભાઈ બાબરિયા ધસી આવ્યો હતો અને મારા પિતા તારી પાસે કેટલા પૈસા માંગે છે કહેતા મેં તેને કહ્યું હતું કે મારે દસ હજાર આપવાના છે. આ પૈસા પાંચ વર્ષ પહેલાં વિજય મંડળ ચલાવતો હતો તેના હિસાબ પેટે આપવાના હતા. જો કે રાજને તાત્કાલિક પૈસા જોઈશે તેમ કહી વિજયને ધરાર ગાડીમાં બેસાડી દઈને લઈ ગયો હતો. ત્યારબાદ તેના પર કોઈનો ફોન આવ્યો હતો જેમાં રાજને કહ્યું હતું કે વિજય ઉર્ફે મુન્નાને ઉપાડી લીધો છે અને તું બેડી ચોકડીએ આવી જાય તેવું કહ્યું હતું.

આ પણ વાંચો :લગ્ન પછી હિન્દુ મહિલાનું ગોત્ર બદલાય એટલે સંપત્તિ પતિના વારસદારોને જ મળે : હિન્દુ સક્સેસન એક્ટમાં સુપ્રીમ કોર્ટનું મહત્વનું નિરીક્ષણ

આ પછી રાજનનો નાનો ભાઈ દેવ તેમજ અન્ય એક શખસ ત્યાં ધસી આવ્યો હતો અને માર મારવા લાગ્યો હતો. રાજન અને તેનો ભાઈ એક ગેરેજમાં લઈ ગયા હતા જ્યાં પણ માર માર્યો હતો. માર માર્યા બાદ બહાર કાઢતાં બન્નેએ ઘેર મુકી જવા માટે કહ્યું હતું પરંતુ વિજયે ઈનકાર કરતા તેને ફરી ગાળ આપી ધરાર સ્કૂટર ઉપર બેસાડીને ગીરીરાજ પાર્ટી પ્લોટ પાસે ઉતારી બન્ને ફરાર થઈ ગયા હતા. બી-ડિવિઝન પોલીસે રાજન હસુભાઈ બાબરિયા સામે ગુનો દાખલ કર્યો હતો.