ફરી સમુદ્રમાં ભારતના નૌકા દળની મર્દાનગી ? વાંચો
ક્યાં મદદે પહોંચ્યા શૂરવીરો ?
એડનના અખાતમાં વેપારી જહાજો પર હુમલા કોઈ નવી વાત નથી. ચાંચિયાઓએ ઘણીવાર આ જહાજોને નિશાન બનાવ્યા છે. દરિયામાં જહાજો પર હુમલાની વધતી સંખ્યા વિશ્વભરના દેશો માટે ચિંતાનો વિષય બની ગઈ છે. છેલ્લા કેટલાક દિવસોમાં ભારતીય નૌકાદળે અનેક ઓપરેશનમાં વેપારી જહાજોને ચાંચિયાઓથી બચાવ્યા છે. એડનની ખાડીમાં ફરી એકવાર વેપારી જહાજ પર શંકાસ્પદ ડ્રોન દ્વારા હુમલો કરવામાં આવ્યો હતો, જે દરમિયાન એક ભારતીય યુદ્ધ જહાજે જહાજને મદદ કરી હતી. ભારતીય નૌકાદળ ચાંચિયાઓના હુમલા વચ્ચે સતત મદદ કરી રહ્યું છે.
શનિવારે આ મામલાની માહિતી આપતા ભારતીય સૈન્ય અધિકારીઓએ જણાવ્યું કે, પલાઉના ધ્વજવાળા જહાજ એમવી આઈલેન્ડર પર ગુરુવારે હુમલો કરવામાં આવ્યો હતો. આ દરમિયાન જહાજના ક્રૂનો એક સભ્ય ઘાયલ થયો હતો. તેમણે કહ્યું કે નૌકાદળની એક ટીમ જહાજ પર ચઢી અને ત્યાં હાજર ક્રૂને બચાવી લીધા. આ તાજેતરની ઘટના લાલ સમુદ્રમાં અનેક વેપારી જહાજો પર હુથી બળવાખોરો દ્વારા હુમલા અંગે વધતી વૈશ્વિક ચિંતા વચ્ચે આવી છે. એમવી આઇલેન્ડર પર સવાર ભારતીય નૌકાદળની એક તબીબી ટીમે ઇજાગ્રસ્ત ક્રૂ મેમ્બરને તબીબી સહાય પૂરી પાડી હતી, એમ તેમણે જણાવ્યું હતું.
ઘટનાની વિગતો આપતા અધિકારીએ જણાવ્યું હતું કે જહાજમાંથી ઇમરજન્સી કોલ આવ્યો હતો, જેના જવાબમાં ભારતીય નૌકાદળોએ કાર્ગો જહાજને બહાદુરથી બચાવી લીધું હતું. ભારતીય નૌકાદળના પ્રવક્તા કમાન્ડર વિવેક માધવાલે જણાવ્યું હતું કે ભારતીય નૌકાદળના જહાજોના પ્રયાસો વેપારી જહાજો અને નાવિકોની સુરક્ષા અને સલામતી પ્રત્યે ભારતીય નૌકાદળની મજબૂત પ્રતિબદ્ધતાને પુનઃપુષ્ટ કરે છે. છેલ્લા કેટલાક અઠવાડિયામાં, ભારતીય નૌકાદળે પશ્ચિમ હિંદ મહાસાગરમાં હુમલા બાદ અનેક વેપારી જહાજોને મદદ પૂરી પાડી છે.
