આજે પોતાની 250મી T-20 મેચ રમવા ઉતરશે ભારત : ઓમાન સામે અબૂ ધાબીમાં રમશે, ટીમ ઈન્ડિયા માટે આજની મેચ છે ખાસ
એશિયા કપ-2025માં ટીમ ઈન્ડિયાનું પ્રદર્શન શાનદાર રહ્યું છે. યૂએઈ અને પાકિસ્તાનને હરાવી ટીમ સુપર-4માં પહોંચી છે. હવે આજે ભારતીય ટીમ પોતાની અંતિમ ગ્રુપ મેચ ઓમાન વિરુદ્ધ રમશે. ઓમાન પહેલાંથી જ ટૂર્નામેન્ટમાંથી બહાર થઈ ગયું હોય આજની મેચ તેના માટે ઔપચારિક બની રહેશે.
ભારતે પોતાની બન્ને ગ્રુપ સ્ટેજ મેચ દુબઈ ક્રિકેટ સ્ટેડિયમ પર રમી હતી પરંતુ ઓમાન વિરુદ્ધ તે અબૂધાબીના શેખ જાયદ સ્ટેડિયમ પર ઉતરશે. આ મેચ રાત્રે આઠ વાગ્યાથી શરૂ થશે. ભારતીય ટીમ અબૂ ધાબી સ્ટેડિયમ પર દરેક મેચ જીતી છે. આ મેદાન ઉપર અત્યાર સુધી ટીમે એક જ ટી-20 મેચ રમી છે. આ મેચ 2021ના ટી-વર્લ્ડકપ દરમિયાન રમાઈ હતી. ત્યારે ટીમ ઈન્ડિયાનો સામનો અફઘાનિસ્તાન સામે થયો હતો જેમાં ભારત 66 રને જીત્યું હતું.
આ પણ વાંચો : રવિવારે ભારત-પાકિસ્તાન ફરી આમને-સામને : સુપર-4માં પણ હાથ નહીં મીલાવે ટીમ ઈન્ડિયા
ટીમ ઈન્ડિયા માટે આ મેચ એકદમ ખાસ રહેવાની છે. તે પોતાની 250મી ટી-20 આંતરરાષ્ટ્રીય મેચ રમવા ઉતરશે. તે પાકિસ્તાન બાદ 250 ટી-20 ઈન્ટરનેશનલ મેચ રમનારી બીજી ટીમ બનશે.
રવિવારે ભારત-પાકિસ્તાન ફરી આમને-સામને
પાકિસ્તાની ટીમે UAE સામે મેચ રમતા પહેલાં ભારે નાટક કર્યું હતું પરંતુ તેની પાવલી પણ ન ઉપજતાં નીચી મુંડી રાખીને રમવા ઉતરવું પડ્યું હતું. મેચમાં માંડ માંડ જીત મેળવી સુપર-4માં ટીમ પહોંચી તો ગઈ છે પરંતુ અહીં તેમનો સામનો ફરી `તાકાતવર’ ભારત સામે થવાનો છે. રવિવારે બન્ને વચ્ચે દુબઈના ગ્રાઉન્ડ ઉપર ફરી ટક્કર થશે.
એશિયા કપની આઠ ટીમને બે ગ્રુપમાં વહેંચવામાં આવી હતી. બન્ને ગ્રુપમાંથી ટોપ-2 ટીમને સુપર-4માં જગ્યા મળશે. ત્યાં તમામ ચાર ટીમ એક-બીજા સામે મુકાબલો કરશે. ભારતીય ટીમ સુપર-4ની પહેલી મેચમાં જ પાકિસ્તાન સામે રમશે. આ મેચ 21 સપ્ટેમ્બરને રવિવારે રાત્રે આઠ વાગ્યે દુબઈ ઈન્ટરનેશનલ ક્રિકેટ સ્ટેડિયમ પર રમાશે.
આ પહેલાં ભારત-પાકિસ્તાન વચ્ચે 14 સપ્ટેમ્બરે પણ મુકાબલો થયો હતો જેમાં ભારતે સાવ સરળતાથી સાત વિકેટે જીત મેળવી હતી. ટૂર્નામેન્ટનો ફાઈનલ મુકાબલો 28 સપ્ટેમ્બરે થશે અને તેમાં પણ ભારત-પાકિસ્તાન વચ્ચે મેચ રમાઈ શકે છે. સુપર-4માં ટોપ-2 પર રહેનારી ટીમ વચ્ચે એશિયા કપની ફાઈનલ મેચ રમાશે.
સુપર-4માં પણ હાથ નહીં મીલાવે ટીમ ઈન્ડિયા
એશિયા કપમાં ટોસ વખતે અને મેચ બાદ ભારતીય ટીમે હાથ ન મીલાવતા પાકિસ્તાને ભારે ઉધામો મચાવ્યો હતો પરંતુ તેનું કશું જ ઉપજ્યું ન્હોતું. હવે રવિવારે ફરી બન્ને મેચ રમવાના છે ત્યારે આ મેચમાં પણ ભારતીય ટીમ પાકિસ્તાની ખેલાડી સાથે હાથ મીલાવશે નહીં. બીજી બાજુ પાકિસ્તાન આ વાતને લઈને તૈયાર પણ થઈ ગયું છે.
