આજથી India vs England ટેસ્ટ સીરિઝનો થશે પ્રારંભ : શુભમન ગીલના નેતૃત્વની અગ્નિપરીક્ષા, શું ભારત 18 વર્ષનો રેકોર્ડ તોડશે?

ભારત-ઈંગ્લેન્ડ વચ્ચે આજથી પાંચ મેચની ટેસ્ટ સીરિઝનો પ્રારંભ થશે. ટીમ ઈન્ડિયા 18 વર્ષથી ઈંગ્લેન્ડના ઘરમાં ટેસ્ટ શ્રેણી જીતી શકી નથી ત્યારે નવોદિત કેપ્ટન શુભમન ગીલ પાસે ઈતિહાસ પલટવાની તક રહેશે સાથે સાથે તેના નેતૃત્વનું અગ્નિપરીક્ષા પણ થઈ જશે. હેડિંગ્લેના લીડસ ગ્રાઉન્ડ પર રમાનારી આ મેચ બપોરે 3ઃ30 વાગ્યાથી શરૂ થઈ રાત્રે 10ઃ30 વાગ્યા સુધી ચાલશે.

ભારતે ઈંગ્લેન્ડમાં છેલ્લે 2007માં ટેસ્ટ સીરિઝ પોતાના નામે કરી હતી. આ શ્રેણી રાહુલ દ્રવિડના વડપણ હેઠળ જીતવામાં આવી હતી. બન્ને દેશ વચ્ચે અત્યાર સુધી કુલ 136 મેચ રમાઈ છે જેમાંથી 51 ઈંગ્લેન્ડ તો 35 ભારતે જીત્યા છે. જ્યારે 50 ટેસ્ટ મેચ ડ્રો રહી છે. પ્રથમ ટેસ્ટ આજથી શરૂ થઈ 24 જૂન સુધી ચાલશે. ત્યારબાદ બીજી ટેસ્ટ 2થી 6 જૂલાઈ વચ્ચે એજબેસ્ટનમાં, 10થી 14 જૂલાઈ વચ્ચે લોર્ડસમાં, 23થી 27 જૂલાઈ વચ્ચે મેન્ચેસ્ટરના ઓલ્ડ ટ્રેફર્ડ ગ્રાઉન્ડ પર અને પાંચમી ટેસ્ટ લંડનના કેનિંગ્ટન ઓવલમાં રમાશે જે 31 જૂલાઈથી 4 ઓગસ્ટ સુધી ચાલશે.

ટીમ ઈન્ડિયા

શુભમન ગીલ (કેપ્ટન), અભિમન્યુ ઈશ્વરન, સાઈ સુદર્શન, યશસ્વી જયસ્વાલ, કરુણ નાયર, નીતિશ રેડ્ડી, રવિન્દ્ર જાડેજા, વોશિંગ્ટન સુંદર, શાર્દૂલ ઠાકુર, ઋષભ પંત, કે.એલ.રાહુલ, ધ્રુવ જુરેલ, મોહમ્મદ સિરાજ, જસપ્રીત બુમરાહ, પ્રસિદ્ધ કૃષ્ણા, આકાશદીપ, અર્શદીપ સિંહ, કુલદીપ યાદવ, હર્ષિત રાણા

આ પણ વાંચો : આફ્ટર શોક:રાજકોટથી એરટ્રાફિકમાં ‘ઓટ’! ભરચકક ફલાઇટો ‘ખાલીખમ્મ’

ઈંગ્લેન્ડની પ્લેઈંગ ઈલેવન જાહેર

બેન સ્ટોક્સ (કેપ્ટન), જૈક ક્રાઉલી, બેન ડકેટ, ઓલી પોપ, જો રુટ, હેરી બ્રુક, જેમી સ્મિથ (વિકેટકિપર), ક્રિસ વોક્સ, બ્રાઈડન કાર્સ, જોશ ટંગ, શોએબ બશીર

મેચ પહેલાં જ કરુણ નાયર ઈજાગ્રસ્ત

ભારત-ઈંગ્લેન્ડ વચ્ચે પહેલી ટેસ્ટ મેચ શરૂ થાય તે પહેલાં જ મજબૂત બેટર અને આઠ વર્ષ પછી ટીમમાં સ્થાન મેળવનારો કરુણ નાયર ઈજાગ્રસ્ત થઈ ગયો હતો. કરુણ નેટમાં પ્રેક્ટિસ કરી રહ્યો હતો તે સમયે ફાસ્ટ બોલર પ્રસિદ્ધ કૃષ્ણાનો બોલ તેની પાંસળી ઉપર વાગ્યો હતો. હાલ બોર્ડ દ્વારા કરુણની ઈજા કેટલી ગંભીર છે તે અંગે કોઈ સ્પષ્ટતા કરવામાં આવી નથી પરંતુ જો તેની ઈજા ગંભીર હશે તો ટીમ માટે મોટો ઝટકો ગણાશે.