ભારતે ત્રીજુ નેત્ર ખોલ્યુ અને પાકિસ્તાને BSFના જવાનને પાછો મોકલવો પડ્યો : જાણો કેવી રીતે પૂર્ણમ કુમાર શૉ પહોંચ્યો’તો પાકિસ્તાન?

ભારતની કડકાઇ બાદ પાકિસ્તાને ભારતના BSF જવાન પૂર્ણમ કુમાર શૉને પરત કર્યો છે. છેલ્લા વીસ દિવસથી પાકિસ્તાનની કસ્ટડીમાં રહેલા BSF જવાનને પાકિસ્તાની રેન્જર્સે અટારી વાઘા બોર્ડર દ્વારા પરત મોકલી દીધો છે. કોન્સ્ટેબલ પૂર્ણમ કુમાર સવારે 10:30 વાગ્યે દેશમાં પરત ફર્યો .હાલ તેની પૂછપરછ કરવામાં આવી રહી છે.

પાકિસ્તાને ભારતના BSF જવાન પૂર્ણમ કુમાર શૉને પરત કર્યો

બોર્ડર સિક્યુરિટી ફોર્સ (BSF) ના જવાન પૂર્ણમ કુમાર શૉ 23 એપ્રિલ, 2025 થી પાકિસ્તાન રેન્જર્સની કસ્ટડીમાં હતા. આજે સવારે લગભગ 10:30 વાગ્યે, પાકિસ્તાને તેમને સુરક્ષિત રીતે ભારતને સોંપી દીધા. આ પ્રત્યાર્પણ અટારી, અમૃતસર ખાતે સંયુક્ત ચેકપોસ્ટ દ્વારા શાંતિપૂર્ણ રીતે પૂર્ણ થયું. તમને જણાવી દઈએ કે તે ભૂલથી આંતરરાષ્ટ્રીય સરહદ પાર કરીને પાકિસ્તાનમાં ઘૂસી ગયા બાદ પાકિસ્તાન રેન્જર્સે તેને કસ્ટડીમાં લઈ લીધો. ભારતે આ ઘટના અંગે તાત્કાલિક પાકિસ્તાન સાથે ઉચ્ચ સ્તરીય વાતચીત શરૂ કરી અને સૈનિકની સુરક્ષિત વાપસીની માંગ કરી.

બોર્ડર સિક્યુરિટી ફોર્સ પંજાબ ફ્રન્ટિયરે તેના સત્તાવાર નિવેદનમાં જણાવ્યું હતું કે, “BSF જવાન પૂર્ણમ કુમાર શોને આજે સવારે 10:30 વાગ્યે અટારી-વાઘા સંયુક્ત ચેકપોસ્ટ દ્વારા પાકિસ્તાન રેન્જર્સ દ્વારા ભારતને સોંપવામાં આવ્યા હતા. સોંપણી શાંતિપૂર્ણ રીતે અને નિર્ધારિત પ્રોટોકોલ અનુસાર કરવામાં આવી હતી.” આ સમયે તેમનો પરિવાર પણ હાજર હતો.

પૂર્ણમ કુમાર પાકિસ્તાન કેવી રીતે પહોંચ્યો?

પૂર્ણમ કુમાર ભૂલથી આંતરરાષ્ટ્રીય સરહદ પાર કરીને પાકિસ્તાન પહોંચી ગયો હતો, ત્યારબાદ તેને પાકિસ્તાન રેન્જર્સ દ્વારા કસ્ટડીમાં લેવામાં આવ્યો હતો. તેઓ પંજાબના ફિરોઝપુર સેક્ટરમાં પોસ્ટેડ હતા. ભારતે 7 મેના રોજ ‘ઓપરેશન સિંદૂર’ હેઠળ આતંકવાદીઓના ઠેકાણાઓ પર સચોટ હુમલા કર્યા. પાકિસ્તાને પણ વળતો જવાબ આપ્યો, જેનાથી તણાવ વધ્યો. આવી સ્થિતિમાં પૂર્ણમના પરિવારની ચિંતા વધુ વધી ગઈ હતી.

પત્નીને આશા હતી કે…

પૂર્ણમ કુમારના પત્ની રજનીએ આશા વ્યક્ત કરી હતી કે ડીજીએમઓ સાથેની વાતચીતમાં પૂર્ણમ કુમારનો મુદ્દો ઉઠાવવામાં આવશે. તેણીએ કહ્યું હતું કે, ‘જ્યારે ભારતીય સેનાએ 3 મેના રોજ રાજસ્થાનમાં એક પાકિસ્તાની રેન્જરની અટકાયત કરી હતી, ત્યારે એવું લાગતું હતું કે કદાચ મારા પતિને પણ મુક્ત કરવામાં આવશે.’ પણ આવું ન થયું. હવે ડીજીએમઓ વાટાઘાટોથી નવી આશા જાગી છે

રજનીએ એમ પણ કહ્યું કે પશ્ચિમ બંગાળના મુખ્યમંત્રી મમતા બેનર્જીએ રવિવારે તેમને ફોન કર્યો હતો અને શક્ય તમામ મદદનું આશ્વાસન આપ્યું હતું. મુખ્યમંત્રીએ તેમના સાસરિયાઓ માટે તબીબી સહાય વિશે પણ વાત કરી.

પહલગામ આતંકવાદી હુમલો અને ઓપરેશન સિંદૂર

22 એપ્રિલ 2025ના રોજ, પાકિસ્તાન સમર્થિત આતંકવાદીઓએ પહલગામમાં પ્રવાસીઓ અને નાગરિકો પર હુમલો કર્યો, જે 26/11ના મુંબઈ હુમલા પછી ભારતમાં થયેલા સૌથી ઘાતક આતંકવાદી હુમલાઓમાંનો એક માનવામાં આવતો હતો. આ હુમલાએ ભારતની શૂન્ય સહિષ્ણુતાની નીતિને વધુ મજબૂત બનાવી.

જવાબમાં, ભારતે 7 મેના રોજ ઓપરેશન સિંદૂર શરૂ કર્યું, જેમાં ભારતીય વાયુસેના, સેના અને નૌકાદળે પાકિસ્તાન અને પીઓકેમાં આતંકવાદી છાવણીઓનું સંકલન કરીને નાશ કર્યો. આ કાર્યવાહીથી માત્ર આતંકવાદી માળખાનો નાશ થયો જ નહીં, પરંતુ પાકિસ્તાનને સ્પષ્ટ સંદેશ પણ મળ્યો કે ભારત કોઈપણ આતંકવાદી પ્રવૃત્તિને સહન કરશે નહીં.

આ કાર્યવાહી બાદ, પાકિસ્તાને 7-8 મેની રાત્રે શ્રીનગર, જમ્મુ, પઠાણકોટ અને અમૃતસરમાં 15 ભારતીય લશ્કરી ઠેકાણાઓ પર ડ્રોન અને મિસાઇલ હુમલા કર્યા. જોકે, ભારતીય નૌકાદળ, વાયુસેના અને સેનાના સંકલિત પ્રયાસોએ આ હુમલાઓને સંપૂર્ણપણે નિષ્ફળ બનાવ્યા. ભારતીય નૌકાદળે દરિયાઈ ક્ષેત્રમાં પાકિસ્તાની હવાઈ તત્વોને બેઅસર કરવા માટે તેના કેરિયર બેટલ ગ્રુપ અને અદ્યતન હવાઈ સંરક્ષણ પ્રણાલીઓનો ઉપયોગ કર્યો.