એશિયન ગેમ્સ: મહિલા ક્રિકેટમાં શ્રીલંકાને હરાવી ભારતે જીત્યો ‘ગોલ્ડ’

ફાઇનલમાં ભારતે આપેલા 117 રનના ટાર્ગેટ સામે લંકાની ટીમ 20 ઓવરમાં માત્ર 97 રન જ બનાવી શકી: ભારત તરફથી સ્મૃતિ મંધાનાએ સર્વાધિક 46 રન જ્યારે તિતાસ સાધુએ 3 વિકેટ ઝડપી

ભારતીય મહિલા ક્રિકેટ ટીમે 19મી એશિયન ગેમ્સમાં ગોલ્ડ જીતીને એતિહાસ રચી દીધો છે. સોમવારે પિંગફેસ કેમ્પસ ક્રિકેટ ગ્રાઉન્ડ હાંગઝોઉ ખાતે રમાયેલી ફાઇનલ મેચમાં ભારતીય ટીમે શ્રીલંકાને 19 રને હરાવ્યું હતું.

ભારતીય મહિલા ટીમે ટોસ જીતીને પ્રથમ બેટિંગ કરવા મેદાનમાં ઉતરી હતી. જેમાં 20 ઓવરમાં ભારતે 7 વિકેટના ભોગે 116 રન બનાવી શ્રીલંકાને 117 રનનો ટાર્ગેટ આપ્યો હતો. જવાબમાં દાવમાં ઉતરેલી શ્રીલંકાની ટીમ 20 ઓવરમાં 8 વિકેટ ગુમાવીને માત્ર 97 રન જ બનાવી શકી હતી. ભારત તરફથી સ્મૃતિ મંધાનાએ સૌથી વધુ 45 બોલમાં 46 રન જ્યારે જેમીમાહ રોદ્રીગ્સે 40 બોલમાં 42 રન બનાવ્યા હતા. શ્રીલંકા તરફથી ઈનોકા રણવિરા, સુગંધિકા કુમારી અને ઉદેશિકા પ્રબોધિની 2-2 વિકેટ ઝડપી હતી.

ભારતે આપેલા ટાર્ગેટને ચેઝ કરવા ઉતરેલી શ્રીલંકાની ટીમ 20 ઓવરમાં 8 વિકેટ ગુમાવી માત્ર 97 રન જ કરી શકી હતી. શ્રીલંકા તરફથી હસીની પરેરાએ સર્વાધિક 22 બોલમાં 25 રનની ઇનિંગ રમી હતી. જ્યારે ભારત તરફથી તિતાસ સાધુએ 4 ઓવરમાં માત્ર 6 રન આપી સૌથી વધુ 3 વિકેટ ઝડપી હતી. જ્યારે રાજેશ્વરી ગાયકવાડે 2 અને દિપ્તી શર્મા, પુજા વસ્ત્રાકર અને દેવિકા વૈદ્યએ 1-1 વિકેટ ઝડપી હતી. મહત્વનું છે કે, એશિયન ગેમ્સ મહિલા ક્રિકેટમાં ભારતે સિદ્ધિ ક્વાટર ફાઇનલમાં જગ્યા બનાવી હતી. પ્રથમ મેચ મલેશિયા સામે હતી જે વરસાદને કારણે પૂર્ણ થઈ શકી નહતી. બાદમાં ભારતે સેમિફાઇનલમાં બાંગ્લાદેશને 8 વિકેટે હરાવ્યું હતું. જ્યારે ફાઇનલમાં શ્રીલંકાને હરાવીને ગોલ્ડ મેડલ પોતાના નામે અંકિત કર્યો હતો.