IND vs AUS : ટીમ ઈન્ડિયા પરથી ફોલોઓનનો ખતરો ટળ્યો !! બુમરાહ-આકાશે કરી કમાલ, ગાબા ટેસ્ટ ડ્રો તરફ

ભારત અને ઓસ્ટ્રેલિયા વચ્ચે બ્રિસ્બેનમાં રમાઈ રહેલી ટેસ્ટ હવે ડ્રો તરફ આગળ વધી રહી છે. ટીમ ઈન્ડિયા ત્રીજા દિવસ સુધી મેચમાં પાછળ હતી, પરંતુ ચોથા દિવસે કેએલ રાહુલ અને રવિન્દ્ર જાડેજાની અડધી સદીની મદદથી ભારતે મેચમાં વાપસી કરી હતી. જાડેજાના આઉટ થયા બાદ એવું લાગી રહ્યું હતું કે ટીમ ઈન્ડિયા ફોલોઓન બચાવી શકશે નહીં, પરંતુ 9 વિકેટ પડી ગયા બાદ આકાશ દીપ અને જસપ્રિત બુમરાહે આક્રમક વલણ અપનાવ્યું અને ફોલોઓન બચાવ્યું. ભારતે 246 રન બનાવ્યા કે તરત જ ડ્રેસિંગ રૂમમાં આનંદ છવાઈ ગયો. વિરાટ કોહલી, કેપ્ટન રોહિત શર્મા અને મુખ્ય કોચ ગૌતમ ગંભીર ઉજવણી કરતા જોવા મળ્યા હતા.

ભારત ફોલોઓનથી કેવી રીતે બચ્યું ?

જ્યાં સુધી રવિન્દ્ર જાડેજા રમી રહ્યો હતો ત્યાં સુધી ભારતીય ચાહકોને આશા હતી કે ટીમ ઈન્ડિયા ઓછામાં ઓછું 246 રન બનાવીને ફોલોઓન બચાવશે, પરંતુ તે પેટ કમિન્સના બોલ પર 77ના અંગત સ્કોર પર આઉટ થઈ ગયો હતો અને એવું લાગી રહ્યું હતું કે બ્રિસ્બેનમાં ભારતીય ટીમનું સન્માન પણ બચશે નહીં. પણ ખરો ડ્રામા આ પછી થયો. જ્યારે જાડેજા આઉટ થયો ત્યારે ભારતનો સ્કોર 213 હતો. ફોલોઓન બચાવવા માટે હજુ 33 રનની જરૂર હતી. મેદાન પર ટીમ ઈન્ડિયાની છેલ્લી જોડી જસપ્રીત બુમરાહ અને આકાશ દીપ હતી.

ભારતે ફોલોઓન બચાવ્યું, બુમરાહ-આકાશ દીપ નોટઆઉટ

ભારતીય ટીમે ફોલોઓન બચાવી લીધું છે. જસપ્રિત બુમરાહ અને આકાશ દીપની જોડીએ છેલ્લી વિકેટ માટે અણનમ 39 રનની ભાગીદારી કરી હતી. હાલમાં ખરાબ લાઈટના કારણે મેચ રોકવામાં આવી છે.

ડ્રેસિંગ રૂમમાં બીજા ખેલડીઓના રીએક્શન  

આકાશ દીપે ફોર ફટકારીને ફોલોઓન બચાવતા જ કેમેરાનું ફોકસ ટીમ ઈન્ડિયાના ડ્રેસિંગ રૂમ તરફ ગયું. અત્યાર સુધી ટેન્શનમાં દેખાતા ચહેરાઓ અચાનક ખુશ દેખાતા હતા. વિરાટ કોહલી, કેપ્ટન રોહિત શર્મા અને મુખ્ય કોચ ગૌતમ ગંભીરે એકબીજાને ગળે લગાવીને રાહતનો શ્વાસ લીધો. ડ્રેસિંગ રૂમમાં હાજર તમામ ખેલાડીઓએ આકાશ દીપ અને જસપ્રિત બુમરાહ માટે તાળીઓ પાડી હતી.

બ્રિસ્બેન ટેસ્ટ ડ્રો તરફ આગળ વધી હતી

બ્રિસ્બેનમાં ભારત સામે ચાલી રહેલી ટેસ્ટમાં ઓસ્ટ્રેલિયાની ટીમ હજુ પણ મજબૂત સ્થિતિમાં છે, પરંતુ વરસાદને કારણે હવે રમત ડ્રો તરફ આગળ વધી રહી છે. જો ટીમ ઈન્ડિયા ફોલોઓન બચાવી શકી ન હોત તો મુશ્કેલ થઈ શકે તેમ હતું. ઓસ્ટ્રેલિયાએ પ્રથમ દાવમાં 445 રન બનાવ્યા હતા. જવાબમાં ભારતે 9 વિકેટના નુકસાન પર 252 રન બનાવી લીધા છે.

બન્ને ટીમની પ્લેઇંગ-11

ભારત (IND): રોહિત શર્મા (કેપ્ટન), યશસ્વી જયસ્વાલ, કેએલ રાહુલ, શુભમન ગિલ, વિરાટ કોહલી, રિષભ પંત (વિકેટકીપર), નીતિશ કુમાર રેડ્ડી, રવીન્દ્ર જાડેજા, આકાશ દીપ, જસપ્રીત બુમરાહ (વાઇસ-કેપ્ટન) અને મોહમ્મદ સિરાજ.

ઓસ્ટ્રેલિયા (AUS): પેટ કમિન્સ (કેપ્ટન), નાથન મેકસ્વીની, ઉસ્માન ખ્વાજા, માર્નસ લાબુશેન, સ્ટીવ સ્મિથ, ટ્રેવિસ હેડ, મિચેલ માર્શ, એલેક્સ કેરી (વિકેટકીપર), મિચેલ સ્ટાર્ક, નાથન લાયન અને જોશ હેઝલવુડ.