5 વર્ષમાં 2 વન-ડે, 2 ટી-20 વર્લ્ડકપ, એક ચેમ્પિયન્સ ટ્રોફી, 3 WTC ફાઈનલ રમાશે: ભારતને પણ મળશે વર્લ્ડકપ-ચેમ્પિયન્સ ટ્રોફીનું યજમાનપદ
ટી-20 વર્લ્ડકપ-2026 પૂર્ણ થતાં જ હવે આગામી આઈસીસી ટૂર્નામેન્ટની રાહમાં ક્રિકેટરસિકો બેસી ગયા છે. આગામી પાંચ વર્ષની અંદર આઠ આઈસીસી ટ્રોફી રમાવાની છે. સૌથી પહેલાં જૂન-2027 માં વર્લ્ડ ટેસ્ટ ચેમ્પિયનશિપનો ફાઈનલ મુકાબલો રમાશે અને ત્યારબાદ વન-ડે વર્લ્ડકપ આવશે.
ટી-20 વર્લ્ડકપ-2026 બાદ 2031 ના અંત સુધીમાં કુલ આઠ આઈસીસી ટૂર્નામેન્ટ રમાવાની છે. પાંચ ટૂર્નામેન્ટ વ્હાઈટ બોલ ક્રિકેટ છે જ્યારે ત્રણ ટ્રોફી રેડ બોલ ક્રિકેટની રમાશે. પાંચ વર્ષમાં બે વન-ડે વર્લ્ડકપ, બે ટી-20 વર્લ્ડકપ અને એક ચેમ્પિયન્સ ટ્રોફી તેમજ ત્રણ ડબલ્યુટીસી (વર્લ્ડ ટેસ્ટ ચેમ્પિયનશિપ) ફાઈનલ પણ રમાશે.
જૂન-2027 થી ઈંગ્લેન્ડમાં વર્લ્ડ ટેસ્ટ ચેમ્પિયનશિપનો ફાઈનલ જોવા મળશે. સળંગ ત્રણ વખત ઈંગ્લેન્ડમાં ફાઈનલ રમાયા બાદ હજુ આવનારા વર્ષોમાં ઈંગ્લેન્ડને જ આ ફાઈનલનું યજમાન મળશે. બે વર્ષ સુધી ચાલનારી આ ટૂર્નામેન્ટનો ફાઈનલ જૂન-2027 માં રમાશે.
આ ઉપરાંત ઑક્ટોબર-નવેમ્બર-2027 માં વન-ડે વર્લ્ડકપ પણ રમાશે. આ વર્લ્ડકપ ઝીમ્બાબ્વે, નામીબિયા અને સાઉથ આફ્રિકાની સંયુક્ત યજમાનીમાં રમાશે. હવે ટી-20 વર્લ્ડકપ 2028 માં ઑસ્ટ્રેલિયા અને ન્યુઝીલેન્ડ મળીને આયોજિત કરશે જે જાન્યુઆરી-ફેબ્રુઆરી-2028 માં રમાશે. 2028 માં જ ઓલિમ્પિક પણ રમાશે જેમાં ક્રિકેટની રમતને સામેલ કરવામાં આવી છે.
2029 માં ચેમ્પિયન્સ ટ્રોફી રમાશે જેનું યજમાન ભારત છે. આ ટૂર્નામેન્ટમાં પાકિસ્તાન ભારત નહીં આવે તો તેની મેચ શ્રીલંકા અથવા પાકિસ્તાનમાં આયોજિત કરવામાં આવી શકે છે. આ ટૂર્નામેન્ટ જાન્યુઆરીથી માર્ચ અથવા ઑક્ટોબરથી નવેમ્બર વચ્ચે રમાઈ શકે છે. એ જ વર્ષે વર્લ્ડ ટેસ્ટ ચેમ્પિયનશિપનો ફાઈનલ પણ રમાશે જે જૂન-2029 માં ઈંગ્લેન્ડમાં થશે.
2030 માં ઈંગ્લેન્ડ, આયર્લેન્ડ અને સ્કોટલેન્ડમાં પુરુષ ટી-20 વર્લ્ડકપ જૂન આસપાસ રમાશે. 2031 માં વન-ડે વર્લ્ડકપ રમાશે જેનું યજમાન ભારત અને બાંગ્લાદેશ રહેશે. આ ટૂર્નામેન્ટ ઑક્ટોબર-નવેમ્બરમાં રમાઈ શકે છે. એ જ વર્ષે વર્લ્ડ ટેસ્ટ ચેમ્પિયનશિપનો ફાઈનલ પણ જૂનમાં રમાશે.
