‘હા હું પાકિસ્તાની સેનાનો વિશ્વાસુ એજન્ટ હતો’ મુંબઈ 26/11ના આતંકી હુમલાના માસ્ટરમાઇન્ડ તહવ્વુર રાણાએ કર્યા મોટા ખુલાસા

26/11નો હુમલો જેણે આર્થિક રાજધાની મુંબઈને હચમચાવી દીધી હતી આ હુમલાના માસ્ટરમાઇન્ડ તહવ્વુર રાણાને ભારત લાવવામાં આવ્યો છે અને મુંબઈ ક્રાઈમ બ્રાન્ચ દ્વારા પૂછપરછ કરવામાં આવી રહી છે ત્યારે તેણે પોલીસ સમક્ષ કેટલાક વિસ્ફોટક ખુલાસા કર્યા હતા, જેમાં તેમણે કહ્યું હતું કે તે પાકિસ્તાની સેનાનો વિશ્વાસુ એજન્ટ હતો અને 2008ના હુમલા દરમિયાન મુંબઈમાં હતો. રાણાએ એ પણ સ્વીકાર્યું હતું કે તેના મિત્ર અને સાથીદાર ડેવિડ હેડલીએ લશ્કર માટે ઘણી વખત તાલીમ લીધી હતી.

તહવ્વુર રાણાએ કર્યા વિસ્ફોટક ખુલાસા

રાણાએ કહ્યું કે લશ્કર-એ-તૈયબા ફક્ત એક આતંકવાદી સંગઠન નથી, પરંતુ એક જાસૂસી નેટવર્કની જેમ કામ કરે છે. તેણે એ પણ સ્વીકાર્યું કે તેના મિત્ર અને સાથીદાર ડેવિડ હેડલીએ લશ્કર માટે ઘણી વખત તાલીમ લીધી હતી.

ISI એ મદદ કરી હતી

રાણાએ કહ્યું કે મુંબઈમાં તેની ઇમિગ્રેશન ફર્મનું કેન્દ્ર ખોલવાનો તેનો વિચાર હતો, અને તેનાથી સંબંધિત નાણાકીય વ્યવહારોને વ્યવસાયિક ખર્ચ તરીકે વર્ણવવામાં આવ્યા હતા. પરંતુ તેણે એ પણ સ્વીકાર્યું કે જ્યારે 2008 માં 26/11 નો હુમલો થયો ત્યારે તે મુંબઈમાં હાજર હતો અને તે સંપૂર્ણપણે આતંકવાદી કાવતરાનો ભાગ હતો.

તેણે સ્વીકાર્યું કે તેણે મુંબઈમાં છત્રપતિ શિવાજી મહારાજ ટર્મિનસ જેવા સ્થળોની રેકી કરી હતી. પૂછપરછ દરમિયાન, રાણાએ એ પણ સ્વીકાર્યું કે આ હુમલો પાકિસ્તાનની ગુપ્તચર એજન્સી ISI સાથે મળીને કરવામાં આવ્યો હતો. હવે મુંબઈ પોલીસ રાણાની ધરપકડ કરીને તેને પોતાની કસ્ટડીમાં લેવાની તૈયારી કરી રહી છે, જેથી તપાસ આગળ વધારી શકાય.

આ પણ વાંચો : જમીન-મકાનમાં મંદીની વાતો વચ્ચે રહેણાંક મકાનની કિંમત આસમાને : છેલ્લા 8 વર્ષમાં મકાનના ભાવમાં 34 ટકાનો ઉછાળો

રાણા હેડલીનો મિત્ર હતો

તહવ્વુર રાણા 26 નવેમ્બર 2008 ના રોજ મુંબઈમાં થયેલા આતંકવાદી હુમલામાં સામેલ આતંકવાદી ડેવિડ હેડલીનો નજીકનો મિત્ર હતો. હેડલીની પૂછપરછ દરમિયાન રાણાનો ઉલ્લેખ કરવામાં આવ્યો હતો. આ હુમલામાં 10 પાકિસ્તાની આતંકવાદીઓ અરબી સમુદ્રના રસ્તે મુંબઈ પહોંચ્યા હતા અને રેલ્વે સ્ટેશન, બે લક્ઝરી હોટલ અને એક યહૂદી કેન્દ્ર પર હુમલો કર્યો હતો. લગભગ 60 કલાક સુધી ચાલેલા આ હુમલામાં 166 લોકો માર્યા ગયા હતા. રાણા પર હેડલી, લશ્કર-એ-તૈયબા, હરકત-ઉલ-જેહાદી ઇસ્લામી અને પાકિસ્તાન સાથે કાવતરું ઘડવાનો આરોપ છે.

તહવ્વુર રાણાને ભારત લાવવામાં આવ્યો

૪ એપ્રિલના રોજ, યુએસ સુપ્રીમ કોર્ટે તહવ્વુર રાણાની સમીક્ષા અરજી ફગાવી દીધી હતી. આ પછી રાણાને ભારત લાવવામાં આવ્યો. મે મહિનામાં ભારત આવ્યા ત્યારે NIA દ્વારા રાણાને ન્યાયિક કસ્ટડીમાં લેવામાં આવ્યો હતો અને કાવતરું, હત્યા, આતંકવાદ અને બનાવટી જેવા આરોપોમાં તેની પૂછપરછ કરવામાં આવી રહી છે. કેન્દ્રીય એજન્સીનું કહેવું છે કે રાણા મુંબઈ હુમલાના આયોજનમાં સામેલ હતો. તેણે હેડલીને વિઝા મેળવવામાં મદદ કરી અને ખોટી ઓળખ બનાવી જેથી તે ભારતની મુસાફરી કરી શકે.