ઊભા રહો હું પોલીસ કમિશનરને ફોન કરું…ધુળેટીમાં રાજકોટ પોલીસ પર રુઆબ છાંટવો કથિત પત્રકારને પડ્યો ભારે! જાણો શું છે મામલો
શહેરમાં ધુળેટીના તહેવાર દરમિયાન કાયદો અને વ્યવસ્થા જાળવવા રેસકોર્ષ રિંગ રોડ પર તૈનાત પોલીસ ટુકડી સાથે ઘર્ષણમાં ઉતરી કથિત પત્રકારે પીએસઆઈને રુઆબ બતાવી તોછડાઈ ભર્યું વર્તન કર્યું હતું આટલું જ નહીં આ શખસને પોલીસ મથકે લઈ જતાં અહીં પરથી પણ તે પોતાની કાર પુરપાટ ઝડપે ભગાવી નાસી છૂટ્યો હતો. બનાવ અંગે પોલીસે ફરજ રુકવાટનો ગુનો નોંધી વધુ તપાસ હાથ ધરી છે.
આ અંગે પ્રદ્યુમનનગર પોલીસ સ્ટેશનમાં કથીત પત્રકાર વિરાજ અશ્વિનભાઈ જાની નામના શખ્સે સામે પ્રદ્યુમનનગર પોલીસ સ્ટેશનના પોલીસ કોન્સ્ટેબલ ભગીરથસિંહ રાણાએ નોંધાવેલી ફરિયાદમાં જણાવ્યું હતું કે, તેઓ પીએસઆઇ એસ.ડી. કોઠીવાર અને અન્ય સ્ટાફ સાથે રેસકોર્ષ રિંગ રોડ પર ધૂળેટી પર્વે ઉપર બંદોબસ્તમાં હતા. બપોરના આશરે 2:15 વાગ્યે મેયર બંગલા પાસે GJ-03-NF-3022 નંબરની ઇનોવા કારમાં સવાર વિરાજ જાની જાહેર માર્ગ પર લોકોની સલામતી જોમાય તે રીતે રંગ ઉડાડી રહ્યો હતો.
જ્યારે PSI કોઠીવારે તેને અટકાવીને પોલીસ કમિશનરના જાહેરનામાની અમલવારી કરવા જણાવ્યું તો આરોપી ઉશ્કેરાઈ ગયો હતો અને અત્યંત તોછડી ભાષામાં વાત કરવા લાગ્યો હતો.પોલીસે જ્યારે તેને ગાડીના કાળા કાચ દૂર કરવા અને કાગળો બતાવવા જણાવ્યું, ત્યારે આરોપીએ સ્પષ્ટ ના પાડી દીધી હતી. એટલું જ નહીં, પોલીસ સ્ટેશનની બહાર ગાડી ઉભી રાખ્યા બાદ અચાનક ગાડી લોક કરી દીધી અને પૂરપાટ ઝડપે કાર ચલાવીને નાસી છૂટ્યો હતો. જોકે, પોલીસે સતર્કતા દાખવી સરકારી વાહન દ્વારા ફિલ્મી ઢબે પીછો કરી તેને હેડ ક્વાર્ટર સર્કલ પાસેથી ઝડપી પાડ્યો હતો. તપાસમાં સામે આવ્યું કે આરોપી ‘ન્યૂઝ ઓન વ્હીલ્સ’ નામથી સોશિયલ મીડિયા પેજ ચલાવતો અને પોતાને પત્રકાર ગણાવે છે.
આ પણ વાંચો :APK ફાઇલ ખોલતાં પહેલા ચેતજો! વોટ્સએપ પર ટ્રાફિક મેમોની ફાઇલ ખોલતા જ રાજકોટના વેપારીના ખાતામાંથી 10.87 લાખ સાફ
“ઊભા રહ્યો હું પોલીસ કમિશનરને ફોન કરું” કહી આરોપીએ મારી ડંફાસ…
રેસકોર્સ રીંગ રોડ ઉપર જાહેરમાં લોકોને રંગ ઉડાડી પરેશાન કરતાં શખસોને પોલીસે અટકાવતાં આરોપી વિરાજ જાનીએ પોતાની ઓળખ પત્રકાર તરીકે આપી પોલીસ પર દબાણ લાવવાનો પ્રયાસ કરતો હતો. સૂત્રોના જણાવ્યા મુજબ, તેણે પોતાનો રુઆબ બતાવવા માટે રાજકોટ પોલીસ કમિશનર અને ડીસીપી સહિતના ઉચ્ચ અધિકારીઓને ફોન લગાવ્યા હોવાનો ડોળ કર્યો હતો પરંતુ કોઈ પણ અધિકારીએ તેનો ફોન રિસીવ કર્યા ન હોય જેથી સ્થળ ઉપર હાજર અધિકારીએ કાયદેસરની કાર્યવાહી કરવાની તૈયારી દર્શાવતા આરોપી ઉશ્કેરાયો હતો અને પીએસઆઇ સાથે ધક્કામુકી કરી હતી.
