રાજકોટમાં ફરીવાર ઝડપાયો હાઇબ્રીડ ગાંજો! રિમાન્ડ પર રહેલા ધ્રુવ જોશીના ઘરેથી વધુ 10.36 લાખનો હાઇબ્રિડ ગાંજો SOGએ પકડી પાડ્યો
રાજકોટમાં છેલ્લા ઘણા સમયથી ડ્રગ્સ પકડાવાનું ઓછું થઈ ગયું છે પરંતુ અફિણ સહિતના નશીલા પદાર્થ પકડાઈ રહ્યા હોય પોલીસ માટે પડકાર ઉભા થઈ રહ્યા છે. આ બધાની વચ્ચે રાજકોટમાંથી પહેલીવાર હાઈબ્રિડ ગાંજો પકડાતાં નશાના નવા નેટવર્કનો પર્દાફાશ થવાની શક્યતા રહેલી છે. હજુ ગઇકાલે જ ધ્રુવ જોષી નામના યુવક પાસેથી હાઇબ્રીડ ગાંજો ઝડપાયો હતો ત્યારે આજે ફરીવાર SOG પોલીસને સફળતા મળી છે. 18 માર્ચે હાઇબ્રિડ ગાંજાના જથ્થા સાથે મૂળ મુંબઈના ધ્રુવ જોશી નામના યુવકની ધરપકડ કરી 5 દિવસના રિમાન્ડ મેળવવામાં આવ્યા હતાં. જે રિમાન્ડ દરમિયાન તેના ઘરેથી પોલીસને 10.36 લાખ કિંમતનો વધુ 296 ગ્રામ હાઈબ્રીડ ગાંજાનો જથ્થો ઝડપી પાડી કાર્યવાહી હાથ ધરી છે.
18 માર્ચે ઝડપાયો 2.42 લાખની કિંમતનો 69.380 ગ્રામ હાઈબ્રિડ ગાંજો
એસઓજી પીઆઈ એસ.એમ. જાડેજા, પીએસઆઈ વી.વી. ધ્રાંગુ સહિતની ટીમે પુષ્કરધામ મેઈન રોડ પર જે.કે. ચોકમાં પટેલ રેસ્ટોરન્ટ પાસે ઉભેલા ધ્રુવ સંજયભાઈ જોષી (ઉ.વ. 26)ની અટકાયત કરી તલાશી લેતા તેના પેન્ટના ખીસ્સામાંથી 2.42 લાખની કિંમતનો 69.380 ગ્રામ હાઈબ્રિડ ગાંજો મળી આવતાં તેની ધરપકડ કરવામાં આવી હતી.
ધ્રુવની પૂછપરછમાં ખુલ્યા પ્રમાણે તે ભાગીદાર સાથે ફાયર સેફ્ટીનું કામ કરે છે. રાતોરાત અમીર બનવા માટે તે અમદાવાદથી હાઈબ્રિડ ગાંજો રાજકોટ લાવ્યો હતો અને વેચવાની ફિરાકમાં હતો. જો કે ધ્રુવ હજુ બંધાણીને ગાંજો વેચે તે પહેલાં જ દબોચાઈ ગયો હતો. ગાંજા નેટવર્કના મૂળ સુધી પહોંચવા માટે એસઓજી દ્વારા ધ્રુવને 5 દિવસના રિમાન્ડ પર લેવામાં આવ્યો છે.
19 માર્ચે ફરીવાર 10.36 લાખનો વધુ 296 ગ્રામ હાઈબ્રિડ ગાંજો જપ્ત
પૂછપરછ દરમિયાન આરોપી ધ્રુવે જથ્થો મુંબઈથી લાવ્યાની કબૂલાત કરી છે. પોલીસ તપાસમાં સામે આવ્યું છે કે ધ્રુવ મૂળ મુંબઈનો રહેવાસી છે અને છેલ્લા દોઢથી બે વર્ષથી રાજકોટમાં રહે છે. રિમાન્ડ દરમિયાન પોલીસે તેને સાથે રાખી તેના નિવાસસ્થાને તપાસ કરતા અંદાજે 10.36 લાખ રૂપિયાની કિંમતનો વધુ 296 ગ્રામ હાઈબ્રિડ ગાંજો જપ્ત કર્યો હતો..
પ્રારંભિક પૂછપરછમાં આરોપી આ જથ્થો અમદાવાદથી લાવ્યો હોવાની વાત પર અડગ રહ્યો હતો, પરંતુ પોલીસની આગવી રીતે કરાયેલી પૂછપરછ બાદ તેણે આખરે સ્વીકાર્યું કે ગાંજો મુંબઈથી લાવ્યો હતો. વધુમાં તેણે જણાવ્યું કે તે અહીં એક ગ્રામ ગાંજો 3થી 4 હજાર રૂપિયામાં વેચતો હતો.
