દેશમાં જથ્થાબંધ ફુગાવો કેટલો વધ્યો ? વાંચો

દેશમાં જથ્થાબંધ ફુગાવો જૂનમાં વધીને 3.36 ટકાના 16 મહિનાના ઉચ્ચ સ્તરે પહોંચી ગયો હતો. આ વધારો મુખ્યત્વે ખાદ્યપદાર્થો, ખાસ કરીને શાકભાજી અને ઉત્પાદિત ચીજવસ્તુઓના ભાવમાં વધારાને કારણે થયો છે. આ સતત ચોથો મહિનો હતો જ્યારે મોંઘવારી વધતી જોવા મળી હતી. મે મહિનામાં જથ્થાબંધ ભાવ સૂચકાંક પર આધારિત ફુગાવાનો દર 2.61 ટકા હતો. ગયા વર્ષે જૂન 2023માં તે (-) 4.18 ટકા હતો. રિટેલ ફુગાવો પણ વધ્યો હતો. આમ લોકોની ભારે કસોટી થઈ રહી છે.

ફેબ્રુઆરી 2023માં જથ્થાબંધ ફુગાવો 3.85 ટકા જેટલો ઊંચો હતો. વાણિજ્ય અને ઉદ્યોગ મંત્રાલયે સોમવારે જણાવ્યું હતું કે જૂન 2024માં ફુગાવો વધવાનું મુખ્ય કારણ ખાદ્ય ચીજવસ્તુઓ, ખાદ્ય ઉત્પાદનો, ક્રૂડ તેલ અને કુદરતી ગેસ, ખનિજ તેલ અને અન્યની કિંમતોમાં વધારો છે.
આઇસીઆરએના ચીફ ઇકોનોમિસ્ટ અદિતિ નાયરે જણાવ્યું હતું કે જૂન 2024માં જથ્થાબંધ ફુગાવામાં આ વધારો લગભગ દરેક પ્રોડક્ટમાં જોવા મળ્યો હતો, જેમાં ઇંધણ અને વીજળી સિવાયના તમામ મુખ્ય ક્ષેત્રોમાં વધારો જોવા મળ્યો હતો.

અદિતિ નાયર કહે છે કે જુલાઈ 2024માં જથ્થાબંધ મોંઘવારી દર ઘટીને લગભગ 2% થઈ શકે છે. આના બે કારણો છે – ગયા વર્ષના ડેટાનો લાભ અને વિશ્વભરમાં કાચા માલના ભાવમાં થોડો ઘટાડો. તેલની કિંમતો અંગે તેમણે કહ્યું કે ભારતીય કાચા તેલની સરેરાશ કિંમત જુલાઈ 2024માં અત્યાર સુધી ખૂબ જ અસ્થિર રહી છે. આ માંગ અને પુરવઠા વચ્ચેના અસંતુલનને કારણે છે. જુલાઈ 11 સુધીમાં, તે બેરલ દીઠ $86.6 હતો, જે પાછલા મહિના કરતાં વધુ છે.

તેલ મોંઘું થશે તો મુશ્કેલી
તેલ મોંઘુ થશે તો જથ્થાબંધ મોંઘવારી પણ વધી શકે છે. ઈંધણ અને વીજળીના ભાવમાં હજુ વધારે વધારો થયો નથી, પરંતુ ક્રૂડ ઓઈલ અને કુદરતી ગેસના ભાવમાં 12.55%નો વધારો થયો છે. જૂન મહિનામાં ઉત્પાદિત ચીજવસ્તુઓના ભાવમાં પણ વધારો જોવા મળ્યો હતો. ઉત્પાદિત ઉત્પાદનોનો ફુગાવાનો દર જૂનમાં 1.43% હતો, જે મે મહિનામાં 0.78% કરતા વધારે છે.