પાકિસ્તાનમાં કેવી આવી છે આફત ? શું થયું ? ક્યાં છે વિરોધ ? વાંચો
આંતરિક સંઘર્ષ, મોંઘવારી અને બેરોજગારી જેવા અનેક પડકારોનો સામનો કરી રહેલું પાકિસ્તાન એક વધુ મુસીબતમાં મૂકાઈ ગયું છે. ચીન સાથેના વેપાર દ્વારા પોતાની અર્થવ્યવસ્થા સુધારવાના તેના પ્રયાસોને ફટકો પડે એવું કંઈ બની રહ્યું છે. સમસ્યા એવી છે કે એનો ઉકેલ લાવવામાં પાકિસ્તાનની સરકારને મોંઢે ફીણ આવી ગયા છે. પોકમાં પાકનો વિરોધ હિંસક બન્યો છે અને પાકના ટુકડા થઈ જવાનો ખતરો પણ પેદા થયો છે .
પાકિસ્તાનના ઉત્તરી પ્રાંત ગિલગિટ-બાલ્ટિસ્તાનનો મુખ્ય હાઇવે સ્થાનિક લોકોએ બ્લોક કરી દીધો હોવાથી પરિવહન સમસ્યા સર્જાઈ છે. પ્રદર્શનકારીઓએ ગત શુક્રવારથી કારાકોરમ હાઇવે બ્લોક કરી રાખ્યો છે. સરકારે એમને મનાવવાની કોશિશ કરી છે, પણ લોકો માનતા નથી. છેલ્લા ચાર દિવસથી સ્થિતિ જૈસે-થે છે, જેને લીધે ચાઇના-પાકિસ્તાન ઈકોનોમિક કોરિડોર દ્વારા માલસામાન વહન કરતી સેંકડો ટ્રકો હાઇવે પર અને ડ્રાય પોર્ટ (બંદર) પર અટવાઈ ગઈ છે. ગિલગિટ-બાલ્ટિસ્તાન (પાકિસ્તાન ઓક્યુપાઈડ કાશ્મીર)નો હિસ્સો છે.
વિજકાપ સામે રોષ
સ્થાનિક રહેવાસીઓ વીજકાપને લીધે રસ્તા પર ઉતરી આવ્યા છે. વારંવાર કલાકો સુધીનો વીજકાપ વેઠીને કંટાળેલા લોકો વિરોધ કરવા માટે હાઇવે પર ધરણા કરવા બેસી ગયા છે. વિરોધમાં પ્રજાને ‘હુન્ઝા અવામી ઍક્શન કમિટી’ અને ‘ઓલ પાર્ટીઝ ટ્રેડર્સ ઍસોસિયેશન’નો સહયોગ મળ્યો છે.
હાઇવે પર 700થી વધુ ટ્રકો અટવાઈ
હાઇવે બ્લોક થતાં પાકિસ્તાન અને ચીન વચ્ચેના વેપારમાં વિક્ષેપ પડ્યો છે. ચીન-પાકિસ્તાન ઈકોનોમિક કોરિડોર માર્ગો પર માલસામાન વહન કરતી લગભગ 700 ટ્રકો ફસાયેલી છે. ઘણી ટ્રકો ડ્રાય પોર્ટ (બંદર) પર અટકી પડી છે.
પાકના અર્થતંત્ર સામે જોખમ
પાકિસ્તાનમાં છેલ્લા કેટલાય મહિનાઓથી મોંઘવારીએ માઝા મૂકી છે. પહેલેથી જ રોજબરોજની ચીજવસ્તુઓના ભાવ આસમાને છે, એવામાં હુન્ઝા વિસ્તારમાં માલસામાન ભરેલી ટ્રકોની ગતિ સ્થગિત થઈ જવાથી દેશમાં માલસામાનની ખેંચ ઔર વર્તાઈ રહી છે, ચીજો ઔર મોંઘી થઈ રહી છે. આવી સ્થિતિ લાંબો સમય જળવાઈ રહી તો પાકિસ્તાનના અન્ય પ્રાંતોમાં પણ વિરોધના વાવટા ફરકશે.
