દેશમાં ટમેટાનો ભાવ ક્યાં સુધી પહોંચ્યો ? વાંચો
દર વર્ષની જેમ આ વર્ષે પણ ચોમાસાની ઋતુમાં ટમેટાની અછતને કારણે લોકોના ખિસ્સા પર મોટી અસર પડી છે. દેશના અનેક ભાગોમાં કિલોનો ભાવ રૂપિયા 100 થી 120 સુધી પહોંચી ગયો છે અને લોકોની રાડ ફાટી ગઈ છે. ગૃહિણીઓ આક્રોશમાં છે. બટેટા અને ડુંગળીના ભાવ પણ ઊંચા જ રહ્યા છે.
થોડા અઠવાડિયા પહેલા જ દિલ્હીના બજારોમાં ટમેટાં માત્ર 20 રૂપિયા પ્રતિ કિલોના ભાવે મળતા હતા. વરસાદને કારણે દિલ્હીની આઝાદપુર મંડીમાં દેશના વિવિધ ભાગોમાંથી ટમેટાનો પુરવઠો ખરાબ રીતે પ્રભાવિત થયો છે. આ જ કારણ છે કે શનિવારે છૂટક બજારમાં 100 રૂપિયા પ્રતિ કિલોના જંગી ભાવે ટામેટાંનું વેચાણ થયું હતું. રાષ્ટ્રીય રાજધાનીમાં મધર ડેરીના રિટેલ આઉટલેટ સફલ ખાતે ટમેટાં 100 રૂપિયા પ્રતિ કિલોના ભાવે ઉપલબ્ધ છે.
ડિપાર્ટમેન્ટ ઓફ કન્ઝ્યુમર અફેર્સ દ્વારા આવેલા આંકડા અનુસાર, શનિવારના રોજ દિલ્હીમાં છૂટક કિંમત 93 રૂપિયા પ્રતિ કિલો સુધી પહોંચી ગઈ હતી. સરકારી આંકડા મુજબ 20 જુલાઈના રોજ દેશભરમાં ટમેટાંની સરેરાશ કિંમત 73.76 રૂપિયા પ્રતિ કિલો છે. ગયા અઠવાડિયે, વિભાગના એક વરિષ્ઠ અધિકારીએ ભાવમાં તીવ્ર વધારા માટે અતિશય ગરમી અને ત્યારબાદ વરસાદને જવાબદાર ગણાવ્યો હતો. એવું કહેવામાં આવ્યું હતું કે ખરાબ હવામાનને કારણે દેશના દરેક ભાગમાં પુરવઠો પ્રભાવિત થયો છે.
બટેટા અને ડુંગળી પણ રડાવે છે
અધિકારીએ પીટીઆઈને જણાવ્યું હતું કે, “દિલ્હી અને કેટલાક અન્ય શહેરોમાં ટમેટાં,બટાકા અને ડુંગળીના ભાવ ઊંચા છે. “અતિશય વરસાદને પગલે અને ભારે ગરમીએ પુરવઠો ખોરવ્યો હતો, જેના કારણે ગ્રાહક વિસ્તારોમાં ભાવમાં વધારો થયો હતો.” શનિવારે પશ્ચિમ દિલ્હીમાં મધર ડેરી સ્ટોર પર ડુંગળી 46.90 રૂપિયા પ્રતિ કિલો અને બટાટા 41.90 રૂપિયા પ્રતિ કિલોના ભાવે વેચાઈ હતી.