દંપતિ ફાઇવ સ્ટાર હોટલના રૂમમાં હતું ત્યારે…ઉદયપુરમાં કપલની પ્રાઈવસીના ભંગ બદલ હોટેલ લીલા પેલેસને 10 લાખનો દંડ
ઉદયપુરની ફાઈવ સ્ટાર હોટેલ લીલા પેલેસમાં ઉતરેલા એક દંપતિએ પ્રાઈવસી ભંગ અંગે કરેલી ફરિયાદ બાદ એક ગ્રાહક અદાલતે હોટેલને 10 લાખ રૂપિયાનો દંડ ફટકાર્યો છે. કોર્ટે સ્પષ્ટતા કરી કે હોટેલ મેનેજમેન્ટ મહેમાનોની સલામતી અને ગોપનીયતા સુનિશ્ચિત કરવામાં નિષ્ફળ રહ્યું છે, જે સેવામાં ગંભીર ખામી સમાન છે.
કોર્ટ સમક્ષ રજૂ કરાયેલા કેસ મુજબ, ફરિયાદી પિછોલા તળાવના કિનારે આવેલી આ લક્ઝરી હોટલમાં તેની પત્ની સાથે હોટલમાં રોકાયો હતો. આ સમય દરમિયાન, હોટેલના હાઉસકીપિંગ સ્ટાફે માસ્ટર ચાવીનો ઉપયોગ કરીને પૂર્વ પરવાનગી વિના તેમના રૂમમાં પ્રવેશ કર્યો. આ ઘટના દંપતીની ગોપનીયતાનું ગંભીર ઉલ્લંઘન હતું. ફરિયાદીએ આને હોટેલ મેનેજમેન્ટ તરફથી બેદરકારી અને અસંવેદનશીલતા ગણાવી હતી.રૂમનું ભાડું આશરે 55,000 રૂપિયા હતું.
સુનાવણી દરમિયાન, એ પણ પ્રકાશમાં આવ્યું કે ઘટના સમયે રૂમની બહાર લગાવવામાં આવેલ સીસીટીવી કેમેરા કાર્યરત નહોતો. આનાથી હોટેલની સુરક્ષા વ્યવસ્થા પર પ્રશ્નો ઉભા થયા. ફરિયાદીએ કોર્ટમાં દલીલ કરી હતી કે હોટેલ જેવી પ્રીમિયમ સેવા પ્રદાતા પાસેથી આવી ભૂલની અપેક્ષા નહોતી.
ગ્રાહક કોર્ટે તેના નિર્ણયમાં હોટેલની હોસ્પિટાલિટી સેવાઓમાં ગંભીર ખામીઓ સ્વીકારી હતી. કોર્ટે જણાવ્યું હતું કે હોટેલ મેનેજમેન્ટ તરફથી વારંવાર ખાતરી આપવા છતાં, સમસ્યાનું નિરાકરણ થયું નથી. આ સેવામાં ખામી અને ગોપનીયતાનું ઉલ્લંઘન છે. કોર્ટે હોટેલ પર નુકસાની લાદવાનો નિર્ણય લીધો.
કોર્ટે હોટેલ લીલા પેલેસને મહેમાનના રૂમ ભાડાના 55,000 રૂપિયા વ્યાજ સહિત પરત કરવાનો આદેશ આપ્યો. માનસિક વેદના અને મુકદ્દમાના ખર્ચ માટે કુલ 10.10 લાખ રૂપિયા ચૂકવવાનો આદેશ આપવામાં આવ્યો હતો.
