અમેરિકી ડોલરમાં ઐતિહાસિક ફેરફાર: 165 વર્ષ જૂની પરંપરા બદલાઈ, હવે નોટ પર હશે રાષ્ટ્રપતિ ડોનાલ્ડ ટ્રમ્પની સહી
અમેરિકામાં સ્વતંત્રતાના 250મા વર્ષની ઉજવણીની તૈયારી વચ્ચે એક ઐતિહાસિક નિર્ણય લેવામાં આવ્યો છે. ડોનાલ્ડ ટ્રમ્પના હસ્તાક્ષર હવે અમેરિકાની નવી છપાતી ચલણી નોટો પર જોવા મળશે. યુનાઇટેડ સ્ટેટ ડિપાર્ટમેન્ટ ઓફ ધ ટ્રેઝરીએ આ અંગે સત્તાવાર જાહેરાત કરતાં જણાવ્યું કે, આ પહેલ દેશના ઐતિહાસિક સિદ્ધિઓને ચિહ્નિત કરવા માટે કરવામાં આવી રહી છે. આ નિર્ણય સાથે 165 વર્ષ જૂની પરંપરાનો અંત આવશે. અત્યાર સુધી અમેરિકાની ચલણી નોટો પર ટ્રેઝરર ઓફ થી યુનાઇટેડ સ્ટેટના હસ્તાક્ષર અનિવાર્ય રીતે સમાવાતા હતા, પરંતુ હવે આ પ્રથા પ્રથમ વખત બદલાઈ રહી છે.
ટ્રેઝરી વિભાગના જણાવ્યા મુજબ, સૌથી પહેલાં $100ની નવી નોટો પર ટ્રમ્પ અને સ્કોટ બેસેન્ટના હસ્તાક્ષર સાથે જૂન મહિનાથી છાપકામ શરૂ થશે. ત્યારબાદ અન્ય તમામ મૂલ્યવર્ગની નોટોમાં પણ આ ફેરફાર તબક્કાવાર અમલમાં મૂકવામાં આવશે.
બેસન્ટે આ પહેલને સમર્થન આપતાં કહ્યું કે, દેશના આર્થિક પ્રગતિના સમયમાં રાષ્ટ્રપતિના નામને ચલણી નોટો પર સ્થાન આપવું યોગ્ય છે. તેમના જણાવ્યા મુજબ, સ્વતંત્રતાના 250મા વર્ષના અવસર પર આ પ્રકારની યાદગાર નોંધણી દેશ માટે ગૌરવની બાબત છે.
હાલમા હજુ પણ પૂર્વ ટ્રેઝરી સચિવ Janet Yellen જેનેટ યેલેન અને યુએસ ટ્રેઝરર લિન માલેરબાના હસ્તાક્ષર ધરાવતી નોટોનું ઉત્પાદન ચાલુ છે. માલેરબાની સહી 1861થી ચાલતી આવી રહેલી સતત પરંપરાનો અંતિમ તબક્કો બની રહેશે.
આ પણ વાંચો: શું દેશમાં ફરી લોકડાઉન લાગશે? સરકારે સ્પષ્ટતા કરી અફવાઓ પર મૂક્યું પૂર્ણવિરામ, જાણો મંત્રી હરદીપસિંહ પુરીએ શું કહ્યું?
આ ઉપરાંત, ટ્રમ્પને સન્માન આપવા માટે અન્ય પગલાં પણ લેવામાં આવી રહ્યા છે. તાજેતરમાં એક ફેડરલ આર્ટ્સ કમિશને ટ્રમ્પની પ્રતિમાવાળી 24 કેરેટ સોનાની સ્મારક સિક્કાની ડિઝાઇનને મંજૂરી આપી છે, જે 4 જુલાઈની ઉજવણી દરમિયાન જાહેર થશે.
અમેરિકન કરન્સીનો ઇતિહાસ
અમેરિકામાં ફેડરલ ચલણી નોટોનો પ્રારંભ 1861માં થયો હતો. તે સમયથી દરેક નોટ પર ટ્રેઝરી સચિવ અને ટ્રેઝરરના હસ્તાક્ષરનો સમાવેશ થતો આવ્યો છે. આ પ્રથા છેલ્લા 165 વર્ષથી અવિરત ચાલુ રહી હતી અને તે અમેરિકન નાણાકીય સિસ્ટમની ઓળખ બની ગઈ હતી.
ટ્રેઝરરના હસ્તાક્ષર ખાસ કરીને વિશ્વસનીયતા અને સત્તાવાર માન્યતાનું પ્રતીક માનવામાં આવતા હતા. હવે પ્રથમ વખત આ પરંપરામાં ફેરફાર થતાં રાષ્ટ્રપતિના હસ્તાક્ષર ઉમેરાશે, જે અમેરિકન કરન્સીના ઇતિહાસમાં એક મોટા ફેરફાર તરીકે નોંધાશે.
