છ વરસે ન્યાય : ૭ ઉમેદવારોને નિમણુંક આપવા રાજ્ય સરકારને હાઇકોર્ટનો આદેશ

ગુજરાત જાહેર સેવા આયોગ દ્વારા પુનઃમૂલ્યાંકન બાદ નિમણુંક રદ કરી નાખવામાં આવી હતી

ગુજરાત હાઇકોર્ટે રાજ્ય સરકારને નાયબ મામલતદાર અને નાયબ સેક્શન ઓફિસરની જગ્યાઓ પર સાત ઉમેદવારોની નિમણૂક કરવાનો આદેશ આપ્યો છે. આ સાતેય ઉમેદવારો છ વર્ષ પહેલા આ પોસ્ટ માટે સિલેક્ટ થઇ ગયા હતા પરંતુ ગુજરાત જાહેર સેવા આયોગ (GPSC) દ્વારા ગુણના પુનઃમૂલ્યાંકન બાદ તેની આન્સર કીમાં સુધારો કરવામાં આવ્યા બાદ તેમને આ જગ્યા માટે અયોગ્ય જાહેર કરવામાં આવ્યા હતા અને નિમણૂક આપવામાં આવી ન હતી. આ સાતેય ઉમેદવારોએ હાઇકોર્ટમાં દાદ માગી હતી અને હવે તેમને છ વરસે ન્યાય મળ્યો છે.

કેસની વિગતો અનુસાર, GPSC એ 2019 માં આ જગ્યાઓ માટે ભરતી હાથ ધરી હતી, અને સપ્ટેમ્બર 2019 માં અંતિમ મેરિટ યાદી જાહેર કરવામાં આવી હતી. જ્યારે GPSC એ ગુણની પુનઃમૂલ્યાંકન માટે અરજીઓ મંગાવી, ત્યારે કેટલાક અસફળ ઉમેદવારોએ એક પ્રશ્નના જવાબમાં ભૂલ હોવાનું જણાવ્યું હતું.

આ પછી GPSCએ નિષ્ણાતોનો અભિપ્રાય મેળવી તેમાં સુધારો કરી તે મુજબ માર્ક્સ ની ફાળવણી કરી હતી. આ ફાળવણી બાદ જાન્યુઆરી 2020 માં પરિણામ પણ ફર્યું હતું અને આ પ્રક્રિયામાં, અગાઉ નાપાસ જાહેર કરાયેલા 12 ઉમેદવારોની પસંદગી કરવામાં આવી. જેના પરિણામે પસંદગી યાદીમાંથી જે ૧૨ ઉમેદવારો પાસ થયા હતા તેમને બાદ કરી નાખવામાં આવ્યા હતા.

આ 12 ઉમેદવારોમાંથી સાત ઉમેદવારોએ હાઇકોર્ટનો સંપર્ક કર્યો હતો અને દલીલ કરી કે 2018 ના નિયમોમાં GPSC ગુણ ફરીથી ચકાસી શકે છે, પરંતુ તે ઉત્તરવહીનું ફરીથી મૂલ્યાંકન કરી શકતું નથી. ઉમેદવારો પણ ફરીથી મૂલ્યાંકનની માંગ કરી શકતા નથી. આ કિસ્સામાં, પરિણામ જાહેર થયા પછી પ્રશ્નનું મૂલ્યાંકન એ તેના માટે કોઈ કાયદાકીય જોગવાઈના અભાવે પુનઃ મૂલ્યાંકન સિવાય બીજું કંઈ નહોતું.

GPSCએ આન્સર કીમાં ભૂલનો ઉલ્લેખ કરીને પોતાનો પક્ષ રાખ્યો હતો અને ભારપૂર્વક જણાવ્યું હતું કે પરીક્ષાની અખંડિતતા જાળવવા માટે પરિણામોમાં સુધારો જરૂરી છે. એવી પણ દલીલ કરવામાં આવી હતી કે સુધારો ખરેખર લાયક ઉમેદવારોના હિતમાં અને વ્યાપક જાહેર હિતમાં હતો.

આ દલીલ બાદ એક જજની બેન્ચે સાત ઉમેદવારોની અરજી ફગાવી દેતા તેઓએ ડિવિઝન બેન્ચ સમક્ષ અપીલ કરી હતી. આ મુદ્દા પરના વિવિધ ચુકાદાઓના આધારે, ડિવિઝન બેન્ચે જણાવ્યું હતું કે સુધારાત્મક પગલાં સિદ્ધાંતમાં વાજબી લાગે છે, પરંતુ વહીવટી પ્રક્રિયાઓમાં પ્રક્રિયાગત અખંડિતતા અને ન્યાયીતા જાળવવા માટે કાયદાકીય જોગવાઈઓ અને સ્થાપિત કાનૂની પૂર્વધારણાઓનું પાલન મહત્વપૂર્ણ છે.

ડિવિઝન બેન્ચે એમ પણ કહ્યું હતું કે, અરજદારોની નિમણૂકો નકારી શકાય નહીં. હાલનો ચુકાદો અને આદેશ ફક્ત હાલના અરજદારો સુધી મર્યાદિત રહેશે, કારણ કે તેઓ ગેરકાયદેસર કાર્યવાહીને અનુસરવામાં સતર્ક રહ્યા હતા. હાઇકોર્ટે સરકારને છ અઠવાડિયામાં અરજદારોને નિમણૂકો આપવાનો આદેશ આપ્યો હતો. સાથોસાથ હાઇકોર્ટે સ્પષ્ટ કર્યું હતું કે પુનઃમૂલ્યાંકન પછી સફળ જાહેર કરાયેલા 12 ઉમેદવારોની સેવાઓમાં ખલેલ પહોંચાડવી જોઈએ નહીં.