- છત્તીસગઢમાં આદિવાસી યુવતી સાથે 17 નરાધમોનું દુષ્કર્મ
- 6 પકડાયા; રાયગઢ પંથકનો બનાવ; લોકોમાં આક્રોશ છવાયો
વોઇસ ઓફ ડે નવી દિલ્હી
છત્તીસગઢના રાયગઢ જિલ્લામાં મેળામાં ફરવા ગયેલી એક મહિલા સાથે સામૂહિક દુષ્કર્મનો મામલો સામે આવ્યો હતો. પોલીસે આ કેસમાં છ આરોપીઓની ધરપકડ કરી છે અને અન્ય આરોપીઓની શોધખોળ શરૂ કરી છે. ઉપરોક્ત મામલો પુસૌર પોલીસ સ્ટેશન વિસ્તારનો છે. આ દુષ્કર્મમાં 17 યુવાનો અને કિશોરો સામેલ હતા. 27 વર્ષની આદિવાસી મહિલાને દવાખાને ખસેડવી પડી હતી.
આ અંગે પ્રાપ્ત માહિતી અનુસાર, રાયગઢ જિલ્લા મુખ્યાલયથી માત્ર 20 કિલોમીટર દૂર આવેલા કસાઈપલી ગામમાં મંગળવારે સાંજે મેળો જોવા ગયેલી એક મહિલાને રસ્તામાં કેટલાક યુવકોએ ડરાવી ધમકાવીને નિર્જન જગ્યાએ લઈ ગયા હતા. જ્યાં દુષ્કર્મ આચરાયું હતું.
પીડિત મહિલા મંગળવારે પુસૌર પોલીસ સ્ટેશન પહોંચી અને આ અંગે લેખિત રિપોર્ટ નોંધાવી. જે બાદ પુસૌર પોલીસ એલર્ટ મોડમાં આવી અને આરોપીઓ સામે કલમ 70 (1), 351 (2) BNS હેઠળ ગુનો નોંધ્યો અને નજીકના ગામોમાં દરોડા પાડ્યા.
આ સમય દરમિયાન, છ આરોપીઓની ધરપકડ કરવામાં આવી છે, જ્યારે અન્ય આરોપીઓને શોધી કાઢવાના પ્રયાસો હાથ ધરવામાં આવ્યા છે. કહેવામાં આવી રહ્યું છે કે આ ઘટનામાં ત્રણ ગામના યુવકો સામેલ છે અને ઘણા સગીર પણ તેમાં સામેલ હોવાનું કહેવાય છે.
