હિમાચલમાં ભારે હિમવર્ષા, અટલ ટનલ પાસે જુઓ કેટલી હિમવર્ષા થઇ

આ વર્ષે હવે રહી રહીને ઠંડીએ જોર પકડ્યું છે. હિમાચલ પ્રદેશમાં હવામાન એકદમ ઠંડુ થઈ ગયું છે. વરસાદ અને હિમવર્ષા તેમજ ભૂસ્ખલનને કારણે સામાન્ય જનજીવન પર પણ અસર પડી છે. હાલમાં રાજ્યમાં ચાર રાષ્ટ્રીય ધોરીમાર્ગો સહિત 130 રસ્તાઓ બંધ કરી દેવામાં આવ્યા છે. અટલ ટનલ રોહતાંગ પાસે એક ફૂટ જેટલી હિમવર્ષા થઈ છે અને તેના કારણે મનાલીમાં નહેરુ કુંડથી આગળ વાહનવ્યવહાર બંધ કરી દેવામાં આવ્યો છે. ગુલાબા, પલચાન સોલાંગવેલી અને મનાલીની અટલ ટનલની આસપાસ પણ બરફ પડ્યો છે. મનાલી શહેરમાં રાત્રે હળવી હિમવર્ષા થઈ હતી. પરંતુ આજ સવારથી ભારે હિમવર્ષા શરૂ થઈ ગઈ છે.

હિમાચલ પ્રદેશ રાજ્ય ડિઝાસ્ટર મેનેજમેન્ટે એક બુલેટિન દ્વારા જણાવ્યું હતું કે શિમલા-રામપુર-કિન્નૌર રાષ્ટ્રીય ધોરીમાર્ગ-5 કિન્નૌર જિલ્લાના નાથપા પાસે એક પહાડી પરથી પત્થરોના વરસાદને કારણે બંધ કરી દેવામાં આવ્યો છે. તેમજ નેશનલ હાઈવે બ્લોક થવાને કારણે વહીવટીતંત્રે ડેમ સાઈટથી વૈકલ્પિક માર્ગે ટ્રાફિક ડાયવર્ટ કર્યો છે.