રાજકોટ એઈમ્સમાં પાંચમું ઓપરેશન થિયેટર શરૂ : કાન-નાક-ગળા, ગાયનેક સહિતના ઓપરેશન વધુ સંખ્યામાં થઈ શકશે

રાજકોટની એઈમ્સ હોસ્પિટલમાં દિવસેને દિવસે સુવિધામાં વધારો કરવામાં આવી રહ્યો છે ત્યારે સૌથી જરૂરી એવા વધુ એક ઓપરેશન થિયેટરને શરૂ કરવામાં આવ્યું છે. આ સાથે જ એઈમ્સમાં 18માંથી પાંચ ઓપરેશન થિયેટર કાર્યરત થઈ ચૂક્યા છે.

હોસ્પિટલમાં અત્યારે ઓર્થોપેડિક, કાન-નાક-ગળા, ગાયનેક ઉપરાંત જનરલ સર્જરી સહિતના ઓપરેશન કરવામાં આવે છે. આ ઉપરાંત ઈમરજન્સીમાં મતલબ કે અકસ્માત સહિતના કિસ્સામાં ઓપરેશન કરવાનું થાય તો તે પણ કરી શકાય તે માટે વધુ એક ઓપરેશન થિયેટર શરૂ કરવામાં આવ્યું છે.

આ ઓપરેશન થિયેટરનો પ્રારંભ હોસ્પિટલના એક્ઝિક્યુટિવ ડિરેક્ટર પ્રો.ડૉ.ગોવર્ધન દત્ત પુરીના હસ્તે કરવામાં આવ્યો હતો. આ ઓપરેશન થિયેટરથી વિવિધ સર્જિકલ વિભાગોની કાર્યક્ષમતામાં વધારો થશે સાથે સાથે આરોગ્યસંભાળમાં દર્દીઓને પૂરી પાડવામાં આવતી સર્જિકલ સંભાળની ગુણવત્તા પણ ઉમદા બનશે.