રાજકોટમાં પૂર્વ પતિએ પત્ની પર આચર્યું દુષ્કર્મ : છૂટાછેડા કર્યા બાદ મૈત્રીકરાર કરીને મરજી વિરુદ્ધ સંબંધ બાંધ્યો

રાજકોટના ગંગોત્રી પાર્ક મેઈન રોડ પર શિલ્પન ઓનિક્સ સામે રહેતાં મુળ મોરબીના શખસે પોતાની જ પૂર્વ પત્ની ઉપર દુષ્કર્મ ગુજાર્યું હોવાની ફરિયાદ નોંધાતાં ચકચાર મચી જવા પામી હતી.

આ અંગે મહિલાએ યુનિવર્સિટી પોલીસ મથકમાં નોંધાવેલી ફરિયાદમાં જણાવ્યું કે તેના લગ્ન 2019માં ધીરેન નામના શખસ સાથે થયા હતા. લગ્ન થયા બાદ પાંચ વર્ષ સુધી બધું બરાબર ચાલ્યું હતું પરંતુ ત્યારબાદ નાની-નાની બાબતે ઝઘડાઓ થતાં બન્નેએ 2024માં છૂટાછેડા લઈ લીધા હતા. પાંચ વર્ષના લગ્નગાળા દરમિયાન એક પુત્રનો જન્મ પણ થયો હતો.

આ પણ વાંચો : હવે મતદારોએ જન્મસ્થળનું પ્રમાણપત્ર આપવું પડશે : બોગસ મતદારોને દૂર કરવા ચુંટણી પંચનો આદેશ

આ પછી ધીરેને 17-12-2024ના ફરિયાદી અને તેના ત્રણ વર્ષના પુત્રની સારસંભાળ રાખવા માટે લીન ઈન રિલેશનશિપનો કરાર કર્યો હતો. આ દરમિયાન ધીરેને કરારનો લાભ લઈ ફરિયાદીની મરજી વિરુદ્ધ ગંગોત્રી પાર્ક મેઈન રોડ પર આવેલા મકાનમાં વારંવાર શરીરસંબંધ બાંધ્યો હતો. દરમિયાન 8 જાન્યુઆરી 2025ના ફરિયાદીનો અકસ્માત થતાં ધીરેન તેને તેના માવતરે મુકી ગયા બાદ 17 જાન્યુઆરીએ લીવ ઈનનો કરાર પણ તોડી નાખ્યો હતો. એક મહિના સુધી લીવ ઈન રિલેશનશિપમાં રહ્યા બાદ ધીરેને પોતાની જ પૂર્વ પત્નીની મરજી વિરુદ્ધ સંબંધ બાંધ્યો હતો અને જો મહિલા ઈનકાર કરે તો પુત્રને મારી નાખવાની ધમકી પણ ધીરેન આપી રહ્યાનું ફરિયાદમાં જણાવાયું હતું.

આ પણ વાંચો : નોંધારાનો આધાર બન્યા રાજકોટ આસિ.કલેકટર મહક જૈન : રામપરા બેટી-પીપળીયા ગામના 66 બાળકોને જન્મના દાખલા આપી ભણતા કર્યા

બીજી બાજુ ધીરેને ત્રણ વર્ષના પુત્રને પોતાની જ પાસે રાખી લીધો હોય તેને તે નુકસાન પહોંચાડી શકે તેવી ભીતિથી ફરિયાદી મહિલાએ પુત્રનો કબજો મેળવવા કોર્ટનું શરણું પણ લીધું છે. દુષ્કર્મની ફરિયાદ નોંધાતાં જ ધીરેન ભૂગર્ભમાં ઉતરી જતાં યુનિવર્સિટી પોલીસ મથકના પીએસઆઈ બી.એસ.ચૌહાણ સહિતની ટીમે તેની શોધખોળ હાથ ધરી હતી.