પરસોત્તમ રૂપાલાને ચૂંટણી પંચની ક્લીનચીટ

ક્ષત્રિય સમાજ વિષે ટિપ્પણી કરવા બદલ ચૂંટણી પંચમા થઈ હતી ફરિયાદ : રાજકોટ જિલ્લા ચૂંટણી અધિકારીએ તપાસ કરી અહેવાલ પંચમાં મોકલ્યા બાદ પંચે જાહેર કર્યો નિર્ણય

સમગ્ર રાજ્યમાં જ નહીં બલ્કે દેશભરમાં ચકચાર જગાવનાર ભાજપના નેતા અને રાજકોટ લોકસભા બેઠકના ઉમેદવાર પરસોત્તમ રૂપાલાએ ક્ષત્રિય સમાજ વિશે કરેલી ટિપ્પણી બાદ સૌરાષ્ટ્ર-કચ્છ, ઉત્તર, મધ્ય અને દક્ષિણ ગુજરાતમાં ક્ષત્રિય સમાજ રૂપાલાની ટિકીટને રદ્દ કરવાની માંગ કરી રહ્યો છે. જો કે આ નિવેદન મામલે ચૂંટણી પંચે રૂપાલાને ક્લીનચિટ આપી દીધી છે.

તાજેતરમાં ભાજપના ઉમેદવાર પરસોત્તમ રૂપાલાએ એક કાર્યક્રમ દરમિયાન ક્ષત્રિય સમાજ વિશે અશોભનીય ટિપ્પણી કરી હતી, આ પછી આખા ગુજરાતમાં રૂપાલા વિરૂદ્ધ રોષ ફેલાયો અને વિરોધ શરૂ થયો હતો, હવે આ મામલે ચૂંટણી પંચને ફરિયાદ થઈ હતી. પરિણામે ચૂંટણી પંચે જિલ્લા ચૂંટણી અધિકારીને તપાસના આદેશ આપ્યા હતા. ત્યારબાદ ચૂંટણી અધિકારીએ તપાસ કરાવી રિપોર્ટ ચૂંટણી પંચને સોંપ્યો હતો. હવે પરસોત્તમ રૂપાલાને રાજ્ય ચૂંટણી પંચની ક્લિનચીટ મળી છે,

રાજ્યમાં ઠેર ઠેર ક્ષત્રિય સમાજ દ્વારા રૂપાલા વિરુદ્ધ વિરોધ શરૂ થયો છે, ક્ષત્રિય સમાજ રેલીઓ કરીને આવેદનપત્ર આપીને ટિકીટ રદ્દ કરવાની માંગ કરી રહ્યાં છે, ત્યારે રાજયના ચૂંટણી પંચે રૂપાલાને ક્લિનચીટ આપી છે સૂત્રોના જણાવ્યા પ્રમાણે, ભાજપ નેતા પરસોત્તમ રૂપાલાને રાજ્ય ચૂંટણી આયોગની ક્લિનચીટ મળી ગઇ છે. જિલ્લા ચૂંટણી અધિકારીના રિપોર્ટના આધારે ક્લિનચીટ મળી છે. ખાસ વાત છે કે, ક્ષત્રિય સમાજે રૂપાલા વિરૂદ્ધ આ નિવદેન અંગે ફરિયાદ કરી હતી.

ઉલ્લેખનીય છે કે પરસોત્તમ રૂપાલાએ તાજેતરમાં ચૂંટણી પ્રચાર દરમિયાન રાજકોટમાં વાલ્મિકી સમાજના એક સ્નેહમિલન સમારોહમાં સભા સંબોધી હતી. આ દરમિયાન રૂપાલાએ રજવાડાઓને લઈને વિવાદિત નિવેદન આપ્યુ હતુ. આ સભામાં તેમને કહ્યું હતુ કે, અંગ્રેજોએ દમન કરવામાં કંઈ બાકી નહોંતુ રાખ્યુ અને મહારાજાઓ નમ્યા, રાજા- મહારાજાઓએ રોટી-બેટીના વ્યવહારો કર્યા પણ મારા રૂખી સમાજે ન તો ધરમ બદલ્યો ન તો વ્યવહારો કર્યા. સૌથી વધુ દમન તેમના પર થયા હતા. આજે હજાર વર્ષે રામ એમના ભરોસે આવ્યો છે. એ સમયે તેમની તલવાર આગળ પણ નહોંતા ઝુક્યા. પરસોત્તમ રૂપાલાના આવા વિવાદિત નિવેદનો બાદ સમગ્ર ગુજરાતમાં વિરોધ ઉગ્ર બન્યો હતો.