ડીજે સામે ડીએમ ! રાજકોટમાં 15 પાર્ટી પ્લોટમાં ધ્વનિ પ્રદુષણ મામલે તપાસ, 3 પાર્ટીપ્લોટ વિરુદ્ધ ગુન્હો દાખલ
રાજકોટ શહેર અને શૅર બહાર કાન ફાડી નાખે તેવા ડીજે સાઉન્ડના ઘોંઘાટ સામે અંતે તંત્ર જાગ્યું છે. શહેરનાં રંગોલી પાર્ક વિસ્તારમાં આવેલ ખુલ્લા પાર્ટી પ્લોટમાં થતા કાર્યક્રમોના કારણે વારંવાર થતા ધ્વનિ પ્રદુષણ અંગે સ્થાનિકો દ્વારા ફરિયાદ બાદ ડીજે સામે ડીએમ એટલે કે જિલ્લા કલેકટર દ્વારા તપાસના આદેશ કરતા સ્નયુક્ત ટીમોએ 15 પાર્ટીપ્લોટમાં તપાસ કરી 3 પાર્ટીપ્લોટ વિરુદ્ધ ગુન્હો દાખલ કરી સાઉન્ડ સિસ્ટમના સ્પીકર કબ્જે કરવામાં આવ્યા હોવાનું જિલ્લા કલેકટર પ્રભવ જોશીએ જાહેર કર્યું હતું.
જિલ્લા કલેકટર અને જિલ્લા મેજીસ્ટ્રેટ પ્રભવ જોશીએ જણાવ્યું હતું કે, શહેરના રંગોલી પાર્ક વિસ્તારમાં પાર્ટીપ્લોટમાં મોડીરાત્રી સુધી ડીજે વગાડી થતા ધ્વનિ પ્રદુષણ મામલે રાજકોટ તાલુકા મામલતદાર, પ્રદુષણ નિયંત્રણ બોર્ડ, તાલુકા પોલીસ સ્ટેશન અને આર.એમ.સી.ના અધિકારીઓની તપાસ ટીમ બનાવી રંગોલી પાર્ક વિસ્તારમાં આવેલ તમામ પાર્ટી પ્લોટની તપાસ કરવા આદેશ કર્યો હતો.તપાસ ટીમ દ્વારા તા.29/05/2025ના રોજ રંગોલી પાર્ક વિસ્તારમાં આવેલ કુલ-15 પાર્ટી પ્લોટની તપાસ કરવામાં આવી હતી. જેમાં ત્રણ પાર્ટીપ્લોટ સંચાલકો વિરુદ્ધ ગુન્હા દાખલ કરવામાં આવ્યા હતા.
આ પણ વાંચો : રાજકોટના તોલમાપ અધિકારીના તોડકાંડમાં ગાંધીનગરથી થશે તપાસ : જિલ્લા કલેકટરે રિપોર્ટ કર્યા બાદ તપાસનો ધમધમાટ
વધુમાં ધ્વનિ પ્રદુષણ અંગે GPCB ના નિયમો તથા પોલીસ કમિશનર રાજકોટ શહેરના જાહેરનામાના ભંગ બદલ પાર્ટી પ્લોટના માલિક તેમજ આયોજકો સામે ભારતીય ન્યાય સંહિતાની કલમ-223 મુજબના કુલ-3 ગુન્હાઓ નોંધવામાં આવ્યા હતા. ધ્વનિ પ્રદુષણ ફેલાવતા સાઉન્ડ સિસ્ટમ, ડી.જે.ના સ્પીકર પોલીસ દ્વારા કબ્જે લેવામાં આવ્યા હતા. સાથે જ આગામી સમયમાં પણ ધ્વનિ પ્રદુષણ અંગેના નિયમોના ભંગ બદલ પ્રદુષણ નિયંત્રણ બોર્ડ-રાજકોટ, પોલીસ કમિશનર, રાજકોટ મહાનગર પાલિકા અને રાજકોટ તાલુકા મામલતદાર દ્વારા સમયાંતરે કાર્યવાહી કરવામાં આવશે તેમ જાહેર કરાયું હતું.
