રાજકોટમાં આવતીકાલથી શરૂ થશે લોકમેળાના સ્ટોલ-પ્લોટના ફોર્મનું વિતરણ, જાણો સ્ટોલ મેળવવા કેટલી ડિપોઝિટ ચૂકવવી પડશે

આગામી તા.14થી 18 ઓગસ્ટ દરમિયાન શહેરના રેસકોર્સ મેદાન ખાતે યોજાનાર જન્માષ્ટમી લોકમેળા માટે પ્રથમ વખત જ જિલ્લા વહીવટીતંત્ર દ્વારા બે મહિના અગાઉ સ્ટોલ-પ્લોટ બુકીંગ માટે ફોર્મ વિતરણ શરૂ કરવાનું જાહેર કર્યું છે ત્યારે આગામી તા.9ને સોમવારથી શહેરના શાસ્ત્રીમેદાન નજીક તોરલ બીલ્ડીંગમાં આવેલ ઇન્ડિયન બેંક અને સીટી પ્રાંત-1 જૂની કલેકટર કચેરી ખાતે સવારે 11 થી બપોર 4 દરમિયાન આગામી તા.13 જૂન સુધી ફોર્મ વિતરણ કરવામાં આવશે.

લોકમેળા સમિતિ આયોજિત જન્માષ્ટમી લોકમેળાની તૈયારીઓના ધમધમાટ વચ્ચે જિલ્લા વહીવટીતંત્ર દ્વારા રાજ્ય સરકારની એસઓપીનું ચુસ્તપણે પાલન થાય તે માટે આગોતરું આયોજન કરી ઇતિહાસમાં પહેલી વખતે લોકમેળાના બે મહિના પૂર્વે જ સ્ટોલ અને પ્લોટ બુકીંગ માટે આગામી તા.9ને સોમવારથી  ફોર્મ વિતરણ કરી 23 જૂને રમકડાં, ખાણી પીણી અને નાની – મધ્યમ ચકરડી કેટેગરીના ડ્રો તેમજ તા.26ના રોજ ખાણીપીણી, યાંત્રિક અને આઈસ્ક્રીમ સહિતની કેટેગરીના સ્ટોલ-પ્લોટ માટે હરરાજી કરવા આયોજન કર્યું છે.

આ પણ વાંચો : રાજકોટમાં એકલા રહેતા 70 વર્ષીય વૃદ્ધની હત્યાનો ભેદ ઉકેલાયો : લૂંટના ઇરાદે પ્રેમી પંખીડાએ ઢીમ ઢાળી દીધું

જન્માષ્ટમી લોકમેળામાં સ્ટોલ અને પ્લોટના ભાવમાં આ વર્ષે કોઈ ભાડા વધારો કરાયો નથી. ડ્રો કેટેગરીમાં રમકડાં અને નાની ખાણીપીણીના સ્ટોલ માટે એડવાન્સ રકમ 40 હજાર,જયારે મધ્યમ ચકરડી માટે 25 હજાર અને નાની ચકરડી માટે 15 હજાર રાખવામાં આવ્યા છે. ડ્રો કેટેગરીમાં ડિપોઝીટ રાખવામાં આવી નથી. જયારે ખાણીપીણી મોટી કેટેગરીમાં 25 હજાર એડવાન્સ અને 15000 ડિપોઝીટ, ખાણીપીણી બી-1માં 20 હજાર એડવાન્સ અને 5000 ડિપોઝીટ, યાંત્રિક કેટેગરીમાં 20 હજાર એડવાન્સ અને 30 હજાર ડિપોઝીટ, આઈસ્ક્રીમ ચોકઠાં માટે 30 હજાર ડિપોઝીટ અને 30 હજાર એડવાન્સ તેમજ ટી કોર્નર માટે 30 હજાર એડવાન્સ અને 20 હજાર ડિપોઝીટ રાખવામાં આવી છે.