સ્વર્ગમાં આફત : વૈષ્ણોદેવી યાત્રા રૂટ પર ભૂસ્ખલનથી 31 લોકોના મોત, જમ્મુ-કટરા હાઇવે બંધ, 22 ટ્રેનો રદ
જમ્મુ અને કાશ્મીરમાં છેલ્લા કેટલાય દિવસોથી ચાલી રહેલા ભારે વરસાદના પગલે મંગળવારે માતા વૈષ્ણો દેવી યાત્રામાર્ગ પર અચાનક ભૂસ્ખલન થયું હતું જેમાં 31 ભાવિકોના મૃત્યુ થયા હતા અને 23 ઘાયલ થયા હતા. યાત્રા રોકી દેવાઈ હતી. બચાવ રાહત કાર્ય તરત જ શરૂ કરી દેવાયું હતું. અરુણાચલ પ્રદેશમાં પણ અનેક જગ્યાએ ભૂસ્ખલનથી વાહનો તણાઇ ગયા હતા. મકાનોને ભારે નુકસાની થઈ હતી. આમ જમ્મુ-કાશ્મીર અને હિમાચલમાં કુદરતનો કહેર દેખાયો હતો . કુલ્લૂ-મનાલીમાં પણ રૌદ્ર સ્વરૂપ જોવા મળ્યું હતું. નદીઓ બે કાંઠે વહી રહી છે.
ભારે વરસાદને કારણે પરિસ્થિતિ વધુ વણસી
જમ્મુ અને કાશ્મીરમાં સતત ભારે વરસાદને કારણે પરિસ્થિતિ વધુ વણસી છે. કટરા ખાતે માતા વૈષ્ણો દેવી યાત્રા રૂટ પર બુધવારે થયેલા મોટા ભૂસ્ખલનમાં ઓછામાં ઓછા 31 લોકોના મોત થયા છે અને 23 લોકો ઘાયલ થયા છે. ઘણી જગ્યાએ ભૂસ્ખલન બાદ કાટમાળ જમા થવા અને પથ્થર પડવાને કારણે જમ્મુ-કટરા હાઇવે બંધ કરવામાં આવ્યો છે. ભારે વરસાદને કારણે, ઉત્તર રેલ્વેએ બુધવારે 22 ટ્રેનો રદ કરી હતી અને 27 ટ્રેનોને ટૂંકાવી હતી. આમાં વૈષ્ણો દેવી બેઝ કેમ્પથી દોડતી 9 ટ્રેનોનો સમાવેશ થાય છે.
ત્રિકુટા ટેકરી પર સ્થિત મંદિર તરફ જવાના માર્ગનો મોટો ભાગ ગઈકાલે કાટમાળમાં ફેરવાઇ ગયો હતો. બચાવ કામગીરી ચાલુ છે અને એવી આશંકા છે કે વધુ લોકો કાટમાળ નીચે ફસાયેલા હોઈ શકે છે. સતત વરસાદને કારણે જમ્મુ અને કાશ્મીરમાં પૂર અને ભૂસ્ખલનની સ્થિતિ સર્જાઈ છે. જમ્મુમાં પુલ તૂટી પડ્યા, વીજળીના લાઇનો અને મોબાઇલ ટાવરોને ભારે નુકસાન થયું. મંગળવારે સવારે 11.30 થી સાંજે 5.30 વાગ્યા સુધી 6 કલાકમાં જમ્મુમાં 22 સેમી વરસાદ પડ્યો હતો. જોકે, મધ્યરાત્રિ પછી વરસાદ ઓછો થયો હતો, જેનાથી જિલ્લામાં થોડી રાહત થઈ હતી.
3,500થી વધુ લોકોને સુરક્ષિત સ્થળોએ ખસેડવામાં આવ્યા
દરમિયાન, મંગળવાર સુધી અવિરત વરસાદને કારણે પૂર અને પાણી ભરાઈ જવાને કારણે 3,500 થી વધુ લોકોને સુરક્ષિત સ્થળોએ ખસેડવામાં આવ્યા હતા. જિલ્લા વહીવટીતંત્ર, જેકે પોલીસ, એનડીઆરએફ, એસડીઆરએફ, ભારતીય સેના અને સ્થાનિક સ્વયંસેવકોની સંયુક્ત ટીમો દ્વારા રાહત કાર્ય હાથ ધરવામાં આવી રહ્યું છે. અસરગ્રસ્ત લોકોને કામચલાઉ આશ્રયસ્થાનોમાં ખોરાક, સ્વચ્છ પાણી અને તબીબી સહાય પૂરી પાડવામાં આવી રહી છે.
જોકે, કેન્દ્રશાસિત પ્રદેશના ઘણા ભાગોમાં ટેલિકોમ બ્લેકઆઉટ જોવા મળ્યું છે, જેના કારણે લાખો લોકો સંપર્કથી દૂર રહ્યા છે. વહીવટીતંત્ર ઉચ્ચ જોખમી વિસ્તારોમાંથી લોકોને સુરક્ષિત સ્થળોએ ખસેડવા પર ધ્યાન કેન્દ્રિત કરી રહ્યું છે.
જમ્મુ અને આસપાસના વિસ્તારોમાં વાવાઝોડું અને વરસાદ
હાલમાં જમ્મુ અને આસપાસના વિસ્તારોમાં ભારે વાવાઝોડા અને ભારે વરસાદ પડી રહ્યો છે. સૌથી વધુ અસરગ્રસ્ત વિસ્તારો છે – જમ્મુ શહેર, આરએસ પુરા, સાંબા, અખનૂર, નાગરોટા, કોટ ભલવાલ, બિશ્નાહ, વિજયપુર, પુરમંડલ, કઠુઆ અને ઉધમપુર. બીજી તરફ, રિયાસી, રામબન, ડોડા, બિલ્લાવર, કટરા, રામનગર, હીરાનગર, ગુલ અને બનિહાલમાં હળવો વરસાદ પડી રહ્યો છે.
જમ્મુ અને કાશ્મીરના અનેક જિલ્લાઓમાં રેડ એલર્ટ
હવામાન નિષ્ણાતો કહે છે કે વાદળો 12 કિમીની ઊંચાઈએ પહોંચી રહ્યા છે, જે ખૂબ જ સક્રિય વાવાઝોડાનો સંકેત છે. સિસ્ટમ પૂર્વ-ઉત્તરપૂર્વ તરફ આગળ વધી રહી છે અને પર્વતીય અને મેદાની વિસ્તારોમાં વરસાદ ચાલુ રહી શકે છે.
ભારે વરસાદને કારણે 22 ટ્રેનો રદ
ભારે વરસાદને કારણે, ઉત્તર રેલ્વેએ બુધવારે 22 ટ્રેનો રદ કરી છે અને 27 ટ્રેનો ટૂંકા ગાળાની કરવામાં આવી છે. કટરા, જમ્મુ અને ઉધમપુરથી ચાલતી ઘણી સેવાઓ પ્રભાવિત થઈ છે, જેમાં વૈષ્ણોદેવી બેઝ કેમ્પથી ચાલતી 9 ટ્રેનોનો સમાવેશ થાય છે. ચક્કી નદીમાં પૂરને કારણે પઠાણકોટ-કંદોરી (હિમાચલ પ્રદેશ) વચ્ચેનો રેલ વ્યવહાર પણ બંધ કરવામાં આવ્યો છે. જોકે, કટરા-શ્રીનગર રૂટ પર કોઈ અસર થઈ નથી.
