ઓફ સ્પિન બોલરો સામે ડિફેન્ડિંગ ચેમ્પિયન ભારતની હાલત ઝીમ્બાબ્વે કરતાં પણ ખરાબ! સુપર-8માં મુશ્કેલીમાં મુકાઈ શકે ટીમ ઈન્ડિયા
ડિફેન્ડિંગ ચેમ્પિયન ટીમ ઈન્ડિયાએ ‘અજેય’ રહીને વર્લ્ડકપના સુપર-8 રાઉન્ડમાં જગ્યા બનાવી છે. હવે રવિવારે તેની ટક્કર દક્ષિણ આફ્રિકા સામે થશે. આફ્રિકા પણ આ વર્લ્ડકપમાં એક પણ મેચ હાર્યું નથી. સૂર્યકુમાર યાદવની આગેવાનીવાળી ભારતીય ટીમ ભલે ગ્રુપ સ્ટેજના તમામ મુકાબલા જીતીને સુપર-8માં પહોંચી હોય પરંતુ આ મેચમાં ઓફ સ્પિનર સામે તેની નબળાઈ ઉડીને સામે આવી છે. ટી-20 ક્રિકેટમાં જ્યાં 8 થી 9 રન પ્રતિ ઓવર સામાન્ય માનવામાં આવે છે ત્યાં ભારતના બેટરોએ ઓફ સ્પિનર વિરુદ્ધ 6.23 રન પ્રતિ ઓવરની રફ્તારથી રન બનાવ્યા છે.
ગ્રુપ સ્ટેજમાં ભારતે ઓફ સ્પિનના 102 બોલનો સામનો કર્યો છે અને સતત વિકેટ ગુમાવી છે. આંકડા કહે છે કે જે 13 ટીમે ઓફ સ્પિનની ઓછામાં ઓછી 6 ઓવર રમી છે તેમાં ભારતની રન ગતિ માત્ર નેપાળ (5.25 રન) અને ઓમાન (5.42 રન) કરતા સારી રહી છે. માત્ર રનગતિ જ નહીં પરંતુ સરેરાશ પણ ચિંતા વધારી રહી છે. ઓફ સ્પિન સામે ભારતીય બેટરોની સરેરાશ માત્ર 13.25ની રહી છે જે ભારત માટે અત્યંત સાધારણ છે. આ જ કારણ છે કે દરેક વિરોધી ટીમ હવે એક જેવી રણનીતિ અપનાવી રહી છે. પાવરપ્લેમાં ઓફ સ્પિન, ડાબા હાથના બેટરો પર દબાણ અને રન ગતિ પર અંકુશ જેવી રણનીતિ અપનાવી રહી છે.
ભારતના ટોચના ક્રમના બેટરોમાં અભિષેક શર્મા, ઈશાન કિશન અને તિલક વર્મા ત્રણેય ડાબા હાથના બેટર છે જેનાથી હરિફ ટીમને રણનીતિ બનાવવામાં સરળતા રહે છે. નેધરલેન્ડના આર્યન દત્તે પાવરપ્લેમાં 3 ઓવર ફેંકીને અભિષેક અને કિશન બન્નેને આઉટ કર્યા હતા. આર્યને 4 ઓવરમાં 19 રન આપીને 2 વિકેટ લીધી હતી. આ પહેલાં નામીબિયાના કેપ્ટન ગેરહાર્ડ ઈરાસ્મસે અલગ-અલગ રિલિઝ પોઈન્ટથી બેટરને મુંઝવ્યા હતા. પાકિસ્તાનના સલામ આગા અને સૈમ અયૂબે વિવિધતાઓ સાથે રફ્તાર ઉમેરી હતી.
