ખંઢેરી સ્ટેડિયમ નજીક દંપતી ખંડિત : ટ્રકે બાઈકને ઠોકર મારતા પતિનું મોત
બહેનને મળીને જામનગરથી રાજકોટ આવતા હતા ત્યારે ખંઢેરી નજીક અકસ્માત નડયો : પત્ની ઇજાગ્રસ્ત
શહેરના જામનગર રોડ ખંઢેરી સ્ટેડિયમ નજીક ટ્રકના ચાલકે બાઇકને ઠોકરે ચડાવી દેતાં બાઇ કચાલક રાજકોટના પ્રૌઢ અને તેમના પત્નિ ફંગોળાઇ જતાં ઇજાઓ થઇ હતી. બંનેને સારવાર માટે હોસ્પિટલમાં ખસેડયા હતાં. પરંતુ પ્રૌઢે દમ તોડી દેતાં દંપતિ ખંડીત થયું હતું. આ બનાવને પગલે પરિવારમાં ગમગીની વ્યાપી ગઇ હતી.
વિગત મુજબ ગોંડલ રોડ પર ખોડિયાર હોટેલ પાછળ કલ્પવન સોસાયટીમાં રહેતાં દિનેશભાઇ વલ્લભભાઇ સરવૈયા (ઉ.વ. ૫૭) બાઇક પર જામનગર રહેતાં બહેનને ત્યાં આટો દેવા ગયા હતાં. સાથે તેમના પત્નિ રમાબેન પણ હતાં. સાંજે તેઓ પરત રાજકોટ આવવા નીકળ્યા ત્યારે ખંઢેરી સ્ટેડિયમ નજીક મુરલીધર હોટેલ પાસે પહોંચ્યા ત્યારે ટ્રકના ચાલકે બાઇકને ઠોકરે ચડાવતાં પતિ-પત્નિ બંને ફંગોળાઇ જતાં ઇજાઓ થતાં રાજકોટ સિવિલ હોસ્પિટલમાં ખસેડયા હતાં. જો કે અહિ દિનેશભાઇએ સારવાર દરમિયાન દમ તોડી દેતાં અરેરાટી વ્યાપી ગઇ હતી. તેમના પત્નિને સારવાર માટે દાખલ કરાયા હતાં. દિનેશભાઇ સરવૈયા એક બહેન અને ત્રણ ભાઇમાં વચેટ હતાં. તેઓ રીબડા નજીક શક્તિમાન ફેક્ટરીમાં નોકરી કરતાં હતાં.સંતાનમાં એક પુત્ર અને એક પુત્રી છે. બનાવ પગલે પડધરી પોલીસે ટ્રક ચાલક વિરૂધ્ધ ગુનો નોંધી તેની શોધખોળ શરુ કરી છે.
