પાન મસાલાની જાહેરાત પર ફરી વિવાદ: ગ્રાહક અદાલતે સલમાન ખાનને ફટકારી નોટિસ, ભાઈજાન પાસે માગ્યો જવાબ
સલમાન ખાન કોઈને કોઈ બાબતને લઈને ચર્ચામાં રહેતા હોય છે. હાલ તેઓ પોતાની ફિલ્મ બેટલ ઓફ ગલવાનને લઈને ચર્ચામાં છે ત્યારે તેઓ ફરીવાર એક વિવાદમાં સપડાઈ ગયા છે. કોટાની ગ્રાહક અદાલતમાં ફરી એકવાર પાન મસાલાની જાહેરાત પર પ્રતિબંધ મૂકવાની માંગણી કરતી ફરિયાદ દાખલ કરવામાં આવી છે. આ ફરિયાદ દાખલ થયા બાદ, કોર્ટે બોલિવૂડ સ્ટાર સલમાન ખાન અને પાન મસાલા કંપનીને નોટિસ જારી કરીને તેમનો જવાબ માંગ્યો છે. આ કેસની આગામી સુનાવણી 27 નવેમ્બરે થશે. આ ફરિયાદ ભારતીય જનતા પાર્ટીના વરિષ્ઠ નેતા અને રાજસ્થાન સુપ્રીમ કોર્ટના એડવોકેટ ઇન્દ્ર મોહન સિંહ હની દ્વારા દાખલ કરવામાં આવી છે. જેમાં પાન મસાલાની જાહેરાત બંધ કરવાની માંગ કરવામાં આવી છે.
શું છે સમગ્ર મામલો?
કોટા ગ્રાહક સુરક્ષા કોર્ટે બોલિવૂડ અભિનેતા સલમાન ખાન અને રાજશ્રી પાન મસાલા કંપનીને નોટિસ ફટકારી છે, જેમાં તેમને 27 નવેમ્બર સુધીમાં જવાબ આપવાનું કહેવામાં આવ્યું છે. આ મામલો કેસર ધરાવતા પાન મસાલાની જાહેરાત સાથે સંબંધિત છે. કોર્ટે આ કાર્યવાહી ગેરમાર્ગે દોરતી જાહેરાતની ફરિયાદના આધારે કરી છે.
કોટાના વરિષ્ઠ ભાજપ નેતા અને રાજસ્થાન હાઈકોર્ટના વકીલ ઈન્દ્ર મોહન સિંહ હની દ્વારા ફરિયાદ દાખલ કરવામાં આવી હતી. તેમણે જણાવ્યું હતું કે કંપની પાઉચમાં કેસર હોવાનો દાવો કરીને લોકોને ગેરમાર્ગે દોરી રહી છે. ફરિયાદમાં જણાવાયું છે કે અસલી કેસરની કિંમત પ્રતિ કિલોગ્રામ આશરે 4 લાખ રૂપિયા છે. તેથી, પાંચ રૂપિયાના પાઉચમાં અસલી કેસર નાખવું અશક્ય છે.
અભિનેતા સલમાન ખાનને નોટિસ
વકીલ રિપુદમન સિંહે કહ્યું કે કંપની અને બ્રાન્ડ એમ્બેસેડર સલમાન ખાન બંને જનતાને ગેરમાર્ગે દોરી રહ્યા છે. આ જાહેરાત યુવાનોને પાન મસાલા અને તમાકુ ઉત્પાદનો તરફ આકર્ષિત કરી રહી છે, જે તેમના સ્વાસ્થ્ય પર હાનિકારક અસર કરી શકે છે. ફરિયાદમાં કહેવામાં આવ્યું છે કે આવા ઉત્પાદનોની જાહેરાત કરવાથી કેન્સર જેવા રોગોનું જોખમ વધે છે. ત્યારે એવી પણ માંગ કરી હતી કે સ્વાસ્થ્ય માટે હાનિકારક ઉત્પાદનોનો પ્રચાર તાત્કાલિક બંધ કરવામાં આવે અને સલમાન ખાનના રાષ્ટ્રીય પુરસ્કારો પાછા ખેંચવામાં આવે. તેમણે કહ્યું કે ફક્ત પૈસા માટે જનતાને ગેરમાર્ગે દોરવી યોગ્ય નથી.
27 નવેમ્બર સુધીમાં પોતાનો કેસ રજૂ કરવો પડશે
કોર્ટે આ મામલાની નોંધ લીધી છે અને સલમાન ખાન અને કંપનીને નોટિસ ફટકારી છે. બંનેએ હવે ૨૭ નવેમ્બર સુધીમાં પોતાનો કેસ રજૂ કરવો પડશે. સેલિબ્રિટી એન્ડોર્સમેન્ટ અને ગ્રાહક અધિકારોને લઈને આ મામલો દેશભરમાં ચર્ચાનો વિષય બની ગયો છે.
