રાજ્યના રેવન્યુ કાયદાને સરળ બનાવવા વિચારણા

જમીન માટે નોન-એગ્રીકલ્ચર સર્ટિફિકેટ મેળવવાની પ્રોસેસ જ દૂર કરાય તેવી શક્યતા
ચાર સભ્યોની એક સમિતિએ રેવન્યુ કાયદાની સમીક્ષા કરી સુધારા સૂચવ્યા

ગુજરાતમાં રિયલ એસ્ટેટ ડેવલપમેન્ટ માટે સરકાર કેટલાક નિયમોનું સરળીકરણ કરવા વિચારે છે. જે એરિયામાં ટાઉન પ્લાનિંગ (TP) સ્કીમ અમલમાં મૂકી દેવાઈ હશે ત્યાં જમીનના બિન ખેતી (NA) સર્ટિફિકેશનની પ્રક્રિયા કરવાની કોઈ જરૂર નહીં રહે. કોઈ પણ જમીન માટે નોન-એગ્રીકલ્ચર સર્ટિફિકેટ મેળવવાની પ્રક્રિયા માથાના દુખાવા સમાન હોય છે. પરંતુ હવેથી આ સર્ટિફિકેશનની પ્રોસેસ જ દૂર કરવામાં આવે તેવી શક્યતા છે. ગુજરાત સરકારે ગયા મહિને ચાર સભ્યોની એક સમિતિની રચના કરી હતી જે હાલના રેવન્યુ કાયદાની સમીક્ષા કરશે, જુદા જુદા હિતધારકો પાસેથી ફીડબેક મેળવશે અને જરૂરી સુધારા સૂચવશે. તેનાથી ગુજરાતમાં રેવન્યુ વહીવટ વધુ કાર્યક્ષમ રીતે થાય તેવી શક્યતા છે.

જમીનો માટે NA મેળવવાની પ્રક્રિયા બહુ ત્રાસદાયક અને લાંબી હોય છે તેવી ફરિયાદો મળ્યા પછી તેમાં સુધારા કરવાની જરૂરિયાત પેદા થઈ છે. કમિટીએ પોતાની ભલામણો સરકારને સૂચવી દીધી છે. આ કમિટીનું અધ્યક્ષપદ ભૂતપૂર્વ IAS અધિકારી સી એલ મીણાએ સંભાળ્યું હતું.

સૂત્રોના જણાવ્યા પ્રમાણે રેવન્યુ કાયદાની સમીક્ષા કરનાર સમિતિએ સૂચન કર્યું હતું કે જે વિસ્તારમાં TP સ્કીમ અમલમાં આવી ગઈ હોય અથવા ડ્રાફ્ટ TP સ્કીમ તૈયાર થઈ રહી હોય ત્યાં જમીન NA કરવાની પ્રોસેસ નાબૂદ કરવી જોઈએ. હવે નવા રેવન્યુ મિકેનિઝમની જાહેરાત થશે ત્યારે સરકાર આ દરખાસ્તને સ્વીકારે તેવી શક્યતા છે.

સરકારને જમીનોના NA સર્ટિફિકેશનમાંથી જે આવક થાય છે તે જળવાઈ રહે તે રીતનો એપ્રોચ લેવામાં આવશે. આ ઉપરાંત જમીનને નવા ગાળામાંથી જૂના ગાળામાં કન્વર્ટ કરતી વખતે જે પ્રીમિયમ મળે છે તે પણ જળવાશે.

હાલમાં ખેડૂત ન હોય તેવી વ્યક્તિ ખેતીની જમીન ખરીદી શકતી નથી. આવા કોઈ સોદા થયા હોય તો સરકાર તે જમીન પાછી લઈ લે છે. નવા કાયદામાં સરકાર આ શરત દૂ કરે તેવી શક્યતા છે. તેવી જ રીતે જેમાં જુદા જુદા કારણોથી એનએ સર્ટિફિકેશન થઈ શકતું ન હોય ત્યાં પણ પ્રક્રિયા વધારે સરળ બનશે.

સરકાર જમીનને નવા ગાળામાંથી જૂના ગાળામાં રૂપાંતરિત કરવા માટે પ્રીમિયમ મેળવે છે. તેવી જ રીતે NA સર્ટિફિકેશન પ્રોસેસમાંથી પણ સરકારને કમાણી થાય છે. સરકાર નવી પદ્ધતિ અમલમાં મૂકશે ત્યારે તેની તિજોરીને રૂ. 5000 કરોડની આવક ગુમાવવી પડે તેવી શક્યતા છે. પરંતુ તેની સામે ટાઈટલ ક્લિયરન્સ ફી દ્વારા આ ખોટ સરભર કરવામાં આવશે તેમ સૂત્રોએ જણાવ્યું હતું. ગુજરાતમાં રેવન્યુ કાયદા સુધારીને તેને સરળ બનાવવામાં આવે તેવી ઘણા સમયથી માંગણી થઈ રહી છે. ખાસ કરીને રિયલ એસ્ટેટ સેક્ટરની ડિમાન્ડ હતી કે રાજ્યના મહેસુલ કાયદાને સરળ બનાવવા જોઈએ.

ગુજરાતમાં તાજેતરમાં સરકારે જંત્રીના દરમાં પણ તગડો વધારો કર્યો હતો જેનાથી સરકારની આવકમાં મોટો ઉછાળો આવવાની શક્યતા છે. જંત્રીના દર વધ્યા ત્યારે થોડા સમય માટે રિયલ્ટી સેક્ટરમાં ડીલને અસર થઈ હતી. પરંતુ એક વખત ચિત્ર સ્પષ્ટ થયા બાદ રિયલ એસ્ટેટ સેક્ટર પૂરજોશમાં કામ કરી રહ્યું છે. ખાસ કરીને જૂની સોસાયટીઓના રિડેવલપમેન્ટમાં પણ મોટો વધારો થયો છે.