ક્લસ્ટર બોમ્બ-નાનું પણ નાગનું બચ્ચુ ! એટલું ખતરનાક હથિયાર કે ક્યાં ત્રાટકે તે જ નક્કી નહીં,જાણો શું છે ખાસિયત

ઈરાન ઇઝરાયેલ યુદ્ધમાં ઈરાને શુક્રવારે પ્રથમ વખત ક્લસ્ટર બોમ્બનો ઉપયોગ કરતા માત્ર ઇઝરાયેલ જ નહીં પણ આખું વિશ્વ ચોંકી ઉઠ્યું છે. ક્લસ્ટર બોમ્બ એક એવું નાનું પણ ખતરનાક હથિયાર છે જેની ઘાતકતા નો અંદાજ લગાવવો મુશ્કેલ બની જાય છે.એ જ રીતે તેનો સામનો કરવાનું પણ અત્યંત મુશ્કેલ છે કારણ કે એક વખત આકાશમાં ફાટયા બાદ તેના બોમ્બ ક્યાં પડશે તેની કોઈ આગાહી નથી થઈ શકતી.

ક્લસ્ટર બોમ્બનું મિસાઈલ દ્વારા વહન થઈ શકે છે.તેને જમીન ઉપરથી પણ છોડી શકાય છે. ઈરાને શુક્રવારે મિસાઈલ સાથે મોકલેલ ક્લસ્ટર બોમ્બ સાત કિલોમીટરની ઊંચાઈએ મિસાઇલથી અલગ થઈને પછી આઠ કિલોમીટરની ત્રિજ્યામાં તેમાંથી અનેક બોમ્બ જમીન ઉપર ખાબક્યા હતા.ક્લસ્ટર બોમ્બની આ ખાસિયત જ તેને ખતરનાક શસ્ત્ર બનાવી દે છે.તેના બોમ્બ સેંકડો ફૂટબોલ મેદાન જેટલી જગ્યામાં આડેધડ ખાબકે છે.

આ બોમ્બમાંથી કેટલાકમાં તાત્કાલિક વિસ્ફોટ નથી થતો.પણ પડ્યા રહેલાં એ બોમ્બમાં ભવિષ્યમાં ગમે ત્યારે અણધાર્યો વિસ્ફોટ થઈ શકે છે.બીજા અર્થમાં એ લેન્ડ માઇન જેટલા જોખમી બની જાય છે.આવા બોમ્બને શોધવા અને નિષ્ક્રિય બનાવવા એ એક ખૂબ જટિલ અને ખર્ચાળ પ્રક્રિયા છે.આ ક્લસ્ટર બોમ્બ તેમના લક્ષ્યમાં ચોક્કસ નથી હોતા અને હવામાન અને અન્ય પર્યાવરણીય પરિબળો દ્વારા તેમની ચોકસાઈ પ્રભાવિત થઈ શકે છે. આથી, તે લશ્કરી લક્ષ્યની બહારના વિસ્તારોને પણ અસર કરી શકે છે

પ્રથમ વખત બીજા વિશ્વયુદ્ધમાં ઉપયોગ થયો હતો

ક્લસ્ટર બોમ્બનો પ્રથમ ઉપયોગ બીજા વિશ્વ યુદ્ધમાં થયો હતો અને શીત યુદ્ધ દરમિયાન અનેક દેશો દ્વારા મોટા પ્રમાણમાં ક્લસ્ટર મ્યુનિશનનો કરવામાં આવ્યો હતો. તેનો મુખ્ય હેતુ વિશાળ વિસ્તારમાં ફેલાયેલા વિવિધ લશ્કરી લક્ષ્યોને નિશાન બનાવવા, ટેન્કોનો નાશ કરવા અને સૈનિકોને મારવા અથવા ઘાયલ કરવાનો હતો. આ હથિયારની ઘાતક ક્ષમતાને ધ્યાનમાં લઈ વર્ષ 2008માં, કન્વેન્શન ઓન ક્લસ્ટર મ્યુનિશનની સ્થાપના કરવામાં આવી હતી અને ક્લસ્ટર મ્યુનિશનના ઉપયોગ, ઉત્પાદન, હસ્તાંતરણ અને સંગ્રહ પર પ્રતિબંધ મૂકવામાં આવ્યો હતો. 2010માં અમલમાં આવેલી એ સંધિ પર 123 રાષ્ટ્ર દ્વારા હસ્તાક્ષર કરવામાં આવ્યા હતા અને ક્લસ્ટર મ્યુનિશનના સંગ્રહને નષ્ટ કરવાનું નક્કી કરવામાં આવ્યું હતું.જોકે, રશિયા, યુક્રેન અને યુનાઇટેડ સ્ટેટ્સ સહિતના કેટલાક દેશોએ આ સંધિ પર હસ્તાક્ષર કર્યા નથી.

આ પણ વાંચો : અમદાવાદ વિમાન દુર્ઘટના બાદ DGCAની એર ઈન્ડિયા સામે કડક કાર્યવાહી : 3 અધિકારીઓને તાત્કાલિક હટાવવા આદેશ

આ વર્ષની શરૂઆતમાં, માર્ચમાં, રશિયાએ યુક્રેનના પૂર્વીય વિસ્તાર ડોબ્રોપિલિયા પર ક્લસ્ટર બોમ્બ વડે હુમલો કર્યો હતો જેમ 11 લોકો માર્યા ગયા હતા, જ્યારે 40 અન્ય ઘાયલ થયા હતા.