કશ્મીરના કયા વિસ્તારમાં ફરી ઘૂસણખોરીનો પ્રયાસ ? વાંચો
જમ્મુના કઠુઆમાં આતંકીઓએ સેનાના કાફલા પર હુમલો કરતાં પહેલા બંદૂકની અણીએ ગામના રહેવાસીઓને ડરાવી ભોજન બનાવડાવ્યું હતું તેવી હકીકત તપાસમાં બહાર આવી છે. ગામલોકોએ એવી માહિતી પણ આપી હતી કે આતંકીઓએ બોડી કેમેરા પહેરી રાખ્યા હતા.
આતંકીઓ સેનાના જવાનોના હથિયાર છીનવી લેવા માંગતા હતા. જો કે જવાનોએ ભારે બહાદુરી બતાવીને ઘાયલ થવા છતાં પણ હથિયારો સુરક્ષિત રાખ્યા હતા. આતંકીઓની આ યોજનાને જવાનોએ નિષ્કાળ બનાવી દીધી હતી. આતંકીઓ સેનાના કેમ્પસથી દૂરના વિસ્તારોમાં હુમલા કરતાં હતા.
ફરી પ્રયાસ; જવાનોનો ગોળીબાર
દરમિયાનમાં ગુરુવારે ફરી આતંકીઓએ કશ્મીરના નૌશેરા વિસ્તારમાં મોટા પાયે ઘૂસણખોરી કરવાનો પ્રયાસ કર્યો હતો. એમણે ધડાકા કરીને ઘૂસવાની યોજના બનાવી હતી પણ જવાનોએ ગોળીબાર શરૂ કરતાં આતંકીઓ નાસી ગયા હતા. ત્યારબાદ આ વિસ્તારમાં સર્ચ ઓપરેશન હાથ ધરાયું હતું.
આતંકીઓ આ વિસ્તારમાં છુપાયા હોવાની શંકા છે અને એમને શોધી કાઢવા અને પતાવી દેવા માટે જવાનોએ ચારેકોરથી વિસ્તારને ઘેરી લીધો હતો. હવે કોઈ આતંકી બચીને ભાગી શકશે નહીં તેવી જાળ બિછાવી દેવામાં આવી હતી.