દિલ્હીના ત્રીજા મહિલા મુખ્યમંત્રી બન્યા આતિશી : 5 મંત્રીઓ સાથે લીધા શપથ

• આપના 5 મંત્રીઓને પણ એલજી સક્સેનાએ શપથ લેવડાવ્યા; આતિશી દિલ્હીના ત્રીજા મહિલા મુખ્ય મંત્રી બન્યા; 4 જૂના મંત્રી, 1 નવો ચહેરો

આમ આદમી પાર્ટીના પૂર્વ મુખ્યમંત્રી અરવિંદ કેજરીવાલે મુખ્યમંત્રી પદેથી રાજીનામું આપી દીધા બાદ આપના સિનિયર નેતા આતિશીએ શનિવારે દિલ્હીના મુખ્યમંત્રી તરીકે રાજ ભવનમાં શપથ લીધાં હતા. આ સાથે જ ચાર જૂના મંત્રી ગોપાલ રાય, કૈલાશ ગેહલોત, સૌરભ ભારદ્વાજ અને ઈમરાન હુસૈન સિવાય કેબિનેટના નવા ચહેરા રૂપે સુલ્તાનપુર માજરાના ધારાસભ્ય મુકેશ કુમાર અહાવલતે પણ મંત્રી પદની શપથ લીધાં હતા. આતિશી દિલ્હીના ત્રીજા મહિલા મુખ્યમંત્રી બન્યા છે. એલજી સક્સેનાએ શપથ લેવડાવ્યા હતા.

મુકેશ અહલાવતના રૂપમાં એક અનુસૂચિત જાતિના ચહેરાને કેબિનેટમાં સ્થાન આપવામાં આવ્યું છે. જો કે, અનુસૂચિત જાતિના ચહેરાના રૂપમાં વિશેષ રવિ અને કુલદીપ કુમારના નામ પણ રેસમાં હતા. પરંતુ તેમના બદલે પ્રથમ વખતના ધારાસભ્ય મુકેશને મહત્ત્વ આપવામાં આવ્યું છે.

મુકેશે 2020માં આમ આદમી પાર્ટીની ટિકિટ પર સુલ્તાનપુર માજરાથી પ્રથમ વખત દિલ્હીની ચૂંટણી લડી હતી. તેમણે આ ચૂંટણીમાં 48,042 મતોથી જીત હાંસલ કરી હતી.

આતિશી સાથે જએમણે શપથ લીધા હતા તેમાં સૌરભ ભારદ્વાજ, ગોપાલ રાય, કૈલાશ ગહેલોત, ઈમરાન હુસેન અને મુકેશ અહલાવતનો સમાવેશ થાય છે.

કોણ છે આતિશી ?

આતિશીએ ઝડપથી આમ આદમી પાર્ટીમાં પોતાની ઓળખ બનાવી લીધી છે. આમ આદમી પાર્ટી તેના આઠ વર્ષના કાર્યકાળ દરમિયાન જે સિદ્ધિઓ સૌથી વધુ ગણાવી રહી છે તેમાં શિક્ષણનું ક્ષેત્ર ટોચ પર છે અને આનો ઘણો શ્રેય આતિશીને જાય છે. તેમણે 2013ની વિધાનસભા ચૂંટણી માટે પાર્ટીનો મેનિફેસ્ટો તૈયાર કરવામાં મહત્વની ભૂમિકા ભજવી હતી. 2014ની લોકસભા ચૂંટણી પહેલા તેમને પ્રવક્તા બનાવવામાં આવ્યા હતા.

પ્રારંભિક જીવન અને શિક્ષણ

આતિશીનો જન્મ 8 જૂન 1981ના રોજ દિલ્હીમાં થયો હતો. તેમના માતા-પિતા વિજય સિંહ અને ત્રિપ્તા વાહી દિલ્હી યુનિવર્સિટીમાં પ્રોફેસર હતા. તેમણે સ્પ્રિંગડેલ્સ સ્કૂલ, દિલ્હીમાંથી શાળાનો અભ્યાસ પૂર્ણ કર્યો અને ત્યારબાદ દિલ્હીની સેન્ટ સ્ટીફન્સ કોલેજમાંથી ઇતિહાસમાં સ્નાતકની ડિગ્રી મેળવી. ત્યારબાદ તેણે ચેવેનિંગ સ્કોલરશિપ પર ઓક્સફર્ડ યુનિવર્સિટીમાં પ્રાચીન અને આધુનિક ઇતિહાસમાં માસ્ટર્સ કર્યું.

આતિશીની રાજકીય કારકિર્દી

આતિશીએ 2012માં ભ્રષ્ટાચાર વિરોધી ચળવળ દરમિયાન રાજકારણમાં પ્રવેશ કર્યો હતો અને આમ આદમી પાર્ટીનો પાયો નાખનાર લોકોમાં સામેલ હતો. પાર્ટીને આજે જ્યાં છે ત્યાં સુધી લઈ જવામાં આતિશીએ મોટો ફાળો આપ્યો છે. તેણીએ પૂર્વ દિલ્હીથી 2019ની લોકસભા ચૂંટણી લડી હતી, પરંતુ હારી ગઈ હતી. 2020 માં, તેણી કાલકાજી વિધાનસભા ક્ષેત્રમાંથી ચૂંટણી જીતી અને ધારાસભ્ય બની. આ પછી, દિલ્હીના પૂર્વ ઉપમુખ્યમંત્રી મનીષ સિસોદિયા જેલમાં ગયા પછી તે શિક્ષણ મંત્રી બન્યા.

શિક્ષણ મંત્રી બન્યા બાદ ઘણા મોટા નિર્ણયો લીધા

શિક્ષણ મંત્રી બન્યા બાદ આતિશીએ દિલ્હીની શિક્ષણ વ્યવસ્થામાં મહત્વના સુધારા કર્યા છે. તેમણે મનીષ સિસોદિયાના સલાહકાર તરીકે પણ કામ કર્યું હતું અને શિક્ષણ નીતિઓ ઘડવામાં મહત્વની ભૂમિકા ભજવી હતી. આતિશી હાલમાં દિલ્હી સરકારમાં શિક્ષણ, PWD, સંસ્કૃતિ અને પર્યટન મંત્રી તરીકે સેવા આપી રહ્યા છે.