અરવિંદ કેજરીવાલે છોડ્યું દિલ્હીના CMનું પદ : LGને સોંપ્યું રાજીનામું, આતિશી સંભાળશે ‘કમાન’
આમ આદમી પાર્ટી (AAP) ધારાસભ્ય દળની બેઠક બાદ અરવિંદ કેજરીવાલ લેફ્ટનન્ટ ગવર્નર સચિવાલય પહોંચ્યા. અહીં કેજરીવાલ તેમના કેબિનેટ સાથીદારો સાથે પહોંચ્યા અને થોડા સમય બાદ તેમણે મુખ્યમંત્રી પદ પરથી રાજીનામું આપી દીધું. રવિવારે અરવિંદ કેજરીવાલે સીએમ પદ પરથી રાજીનામું આપવાનો નિર્ણય જાહેર કર્યો હતો. ત્યારે તેમણે કહ્યું હતું કે તેઓ મુખ્યમંત્રીની ખુરશી પર ત્યારે જ બેસશે જ્યારે જનતા તેમને ‘ઈમાનદારીનું પ્રમાણપત્ર’ આપશે.
આતિશીએ સરકાર બનાવવાનો દાવો કર્યો
લેફ્ટનન્ટ ગવર્નરને રાજીનામું સુપરત કર્યા બાદ આમ આદમી (AAP)ના નેતાઓ એલજી ઓફિસમાંથી બહાર આવી ગયા છે. અહીંથી બહાર આવતાની સાથે જ ગોપાલ રાયે મીડિયા સાથે વાત કરતા કહ્યું કે, ‘અમે અને આતિશી જીએ નવા સીએમ બનાવવાનો દાવો LGની સામે રજૂ કર્યો છે. આ સિવાય અમે લેફ્ટનન્ટ ગવર્નર પાસે શપથગ્રહણની તારીખ નક્કી કરવાની માંગ કરી છે.
કેજરીવાલની ઈમાનદારી પર કાદવ ઉછાળવામાં આવ્યો: ગોપાલ રાય
આતિશીના નામની જાહેરાત કરતા દિલ્હીના પરિવહન મંત્રી ગોપાલ રાયે કહ્યું- અમે મુશ્કેલ સંજોગોમાં આ નિર્ણય લીધો છે. કેજરીવાલની ઈમાનદારી પર કાદવ ઉછાળવામાં આવ્યો. જ્યાં સુધી જનતા તેમને પસંદ નહીં કરે ત્યાં સુધી તેઓ મુખ્યમંત્રીની ખુરશી પર બેસશે નહીં. બપોરે 1 વાગ્યે આતિશીએ મીડિયા સાથે વાત કરી અને કહ્યું, ‘હું મારા ગુરુ અરવિંદ કેજરીવાલજીનો આભાર માનું છું, જેમણે મને આટલી મોટી જવાબદારી આપી. મને અભિનંદન ન આપો, મને હાર પહેરાવશો નહીં, મારા અને દિલ્હીના લોકો માટે આ દુઃખદ ક્ષણ છે કે અમારા પ્રિય મુખ્યમંત્રી રાજીનામું આપશે.
ભગવાન દિલ્હીની રક્ષા કરે: સ્વાતિ માલીવાલ
આ દરમિયાન AAPના રાજ્યસભા સાંસદ સ્વાતિ માલીવાલે કહ્યું, ‘જેનો પરિવાર આતંકવાદી અફઝલ ગુરુ માટે લડ્યો હતો તેને આમ આદમી પાર્ટીએ મુખ્યમંત્રી બનાવ્યો છે. ભગવાન દિલ્હીની રક્ષા કરે. દિલ્હી માટે આજનો દિવસ ખૂબ જ દુઃખદ છે. 13 સપ્ટેમ્બરે દારૂ નીતિ કેસમાં સુપ્રીમ કોર્ટમાંથી જામીન મળ્યા બાદ કેજરીવાલે 15 સપ્ટેમ્બરે મુખ્યમંત્રી પદ છોડવાની જાહેરાત કરી હતી. તેમણે કહ્યું હતું કે, ‘હવે જનતાએ નક્કી કરવું જોઈએ કે હું ઈમાનદાર છું કે બેઈમાન. જો જનતા એ ડાઘ ધોઈ નાખશે અને વિધાનસભાની ચૂંટણી જીતશે તો હું ફરીથી ખુરશી પર બેસીશ.
