34 વર્ષ પહેલાના 20 રૂપિયાની લાંચના કેસમાં આરોપીની ધરપકડનો આદેશ
બિહારના ભૂતપૂર્વ કોન્સ્ટેબલના કરમ ફૂટ્યા
કહેવાય છે કે કર્મો ક્યારેય પીછો છોડતા નથી. એ યુક્તિને સાચી પાડતી ઘટના બિહારમાં બની છે. 34 વર્ષ પહેલા 20 રૂપિયાની લાંચ લેનાર પોલીસ કોન્સ્ટેબલને
હવે જેલના સળિયા ભોગવવા પડે તેવી સ્થિતિ નિર્માણ પામી છે.
ન્યાયતંત્રના ઇતિહાસમાં અભૂતપૂર્વ ગણી શકાય એવી એ ઘટનામાં બિહારના સ્પેશિયલ વિજિલન્સ જજ સ્વદેશ શ્રીવાસ્તવે 34 વર્ષ પહેલાં 20 રૂપિયાની લાંચ લેતા ઝડપાઈ ગયા બાદ ગુમ થઈ ગયેલા એક કોન્સ્ટેબલની ધરપકડ કરી અદાલતમાં હાજર કરવાનો આદેશ કર્યો હતો.
આ રસપ્રદ બનાવની વિગત એવી છે કે 6 મે 1990 ના રોજ બિહારના સાહરસા રેલવે સ્ટેશન પર સીતાદેવી નામની શાકભાજી વેચતી એક મહિલા પાસેથી 20 રૂપિયાની લાંચ લેતા કોન્સ્ટેબલ સુરેશ પ્રસાદ સિંઘને સ્ટેશન ઇન્ચાર્જએ રંગે હાથ ઝડપી લીધો હતો.
સુરેશ પ્રસાદને બાદમાં જામીન મળી ગયા હતા. જોકે એ પછી સુનાવણી દરમિયાન તે અદાલતમાં હાજર ન રહેતા 1999 માં તેના જામીન રદ કરી ધરપકડ વોરંટ ઇશ્યૂ કરવામાં આવ્યું હતું અને ત્યારથી આરોપી ભાગતો ફરતો હતો. 20 રૂપિયાની લાંચના કેસમાં અદાલતે તેની મિલકત સ્થગિત કરવાનો આદેશ કર્યા બાદ પણ આરોપી પોલીસને હાથ લાગતો નહતો.
દરમિયાન દાયકાઓ જુના પેન્ડિંગ કેસ નો નિકાલ લાવવાના અભિયાન અંતર્ગત આ કેસ ફરીથી ઊખડ્યો હતો. તપાસ દરમિયાન આરોપીએ પોતાનું ખોટું સરનામું આપ્યું હોવાનું ખુલ્યું હતું. અદાલતમાં તે અંગેની માહિતી આપ્યા બાદ ન્યાયાધિશે આરોપીને ઝડપી અને અદાલતમાં રજૂ કરવાનો બિહારના પોલીસવડા ને આદેશ કરતા પોલીસે આરોપીને ઝડપવા દોડધામ શરૂ કરી છે.
