બ્રિટનમાં કિંગ ચાર્લ્સના ભાઈ પ્રિન્સ એન્ડ્ર્યુની ધરપકડ: પદનો દુરુપયોગ કર્યાનો આરોપ,એપસ્ટિન ફાઇલ્સના કારનામા નડી ગયા
બ્રિટિશ રાજવી પરિવાર માટે એક અત્યંત શરમજનક અને આંચકાજનક ઘટના બની છે. ગુરુવારે પૂર્વી ઇંગ્લેન્ડમાં આવેલા સેન્ડ્રિંગહામ એસ્ટેટના વુડ ફાર્મ ખાતેથી બ્રિટિશ સ્પેશિયલ પોલીસે વર્તમાન રાજા ચાર્લ્સ ત્રીજાના નાના ભાઈ અને પૂર્વ પ્રિન્સ એન્ડ્ર્યુની સત્તાવાર રીતે ધરપકડ કરી લીધી હતી. અમેરિકાના કુખ્યાત યૌન અપરાધી જેફરી એપ્સ્ટીન સાથે જોડાયેલા બહુચર્ચિત ‘એપ્સ્ટીન ફાઈલ્સ’ કેસમાં સરકારી ગુપ્ત દસ્તાવેજો પૂરા પાડવાના ગંભીર આરોપસર આ આંતરરાષ્ટ્રીય સ્તરની અત્યાર સુધીની સૌથી મોટી કાર્યવાહી કરવામાં આવી છે. આ હાઈ-પ્રોફાઈલ ધરપકડે સમગ્ર દુનિયામાં ખળભળાટ મચાવી દીધો છે.
8 અધિકારીઓ સાદા કપડામાં પહોંચ્યા
બીબીસીના તાજેતરના અહેવાલ મુજબ, બ્રિટિશ સ્પેશિયલ પોલીસના 8 જેટલા ચુનંદા અધિકારીઓ બિલકુલ સાદા કપડામાં પૂર્વી ઇંગ્લેન્ડના સેન્ડ્રિંગહામ એસ્ટેટ પહોંચ્યા હતા. કોઈપણ પ્રકારની અફરાતફરી ટાળવા માટે અત્યંત ગુપ્તતા જાળવીને વુડ ફાર્મ ખાતેથી એન્ડ્ર્યુની અટકાયત કરવામાં આવી હતી.
ધરપકડ પાછળનું અસલી કારણ શું છે ?
પૂર્વ પ્રિન્સ એન્ડ્ર્યુ પર સૌથી મોટો અને સંગીન આરોપ એ છે કે તેમણે દોષિત યૌન અપરાધી જેફરી એપ્સ્ટીનને બ્રિટિશ સરકારના અત્યંત સંવેદનશીલ અને ગુપ્ત દસ્તાવેજો પહોંચાડ્યા હતા.
આ પણ વાંચો:AI ઇમ્પેક્ટ સમિટ: મુકેશ અંબાણી 10 લાખ કરોડનું તો ગૂગલના CEO સુંદર પિચાઈ પણ રૂપિયા 1.25 લાખ કરોડનું કરશે રોકાણ
હાલમાં પોલીસ અને ગુપ્તચર એજન્સીઓ આ સમગ્ર કૌભાંડની ઊંડાણપૂર્વક તપાસ કરી રહી છે. પૂછપરછ દરમિયાન એ જાણવાનો સઘન પ્રયાસ કરવામાં આવી રહ્યો છે કે એન્ડ્ર્યુ દ્વારા એપ્સ્ટીનને બરાબર કયા પ્રકારના દસ્તાવેજો લીક કરવામાં આવ્યા હતા અને તેનાથી રાષ્ટ્રીય સુરક્ષાને કેટલું નુકસાન થયું છે.
